Naga World ផ្ដល់ប្រាក់លើកទឹកចិត្ត ៣៦០០០ដុល្លារ ដល់ម្ចាស់មេដាយមាសស៊ីហ្គេម ២០១៩

2019-12-17 02:53:18
កីឡាផ្សេងៗ

2019-12-17 02:53:18
ចំនួនមតិ 0 | ចំនួនចែករំលែក 0

ចន្លោះមិនឃើញ

សណ្ឋាគារ ណាហ្គាវើលដ៍ (Naga World) កាលពីថ្ងៃទី១៦ ខែធ្នូម្សិលមិញនេះ បានធ្វើពិធីប្រគល់ប្រាក់លើកទឹកចិត្ត ៣៦០០០ដុល្លារ ដល់កីឡាករ កីឡាការិនី ៤ប្រភេទកីឡារបស់កម្ពុជា ដែលបានឈ្នះមេដាយមាស ក្នុងព្រឹត្តិការណ៍កីឡាស៊ីហ្គេម លើកទី៣០ នៅប្រទេសហ្វីលីពីន។

ទិដ្ឋភាពម្សិលមិញ

លោក Pern Chen នាយកគ្រប់គ្រងណាហ្គាវើលដ៍ បានកោតសរសើរចំពោះកិច្ចខំប្រឹងប្រែងរបស់គណៈកម្មាធិការជាតិអូឡាំពិកកម្ពុជា ក្នុងការអភិវឌ្ឍន៍ និងបណ្ដុះបណ្ដាលអត្តពលិកកម្ពុជាឲ្យមានការអភិវឌ្ឍន៍ជាលំដាប់ពីស៊ីហ្គេមមួយ ទៅស៊ីហ្គេមមួយទៀត។ ណាហ្គាវើលដ៍ មានកិត្តិយសដែលបានក្លាយជាផ្នែកមួយនៃដំណើរការនេះ ខណៈក្រុមហ៊ុនមួយនេះ នឹងនៅតែគាំទ្រដល់កម្មវិធីកីឡារបស់គណៈកម្មការជាតិអូឡាំពិក ដើម្បីជាការតៀមខ្លួន និងធ្វើឲ្យមានផ្លែផ្កានៅស៊ីហ្គេម ២០២៣ ដែលកម្ពុជាធ្វើជាម្ចាស់ផ្ទះ។

ឯកឧត្ដម វ៉ាត់ ចំរើន

ឯកឧត្ដម វ៉ាត់ ចំរើន បានឲ្យដឹងថា ដូចទៅនឹងអ្វីដែលណាហ្គាវើលដ៍ បានសន្យាកាលពីឆ្នាំ២០១៨ អ៊ីចឹងថានឹងផ្ដល់ប្រាក់រង្វាន់លើកទឹកចិត្តដល់អត្តពលិកដែលបានឈ្នះមេដាយមាសស៊ីហ្គេម លើកទី៣០នេះ។ ក្រុមហ៊ុនខាងលើនេះតែងតែផ្ដល់ប្រាក់រង្វាន់ និងលើកទឹកចិត្ត ជំរុញឲ្យកីឡាករ កីឡាការិនីកម្ពុជារឹតតែខំប្រឹងប្រែងប្រកួត។ សកម្មភាពទាំងនេះហើយជាគំរូល្អមួយដែលបណ្ដាក្រុមហ៊ុនឯកជននានាពិចារណា តាមលទ្ធភាពក្នុងការចូលរួមជួយជ្រោមជ្រែងវិស័យកីឡានៅកម្ពុជាបន្ថែមទៀត។ ឯកឧត្ដមក៏ថ្លែងអំណរគុណដល់ ណាហ្គាវើលដ៍ និងជូនពរឲ្យក្រុមហ៊ុននេះរឹតតែទទួលបានជោគជ័យក្នុងអាជីវកម្មបន្ថែមទៀត។

កម្មវិធីប្រគល់ប្រាក់រង្វាន់លើកទឹកចិត្តរបស់ ណាហ្គាវើលដ៍ ម្សិលមិញនេះធ្វើឡើងក្នុងផ្សារទំនើបក្រោមដីណាហ្គាស៊ីធីវ៉ក។ កីឡាករ កីឡាការិនីដែលឈ្នះមេដាយមាស រួមមាន កីឡាការិនី ចេសា ខាន់ ទទួលប្រាក់ ៦០០០ ដុល្លារ និងគ្រូបង្វឹក ១០០០ដុល្លារ, កីឡាការិនី ស៊ន សៀវម៉ី ទទួលបាន ៦០០០ ដុល្លារ និងគ្រូបង្វឹក ១០០០ ដុល្លារ, កីឡាករយ៉ុង ម៉េងលី ៦០០០ ដុល្លារ និងគ្រូបង្វឹក ១០០០ ដុល្លារ និងក្រុមកីឡាការិនីប៉េតង់ ទទួលបានប្រាក់ ១០០០០ ដុល្លារ និងគ្រូបង្វឹក ១០០០ ដុល្លារ។ ក្នុងនោះគណៈកម្មាធិការជាតិអូឡាំពិកកម្ពុជាក៏ទទួលបាន ៤០០០ ដុល្លារ ផងដែរសរុបប្រាក់ទាំងអស់ ៣៦០០០ដុល្លារ៕