ឯកឧត្ដម វ៉ាត់ ចំរើន លើកឧទាហរណ៍ចំៗជាចំណុចរសើបហាមដាច់ខាតក្នុងការរៀបចំព្រឹត្តិការណ៍ស៊ីហ្គេមឆ្នាំ២០២៣

2022-02-11 04:02:25
កីឡាផ្សេងៗ

2022-02-11 04:02:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្ដម វ៉ាត់ វំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជាអគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) បានលើកឧទាហរណ៍ចំៗទាក់ទងចំណុចរសើបមួយក្នុងការរៀបចំព្រឹត្តិការណ៍កីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។

ឯកឧត្ដមអគ្គលេខាធិការបានលើកឡើងក្នុងបទសម្ភាសន៍មួយក្រោយពេលបិទវគ្គ សន្និបាតបូកសរុបការងារឆ្នាំ២០២១ និងទិសដៅឆ្នាំ២០២២-២០២៣ និងសិក្ខាសាលាថ្នាក់ជាតិស្ដីពីអភិបាលកិច្ចល្អ នៃការគ្រប់គ្រងព្រឹត្តិការណ៍ SEA Games – ASEAN Para Games ឆ្នាំ២០២៣ថា ចំណុចដែលហាមដាច់ខាតគឺការបំប៉ោងតួលេខនៃការធ្វើអ្វីមួយ ឬសាងសង់អ្វីមួយ។ ស៊ីហ្គេមឆ្នាំ២០២៣ កម្ពុជាបានកំណត់ថា នឹងធ្វើឲ្យការប្រកួតនេះដ៏អស្ចារ្យជាមួយការសន្សំសំចៃ។ ទាក់ទងចំណុចនេះឯកឧត្ដមបានលើកជាឧទាហរណ៍ចំៗថា «កុំបំប៉ោងតួលេខ។ អាហ្នឹងហើយជារឿងសំខាន់នោះយើងទាំងអស់គ្នាប្ដេជ្ញាថា កុំបំប៉ោងតួលេខឲ្យសោះ។ គ្រាន់តែមួយចំណុចនេះធ្វើឲ្យយើងបាន Saving Games បាត់ទៅហើយ»។

សន្និបាតបូកសុរបការងារឆ្នាំ២០២១ និងទិសដៅឆ្នាំ២០២២-២០២៣ និងសិក្ខាសាលាថ្នាក់ជាតិស្ដីពី អភិបាលកិច្ចល្អ នៃការគ្រប់គ្រងព្រឹត្តិការណ៍ SEA Games – ASEAN Para Games ឆ្នាំ២០២៣ បានធ្វើឡើងរយៈពេល ១ថ្ងៃកន្លះ នៅសណ្ឋាគារសុខា ក្រោមអធិបតីភាពសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធានគណៈកម្មាធិការជាតិ CAMSOC និងមានការចូលរួមពីថ្នាក់ដឹកនាំ ដែលជាសមាជិក CAMSOC អាជ្ញាធររាជនី-ខេត្ត តំណាងអង្គភាពកីឡា សហព័ន្ធកីឡាជាតិ អ្នកជំនាញកីឡាអន្ដរជាតិ និងអ្នកសារព័ត៌មានជាតិ-អន្ដរជាតិសរុបប្រមាណ ២០០នាក់៕

អត្ថបទ៖ ស្រី សុវណ្ណដារ៉ា