ប៉ាល់ ឆរស៊ី្ម ៖ សុខភាពល្អបានមកពីការហាត់កីឡា មិនមែនបានមកពីការបរិភោគសត្វព្រៃទេ

2024-01-18 05:07:15
កីឡាផ្សេងៗ

2024-01-18 05:07:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ប៉ាល់ ឆរស៊ី្ម កីឡាការិនីឆ្នើមរបស់កម្ពុជានៅស៊ីហ្គេម ឆ្នាំ២០២៣ អ្នកកីឡាទាំងអស់ដែលទទួលបានសុខភាពល្អ និងយល់ដឹងពីសារប្រយោជន៍ នៃការហាត់កីឡា គួរចូលរួមចែករំលែក និងផ្សព្វផ្សាយដល់មហាជនហើយពន្យល់ថាមិនមែនញុំសត្វព្រៃនាំឲ្យមានសុខភាពនោះទេ។

ប៉ាល់ ឆរស៊ី្ម កំពុងថ្លែងសារទៅមហាជន

កីឡាការិនី ប៉ាល់ ឆរស៊ី្ម ដែលត្រូវបានអញ្ជើញជាភ្ញៀវកិត្តិយសក្នុងកម្មវិធីមហោស្រពសត្វស្លាបលើកទី២ នៅសកលវិទ្យាល័យភូមិន្ទកសិកម្ម (ចំការដូង) បានឲ្យដឹងថា ខ្លួនពិតជាមានអារម្មណ៍ស្រស់ស្រាយ និងសប្បាយចិត្តមែនទែនដែលបានចូលរួមក្នុងកម្មវិធីនេះ។ អ្វីដែលសំខាន់នោះគឺបានចូលរួមចែករំលែក និងផ្ញើសារដល់ប្រជាពលរដ្ឋ ពិសេសសិស្សនិស្សិតឲ្យចេះស្រឡាញ់ការពារបរិស្ថាន និងបញ្ឈប់ការបរិភោគសត្វព្រៃ។

ប៉ាល់ ឆរស៊ី្ម ពេលចូលរួមកម្មវិធីសត្វស្លាប

បរិស្ថានស្អាត បរិស្ថានល្អ ធ្វើឲ្យមនុស្សរស់នៅមានសុខភាពល្អ មានកម្លាំងកាយ កម្លាំងប្រាជ្ញា អាចដោះស្រាយ និងបំពេញការងារបានល្អ។ ទន្ទឹមនិងនេះធ្វើឲ្យម្នាក់ៗរស់នៅដោយបរិយាកាសស្រស់ស្រាយ អីចឹងហើយការការពារសត្វព្រៃ និងបរិស្ថានគឺជារឿងសំខាន់សម្រាប់អ្នកគ្រប់គ្នា។

ប៉ាល់ ឆរស៊ី្ម ពេលចូលរួមកម្មវិធីសត្វស្លាប

ម្ចាស់មេដាយ ៦គ្រឿងនៅស៊ីហ្គេមកម្ពុជា ខាងលើនេះបន្ថែមទៀតថា «សុខភាពល្អបានមកពីការហាត់កីឡា មិនមែនបានមកពីការបរិភោគសត្វព្រៃនោះទេ» ដូច្នេះអ្នកកីឡាទាំងអស់ដែលបានយល់ដឹង និងទទួលបានសុខភាពល្អពីកីឡា គួរនាំគ្នាផ្សព្វផ្សាយពន្យល់ដល់មហាជន ឬអ្នកនៅជុំវិញខ្លួនតាមដែលអាចធ្វើទៅបាន។ មួយវិញទៀតក្នុងនាមជាអ្នកកីឡាដែលមហាជនស្គាល់ច្រើនគួរចូលរួមជំរុញឲ្យប្រជាជនទូទៅស្រឡាញ់ការពារបរិស្ថានល្អ ការពារសត្វព្រៃ ពិសេសសត្វមួយចំនួនដែលជិតផុតពូជ ងាកមកថែរក្សា និងបញ្ឈប់ការបរិភោគពីពេលនេះតទៅ។

ប៉ាល់ ឆរស៊ី្ម ពេលចូលរួមកម្មវិធីសត្វស្លាប

កម្មវិធីមហោស្រពសត្វស្លាប និងធម្មជាតិ ឆ្នាំ២០២៤ លើកទី២ ក្រោមប្រធានបទ «ផ្ទះសម្រាប់យើងទាំងអស់គ្នា» នេះធ្វើឡើងកាលពីថ្ងៃទី១៥ ខែមករា នៅក្នុងសកលវិទ្យាល័យភូមិន្ទកសិកម្ម (ចំការដូង)។ កម្មវិធីសង្គមមួយនេះរៀបចំដោយអង្គការជីវិតធម្មជាតិនៅកម្ពុជា (NatureLife Cambodia Organization) សហការជាមួយក្រសួងបរិស្ថាន និងអង្គការដៃគូជាច្រើនទៀត។ ក្នុងនោះដែរ ប៉ាល់ ឆរស៊ី្ម ត្រូវបានអញ្ជើញឲ្យចូលរួមជាភ្ញៀវកិត្តិយសដែលជាវរិៈកីឡាការិនីឆ្នើមរបស់កម្ពុជា នៃព្រឹត្តិការណ៍ប្រវត្តិសាស្ត្រស៊ីហ្គេម ឆ្នាំ២០២៣៕