- 2024-06-25 05:16:49
- កីឡាផ្សេងៗ
ក្រុម OFF ROAD កម្ពុជា៖ ពីមុនយើងទៅប្រកួតដើរមើលឡានគេ ឥលូវគេមកមើលឡានយើងវិញយើងក្លាយជាបន្លាគេហើយ
- 2024-06-25 05:16:49
- ចំនួនមតិ 0 | ចំនួនចែករំលែក 0
ក្រុម OFF ROAD កម្ពុជា៖ ពីមុនយើងទៅប្រកួតដើរមើលឡានគេ ឥលូវគេមកមើលឡានយើងវិញយើងក្លាយជាបន្លាគេហើយ
ចន្លោះមិនឃើញ
ក្រុមប្រណាំងរថយន្ត OFF ROAD កម្ពុជា បង្ហាញក្ដីរំពឹងខ្លាំង និងពោរពេញដោយទំនុកចិត្តខ្ពស់សម្រាប់ការប្រកួត Off-Road Magnificent Ten 2024 នៅខេត្តកាន់ឆាណាក់បូរី ប្រទេសថៃ ខណៈប្រទេសខ្លាំងៗពីមុនចាត់ទុកកម្ពុជាជាបន្លាក្នុងភ្នែកហើយ។
កីឡាករ ព្រំ រស្មី បានឲ្យដឹងថា ពីមុនកម្ពុជាទៅប្រកួតម្ដងៗតែងតែដើរទៅមើលឡានរបស់ប្រទេសគេ ចង់ដឹងពីបច្ចេកទេសការរៀបចំរថយន្ត និងបំពាក់គ្រឿងសំខាន់ៗណាខ្លះដើម្បីឲ្យឡានធន់ ខ្លាំង ឆ្លងកាត់ផ្លូវឧបសគ្គនានាបាន។ ប៉ុន្តែឥលូវនេះក្រុមកម្ពុជាខ្លាំង មានបទពិសោធគ្រប់គ្រាន់ និងមានសមត្ថភាពលេចធ្លោរហូតឈ្នះពាន និងឈានចូលចំណាត់ថ្នាក់ Top 3 ជាហេតុនាំឲ្យក្រុមប្រទេសផ្សេងៗងាកមកចាប់អារម្មណ៍ក៏ដូចជាដើរមកមើលឡានកម្ពុជាវិញម្ដង ថែមទាំងគិតថាកម្ពុជាជាបន្លាមួយសម្រាប់ប្រជែងមេដាយក្នុងការប្រកួតហើយ។
ជើងខ្លាំងខាងប្រណាំងរថយន្តចាស់វស្សារបស់កម្ពុជាខាងលើបន្ថែមទៀតថា សម្រាប់ការប្រកួត Off-Road Magnificent Ten 2024 នៅខេត្តកាន់ឆាណាក់បូរី លើកនេះក្រុមកម្ពុជាបានត្រៀមលក្ខណៈសម្បត្តិរួចរាល់ទាំងរថយន្ត សម្ភារប្រកួត និងបទពិសោធ។ ពេលប្រកួតជាក់ស្ដែងប្រសិនបើម៉ាស៊ីនឡានមិនខូចអ្វីនោះទេ ជឿជាក់ថាកម្ពុជាជាប់ចំណាត់ Top 3 ឬ Top 5 ជាមិនខាន។
ចំណែកលោក ឈិត ឈុំសីហា ប្រធានដឹកនាំក្រុម OFF ROAD កម្ពុជាបានឲ្យដឹងដែរថា ចំពោះការចេញទៅប្រកួតនេះមួយគឺមានបែងចែកជា ៤ក្រុមធំៗ ទី១ ក្រុមប្រណាំង ទី២ ក្រុមជាងជួសជុល ក្រុមទី៣ Support Team (ក្រុមផ្គត់ផ្គង់) និងក្រុមទី៤ Media (ក្រុមព័ត៌មាន) ដូច្នេះសរុបទាំងអស់មានគ្នា ២៣នាក់។ ក្រុមនិមួយៗមានរៀបចំ និងទទួលការងាររបស់ខ្លួនល្អមែនទែន ស្របពេលក្រុមប្រណាំងបង្ហាញពីភាពក្លាហាន និងទំនុកចិត្តខ្ពស់។
បញ្ជាក់ដែរថា ការប្រណាំងរថយន្ត Off-Road Magnificent Ten 2024 នៅខេត្តកាន់ឆាណាក់បូរី ប្រទេសថៃ មាន ៤ប្រទេសចូលរួម ឡាវ ម៉ាឡេស៊ី កម្ពុជា និងថៃ។ ការប្រកួតចាប់ផ្តើមប្រណាំងពីថ្ងៃទី២៧ ដល់ ៣០ ខែមិថុនា ឆ្នាំ២០២៤។ កម្ពុជាបញ្ជូនរថយន្ត ៣គ្រឿង ប្រកួតវិញ្ញាសាជាក្រុមប្រជែងជាមួយ ២៨ក្រុមផ្សេងទៀតដែលចូលរួម និងសរុបរថយន្តទាំងអស់មាន ៨៤គ្រឿង។ ក្រុមប្រណាំងរថយន្ត OFF ROAD កម្ពុជាទៅចូលរួមការប្រកួតនេះដោយមានការឧបត្ថម្ភគាំទ្រពីបណ្ដាក្រុមហ៊ុនដូចជា Top1 , Madrid Beer , G T V C , Liberty Carz , Champion Aion Cambodia៕
