ការតស៊ូព្យាយាមជាយូរឆ្នាំឥលូវសម្រេចហើយកីឡាកាយសម្ព័ន្ធកម្ពុជាឈ្នះមេដាយមាស ជើងឯកអាស៊ី

2023-09-18 05:06:15
កីឡាផ្សេងៗ

2023-09-18 05:06:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ការខំប្រឹងតស៊ូព្យាយាមជាច្រើនឆ្នាំ និងជាក្ដីស្រមៃរបស់សហព័ន្ធកីឡាកាយសម្ព័ន្ធកម្ពុជាគឺបានសម្រេចហើយដោយបានឈ្នះមេដាយមាស១ និងសំរឹទ្ធ១ ក្នុងការប្រកួតជើងឯកអេរ៉ូប៉ិចអាស៊ី លើកទី៨ នៅប្រទេសម៉ុងហ្គោលី អំឡុងថ្ងៃទី១៣ ដល់ ១៧ ខែកញ្ញា ឆ្នាំ២០២៣។

ឯកឧត្ដម ណយ ផាន់ណា អគ្គលេខាធិការសហព័ន្ធកីឡាកាយសម្ព័ន្ធកម្ពុជា បានឲ្យដឹងថា នេះជាប្រវត្តិសាស្ត្រហើយសម្រាប់កម្ពុជាចំពោះប្រភេទកីឡាកាយសម្ព័ន្ធនេះដែលបានឈ្នះមេដាយមាស១គ្រឿងក្នុងព្រឹត្តិការណ៍ធំកម្រិតអាស៊ីបែបនេះ។ នេះមោទកភាពដល់ឧដុង្គឧត្ដមសម្រាប់ប្រទេសជាតិ ព្រោះកម្រិតអាស៊ីគឺធំ និងមានប្រទេសចូលរួមច្រើនដូច្នេះមានការលំបាកក្នុងការប្រជែងមេដាយ។

អគ្គលេខាធិការខាងលើបន្ថែមទៀតថា ទាំងនេះជាការខំប្រឹងប្រែង និងបានដាក់ផែនការច្បាស់លាស់ពីប្រធានសហព័ន្ធឯកឧត្ដមបណ្ឌិត ថោង ខុន ទើបទទួលបានលទ្ធផលល្អតាមការគ្រោងទុក។ ឯកឧត្ដម ណយ ផាន់ណា ក៏សូមថ្លែងអំណរគុណដល់ ឯកឧត្ដមបណ្ឌិត ថោង ខុន ដែលបានយកចិត្តទុកដាក់ និងតែងតែជំរុញជានិច្ចនាពេលកន្លង។ បន្ថែមពីនេះឯកឧត្ដមអរគុណដល់លោកគ្រូ អ្នកគ្រូកាយសម្ព័ន្ធទាំងអស់ដែលខំប្រឹងបង្ហាត់សិស្ស អរគុណចំពោះការខំប្រឹងប្រែងរបស់សិស្សៗរហូតទទួលបានមេដាយមាស១គ្រឿងនេះ។

បញ្ជាក់ដែរថា កីឡាការិនីផ្នែកអេរ៉ូប៉ិចកម្ពុជា បានប្រកួតឈ្នះមេដាយ២គ្រឿងរួមមានមាស១ និងសំរឹទ្ធ១ ក្នុងព្រឹត្តិការណ៍ជើងឯកអាស៊ី លើកទី៨ ដែលធ្វើឡើងនៅប្រទេសម៉ុងហ្គោលី។ មេដាយមាស ឈ្នះលើវិញ្ញាសា ទ្រីយ៉ូ (សម្ដែងជាក្រុម) មានកីឡាការិនី ស៊ីវ ចន្ថា, ណេម សុខហេង និងកីឡាការិនី ឌឹម អ៊នធីតា។ ចំណែកមេដាយសំរឹទ្ធ ឈ្នះដោយកីឡាការិនី សួស ស្រីពៅ លើវិញ្ញាសាឯកត្តជននារី (Senor IW)។ព្រឹត្តិការណ៍នេះមានមានប្រទេសចូលរួមចំនួន១៤ និងចាប់ផ្ដើមពីថ្ងៃទី១៣ ដល់ ១៧ ខែកញ្ញា ឆ្នាំ២០២៣៕