AIA-ISF Youth League រដូវកាលទី៨ បើកជាផ្លូវការហើយ ខណៈក្រុមនឹងចូលរួមសរុបរហូត ១៣៥ក្រុម

2024-02-06 04:00:57
កីឡាផ្សេងៗ

2024-02-06 04:00:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ពានរង្វាន់បាល់ទាត់ AIA-ISF Youth League រដូវកាលទី៨ របស់អង្គការផ្កាយសមុទ្រ បានបើកការប្រកួតជាផ្លូវការហើយកាលពីថ្ងៃទី៤ ខែកុម្ភៈ ឆ្នាំ២០២៤ ខណៈក្រុមចូលរួមសរុបមានរហូតដល់ ១៣៥ក្រុមប្រកួតប្រជែង។

ទិដ្ឋភាពបើកការប្រកួត

អ្នកស្រី ជួប វិច្ឆិកា នាយិកាប្រតិបត្តិរបស់អង្គការផ្កាយសមុទ្របានឲ្យដឹងថា កាលពីថ្ងៃអាទិត្យ ទី៤ ខែកុម្ភៈ នេះគឺជាការបើកការប្រកួតជាផ្លូវការនៅរដូវទី៨ ដែលជារដូវកាលថ្មីសម្រាប់ឆ្នាំ២០២៤ នេះក្នុងពានរង្វាន់ AIA-ISF Youth League។ សម្រាប់ពិធីបើកការប្រកួតនៅ AIA Stadium នេះគឺមាន ៧០ក្រុម ប៉ុន្តែនៅថ្ងៃទី១១ ខែកុម្ភៈ នឹងមានបើកការប្រកួតនៅខេត្តកំពត បន្ទាប់មកនៅថ្ងៃទី២៥ ខែកុម្ភៈ ឆ្នាំ២០២៤ នឹងមានបើកការប្រកួតនៅខេត្តបន្ទាយមានជ័យបន្ថែមទៀត។ ដូច្នេះបើសរុបទាំងរាជធានីភ្នំពេញ និង ២ខេត្តទៀតនោះគឺមាន ១៣៥ក្រុមក្នុងនោះកីឡាករ កីឡាការិនី យុវជនក្មេងៗខ្ទង់ ១៧០០នាក់ចូលរួមបញ្ចេញសមត្ថភាពប្រជែងពានរង្វាន់ខាងលើនេះ។

ទិដ្ឋភាពបើកការប្រកួត

នាយិកាប្រតិបត្តិរបស់អង្គការផ្កាយសមុទ្ររូបនេះបន្ថែមទៀតថា ការប្រកួតបាល់ទាត់វិលជុំកុមារ និងយុវជន AIA – ISF Youth League នេះគឺដូចឆ្នាំមុនៗដែររៀបចំឡើងក្នុងគោលបំណងផ្ដោតលើការលេងកីឡាដើម្បីសុខភាព យុវជនប្រើពេលវេលាដោយមានតម្លៃជៀសវាងការប្រព្រឹត្តិទង្វើមិនល្អលើអំពើអបាយមុខផ្សេងៗ។ ទន្ទឹងនិងនេះព្រឹត្តិការណ៍នេះបានផ្ដល់ឱកាសឲ្យពួកគេបានចូលរួមដើម្បីសុខភាពរាងកាយ សុខភាពផ្លូវចិត្ត និងបានបង្រៀនផ្នែក Soft Skill ផងដែរឲ្យចេះសហការធ្វើការជាក្រុម និងចេះដោះស្រាយនូវបញ្ហាផ្សេងៗដែលកើតមានឡើង។

ទិដ្ឋភាពបើកការប្រកួត

បញ្ជាក់ដែរថា ការប្រកួតបាល់ទាត់វិលជុំកុមារ និងយុវជន AIA – ISF Youth League ចាប់ផ្ដើមពីខែកុម្ភៈ រហូតដល់ ខែមិថុនា ឆ្នាំ២០២៤។ បន្ទាប់ពីរកឃើញជើងខ្លាំងប្រចាំរាជធានីភ្នំពេញ ខេត្តកំពត និងខេត្តបន្ទាយមានជ័យហើយនោះគណៈកម្មការរៀបចំនឹងធ្វើការប្រកួតវគ្គផ្ដាច់ព្រ័ត្ររកជើងឯកប្រចាំឆ្នាំ និងធ្វើការបិទបញ្ចប់ពានរង្វាន់នេះនៅខែមិថុនា ឆ្នាំ២០២៤ តែម្ដង។ ក្រុមហ៊ុនធានារ៉ាប់រង អាយុជីវិត និងសុខភាព អេ អាយ អេ ខេមបូឌា បានផ្តល់ការឧបត្ថម្ភគាំទ្រក្នុងការរៀបចំព្រឹត្តិការណ៍ប្រកួតបាល់ទាត់វិលជុំកុមារ និងយុវជន AIA – ISF Youth League នេះចាប់តាំងពី ឆ្នាំ២០១៧មកម្ល៉េះ៕