- 2023-01-18 05:39:31
- កីឡាផ្សេងៗ
កីឡាករកាយវប្បកម្មយំស្ទើរគ្រប់គ្នាព្រោះដកចេញពីស៊ីហ្គេម ២០២៣
- 2023-01-18 05:39:31
- ចំនួនមតិ 0 | ចំនួនចែករំលែក 0
កីឡាករកាយវប្បកម្មយំស្ទើរគ្រប់គ្នាព្រោះដកចេញពីស៊ីហ្គេម ២០២៣
ចន្លោះមិនឃើញ
កីឡាករ កីឡាការិនីកាយវប្បកម្ម យំ និងសោកស្ដាយគ្រប់គ្នាដោយសារតែត្រូវដកចេញលែងឲ្យលេងនៅស៊ីហ្គេម ២០២៣ ដែលកម្ពុជាជាម្ចាស់ផ្ទះ ខណៈប្រធានសហព័ន្ធរួមទាំងកីឡាករសុំអំពាវនាវទៅសម្ដេចជួយអន្តរាគមន៍។
លោក តិក ប៊ុនវី ប្រធានសហព័ន្ធកីឡាកាយវប្បកម្មបានឲ្យដឹងថា អ្វីដែលសហព័ន្ធខំប្រឹងជាយូរមកហើយគឺត្រូវរលាយ និងធ្លាក់ដល់សូន្យដោយសារតែចាញ់ការបោកបញ្ឆោត លួងលោមឲ្យពីអ្នកក្រៅឲ្យកីឡាករប្រើប្រាស់សារធាតុហាមឃាត់នៅពេលប្រកួតកីឡាជាតិ លើកទី៣ នេះ។ ការត្រួតពិនិត្យទឹកនោមម្ចាស់មេដាយនានានៅកីឡាជាតិ លើកទី៣ នេះនាំឲ្យអន្តរជាតិ និងស្ថាប័នកីឡានៅកម្ពុជាដកកីឡាកាយវប្បកម្មចេញពីព្រឹត្តិការណ៍ស៊ីហ្គេម ឆ្នាំ២០២៣ កម្ពុជាជាម្ចាស់ផ្ទះឆ្នាំនេះ។
ជាមួយគ្នានេះផងដែរប្រធានសហព័ន្ធខាងលើអំពាវនាវដល់សម្ដេចតេជោ ជួយអន្តរាគមន៍អំពីរឿងនេះផងដើម្បីឲ្យកីឡាករ កីឡាការិនីផ្សេងៗមិនពាក់ព័ន្ធបានលេងក្នុងព្រឹត្តិការណ៍ប្រវត្តិសាស្ត្ររបស់កម្ពុជាឆ្នាំ ២០២៣ នេះផង។
ម្ចាស់មេដាយមាសនៅប្រទេសម៉ាល់ឌីវ ឆឹង ណូរ៉ា បានឲ្យដឹងដែរថា រូបគេពិតជាមានការសោកស្ដាយខ្លាំងបំផុតចំពោះការដកចេញពីស៊ីហ្គេមនៅកម្ពុជានេះ សោកស្ដាយចំពោះការខំប្រឹងហ្វឹកហាត់ជាច្រើនឆ្នាំរបស់ម្នាក់ៗ សោកស្ដាយចំពោះការចំណាយពេល ចំណាយថវិកា និងការបាត់បង់ក្ដីស្រមៃ។
ជើងខ្លាំងរបស់កម្ពុជារូបនេះស្នើសុំដល់ថ្នាក់ដឹកនាំជួយដាក់បញ្ចូលកីឡាកាយវប្បកម្មនៅស៊ីហ្គេមវិញ ដើម្បីបានសម្រេចក្ដីស្រមៃលេងឲ្យកម្ពុជានៅពេលម្ចាស់ផ្ទះ បានចូលដណ្ដើមមេដាយជូនកម្ពុជា និងឈ្នះមេដាយនៅលើទឹកដីខ្លួន។ កីឡាករដែលមានបម្រាមគឺបន្តដាក់បម្រាមទៅចុះ ប៉ុន្តែអ្នកដែលមិនបានពាក់ព័ន្ធ អ្នកដែលខំប្រឹង តស៊ូជាយូរឆ្នាំមកហើយសុំឲ្យបានចូលលេងនៅស៊ីហ្គេមវិញផង។ រូបគេនិងក្រុមកីឡាករផ្សេងៗទៀតប្ដេជ្ញានឹងយកមេដាយជូនជាតិមាតុភូមិឲ្យបាននៅស៊ីហ្គេម ២០២៣ ប្រសិនបើបានចូលលេង។
បញ្ជាក់ដែរថា កីឡាករជម្រើសជាតិ ២រូបបានមកសារភាពប្រាប់សហព័ន្ធថារូបគេបានភ្លាត់ប្រើប្រាស់ចំសារធាតុហាមឃាត់នៅពេលប្រកួតកីឡាជាតិ លើកទី៣។ ជាមួយគ្នានេះដែរសហព័ន្ធក៏បានទទួលដំណឹងថាកីឡាកាយវប្បកម្មត្រូវបានដកចេញពីស៊ីហ្គេម ២០២៣ នេះហើយដោយសារតែកីឡាករប្រើប្រាស់សារធាតុហាមឃាត់នៅពេលប្រកួត។
ម្សិលមិញនេះដែរសហព័ន្ធកីឡាកាយវប្បកម្មបានធ្វើសន្និសីទនៅទីតាំងសហព័ន្ធផ្ទាល់ឯផ្សារសំណង់ ១២ បកស្រាយក៏ដូចជាបើកបង្ហាញពីរឿងកីឡាករ២រូបត្រូវបានគេលួងលោមឲ្យប្រើប្រាស់សារធាតុហាមឃាត់ (ថ្នាំបញ្ចុះជាតិទឹក) មុនពេលប្រកួតកីឡាជាតិលើកទី៣ កន្លងទៅថ្មីៗនេះ៕
វីដេអូសម្ភាស៖
