Women Run 10k មានអ្នកចុះឈ្មោះរត់ ២០៤០នាក់ហើយ និងកំពុងរង់ចាំមហាជនចូលរួមបន្តទៀត

2024-02-07 03:30:34
កីឡាផ្សេងៗ

2024-02-07 03:30:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍រត់ប្រណាំងបែបកម្សាន្ត និងជាការអបអរសាទរទិវាសិទ្ធិនារីអន្តរជាតិ ៨មិនា និងជាលើកទី៣ នៃព្រឹត្តិការណ៍នេះគិតមកដល់ពេលឥឡូវមានអ្នកចុះឈ្មោះរហូត ២០៤០នាក់មកហើយ ប៉ុន្តែនៅតែបន្តរង់ចាំមហាជនក៏ដូចជាអ្នកស្រឡាញ់ចូលចិត្តចុះឈ្មោះបន្តទៀត។

លោក សែម ផល្លា

លោក សែម ផល្លា ប្រធានគណៈកម្មការរៀបចំព្រឹត្តិការណ៍ Women Run 10k បានឲ្យដឹងថា គិតតាំងពីថ្ងៃបើកចុះឈ្មោះដំបូងមកដល់ពេលនេះមានមហាជនចុះឈ្មោះរហូតដល់ ២០៤០នាក់ហើយ។ ក្នុងនោះ វិញ្ញាសា 10គីឡូម៉ែត្រមានអ្នកចុះឈ្មោះ ៩៨៩នាក់ និងវិញ្ញាសា ៤គីឡូម៉ែត្រមានអ្នកចុះឈ្មោះ ១០៥១នាក់ហើយនឹងមានត្រៀមអ្នកចុះឈ្មោះបន្ទាប់ពីចូលឆ្នាំចិននេះខ្ទង់ ១០០នាក់បន្ថែមទៀត។ សម្រាប់ការរំពឹងទុកនៅថ្ងៃព្រឹត្តិការណ៍មកដល់នោះខាងកម្មវិធីចង់ឲ្យមានអ្នកចូលរួមរត់ខ្ទង់ ២៥០០នាក់។

ឯកឧត្ដម វ៉ាត់ ចំរើន

ឯកឧត្ដម វ៉ាត់ ចំរើន អគ្គលេខាធិការ NOCC ព្រឹត្តិការណ៍នេះផ្ដោតសំខាន់លើការជំរុញឲ្យប្រជាពលរដ្ឋមានសុខភាពល្អដែលទាំងនេះជាអ្វីដែលគណៈកម្មាធិការជាតិអូឡាំពិកកម្ពុជា និងក្រុមហ៊ុន សុវណ្ណាភូមិឡាយហ្វ៍ ចង់បានដូចគ្នា។ ដោយមានការសហការគ្នារៀបចំបានល្អជាមួយ សុវណ្ណាភូមិឡាយហ្វ៍ ដូច្នេះ NOCC បន្តការងារ និងរួមគ្នាធ្វើព្រឹត្តិការណ៍នេះជាបន្តបន្ទាប់ទៅទៀត។ ជាមួយគ្នានេះដែរការចូលរួមរបស់មហាជនគឺបង្ហាញពីការយកចិត្តទុកដាក់ចំពោះសុខភាពខ្លួនឯង ចូលរួមជំរុញអភិវឌ្ឍន៍វិស័យកីឡារត់ប្រណាំងបែបសប្បុរសធម៌ឲ្យកាន់តែផុលផុស និងជាការអបអរសាទរដល់ទិវាសិទ្ធិនារីអន្តរជាតិ ៨មិនា ផងដែរ។

ទិដ្ឋភាពសន្និសីទសារព័ត៌មាន

សូមបញ្ជាក់ដែរថា ព្រឹត្តិការណ៍រត់ប្រណាំង Women Run 10k នេះនឹងធ្វើឡើងនៅថ្ងៃសុក្រ ទី៨ ខែមិនា ឆ្នាំ២០២៤ នៅមុខវត្តបទុវតី រាជធានីភ្នំពេញ។ សម្រាប់អ្នកចង់ចុះឈ្មោះចូលរួមព្រឹត្តិការណ៍នេះអាចទំនាក់ទំនងទៅកាន់ហ្វេសបុកផេក Cambodia Events Organizer ឬតាមរយៈលេខទូរសព្ទ 015 213 525៕