MPL KH Season 1 រកឃើញក្រុម៦ឡើងវគ្គ Play off ហើយ

2021-09-20 06:52:49
កីឡាផ្សេងៗ

2021-09-20 06:52:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍ប្រកួត MPL KH Season 1 លក្ខណៈលីគអាជីពលំដាប់អន្តរជាតិលើវិញ្ញាសា Mobile Legends: Bang Bang បានរកឃើញក្រុមខ្លាំង៦ឡើងទៅវគ្គ Playoff ហើយ បន្ទាប់ពីធ្វើការប្រកួតវិលជុំសន្សំពិន្ទុ (Regular) ដ៏ស្វិតស្វាញបំផុត និងទទួលបានការចាប់អារម្មណ៍ខ្លាំងពីអ្នកគាំទ្រ។

នាំមកជូនដោយ MOONTON Games, Smart Axiata និងម្ចាស់ឧបត្ថម្ភ Sting និង NCX Honda ការប្រកួតវិលជុំសន្សំពិន្ទុចាប់ពីថ្ងៃទី២៨ ខែសីហា ដល់ថ្ងៃទី១៩ ខែកញ្ញា ឆ្នាំ២០២១រវាងក្រុមទាំង៨ពិតជាតឹងតែងខ្លាំង និងផ្ទុះការចាប់អារម្មណ៍ខ្លាំងពីអ្នកនិយមចិត្តកីឡាអេឡិចត្រូនិក។ ក្រុមនីមួយៗបានធ្វើការប្រកួត៧លើកដូចគ្នា ពីព្រោះពួកគេត្រូវប៉ះគ្នាទាំងអស់។ ក្រុម៤ដែលឡើងមកវគ្គជម្រុះគឺ DG Quantum, FENNEC Esport, Notorious Angels និងក្រុម Walker Esports បង្កការភ្ញាក់ផ្អើលយ៉ាងខ្លាំងដល់ក្រុមខ្លាំងអង្គុយចាំនៅវគ្គ Regular គឺក្រុម Impunity KH, SeeYouSoon, NewBlood និង Burn Gaming តាមរយៈសមត្ថភាព និងបច្ចេកទេសពិសេសរបស់ពួកគេ។

អ្នកគាំទ្រជាង៦ម៉ឺននាក់បានតាមដានទស្សនាផ្សាយផ្ទាល់លើបណ្តាញទំនាក់ទំនងសង្គម និងមានអ្នកបញ្ចេញមតិយោបល់រៀងៗខ្លួនដើម្បីជាការលើកទឹកចិត្តដល់ក្រុមសំណព្វចិត្តរបស់ពួកគេ។ ការគាំទ្រយ៉ាងច្រើនលើសលប់ពីអ្នកគាំទ្រ និងអ្នកស្រឡាញកីឡាអេឡិចត្រូនិកជាកត្តាដ៏សំខាន់បំផុតលើកទឹកចិត្តដល់ក្រុមនីមួយៗឲ្យប្រឹងប្រែង។ ជាពិសេសជាផ្នែកដ៏សំខាន់ដែលជំរុញឲ្យកីឡា Esports នៅកម្ពុជាកាន់តែរីកចម្រើន និងបង្ហាញឲ្យឃើញថា វិស័យកីឡាអេឡិចត្រូនិកនៅកម្ពុជាកំពុងដើរលើផ្លូវត្រូវឆ្ពោះទៅរកការអភិវឌ្ឍកាន់តែមានកម្រិតខ្ពស់ និងលំដាប់អន្តរជាតិ។ ជាមួយគ្នា អ្នកឧបត្ថម្ភក៏បានបន្ថែមយុទ្ធនាការណ៍ខ្លាំងក្លា និងការផ្សព្វផ្សាយទាំងក្រៅអនឡាញដែលបានជំរុញឲ្យព្រឹត្តិការណ៍នេះកាន់តែអធិកអធមទូទាំងប្រទេសកម្ពុជា។

បន្ទាប់ពីចប់ការប្រកួតក្នុងវគ្គវិលជុំសន្សំពិន្ទុ ទីបំផុតរកឃើញក្រុមខ្លាំង៦ឡើងទៅវគ្គ Play-Off មុនពេលឡើងវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រដើម្បីកាត់សេចក្តីរកក្រុមគ្រងជើងឯក MPL KH រដូវកាលទី១នេះដែលនឹងតំណាងឲ្យកម្ពុជាសម្រាប់ចេញទៅប្រកួតលើឆាកអន្តរជាតិ M3 World Championship ចុងឆ្នាំនេះ។ ក្រុមខ្លាំងទាំង៦ឡើងវគ្គ Play-Off គឺ DG Quantum, SeeYouSoon, Impunity KH, Burn Gaming, Fennes Esports និង NewBlood។ ការប្រកួតវគ្គ Playoff នឹងប្រព្រឹត្តទៅពីថ្ងៃទី១ ដល់ ទី៣ ខែតុលា ឆ្នាំ២០២១។ សូមបន្តតាមដាន និងទស្សនាផេកផ្លូវការ Mobile Legends: Bang Bang Cambodia។

សូមបញ្ជាក់ថា MPL KH Season 1 បានបើកចុះឈ្មោះកាលពីថ្ងៃ២៩ ខែកក្កដា ដល់ថ្ងៃទី៦ ខែសីហា ដោយមាន ក្រុមចុះឈ្មោះចូលរួមប្រកួតក្នុងវគ្គជម្រុះរហូតដល់៦៣៦ក្រុម។ ការប្រកួតក្នុងវគ្គជម្រុះពីថ្ងៃទី៨ ដល់ ដល់ថ្ងៃទី១៥ ខែសីហាដើម្បីរកបានកៅអី៤ឡើងវគ្គ Regular រួមជាមួយក្រុមខ្លាំងរង់ចាំនៅវគ្គវិលជុំសន្សំពិន្ទុនេះ។

អត្ថបទ៖ ប្រុស យុទ្ធ