- 2019-11-02 07:10:42
- កីឡាផ្សេងៗ
មេដាយមាសនៅចិនថ្មីៗនេះ វាស់ស្ទង់ថាសូហ្វតេនីសកម្ពុជានឹងអាចឈ្នះមេដាយនៅស៊ីហ្គេម ២០១៩
- 2019-11-02 07:10:42
- ចំនួនមតិ 0 | ចំនួនចែករំលែក 0
មេដាយមាសនៅចិនថ្មីៗនេះ វាស់ស្ទង់ថាសូហ្វតេនីសកម្ពុជានឹងអាចឈ្នះមេដាយនៅស៊ីហ្គេម ២០១៩
ចន្លោះមិនឃើញ
អនុប្រធានសហព័ន្ធកីឡាសូហ្វតេនីសកម្ពុជា បញ្ជាក់ថាជ័យជម្នះ ឬមេដាយមាសដែលកីឡាករទើបតែឈ្នះក្នុងព្រឹត្តិការណ៍ពិភពលោកលើកទី១៦ នៅប្រទេសចិននេះ ជាការវាស់ស្ទង់សមត្ថភាពថាកីឡាមួយនេះនឹងរកឈ្នះមេដាយបាននៅស៊ីហ្គេម ២០១៩ ។
ឯកឧត្ដម ជា ប៊ុនហេង អនុប្រធានសហព័ន្ធខាងលើបានឲ្យដឹងថា ទោះជាកម្ពុជាចាញ់ក្នុងវគ្គជម្រុះដំបូងដែលមាន៣២ប្រទេសមែន ប៉ុន្តែក្រុមខ្លាំងមួយៗចំនួនទៀតក៏មានលទ្ធផលដូចកម្ពុជាដែរ។ ប៉ុន្តែអ្វីដែលជាកំណត់ត្រា និងជាសមិទ្ធផលថ្មីមួយទៀតសម្រាប់ សូហ្វតេនីកម្ពុជានោះ គឺការឈ្នះមេដាយមេដាយមាស កម្រិតទី២(B)ក្នុងព្រឹត្តិការណ៍ពិភពលោកនៅចិននេះ។
អំឡុងការប្រកួតជើងឯកពិភពលោកលើកទី១៥ ក្នុងឆ្នាំ២០១៥ កម្ពុជាធ្វើមិនបានល្អ ឬអាចឈ្នះមេដាយសូម្បីតែមួយគ្រឿង តែលើកទី១៦នេះ កំណត់ត្រាថ្មីវិញ្ញាសាជាក្រុមរបស់កម្ពុជាអាចឈ្នះមេដាយមាស ខណៈសហរដ្ឋអាមេរិក ប៉ូឡូញ ធ្វើមិនបានលទ្ធផលល្អដូចនេះឡើយ។
តំណាងស្ថាប័នកីឡាក្រសួងមហាផ្ទៃខាងលើនេះបន្ថែមទៀតថា បើនិយាយពីសមត្ថភាពក្នុងតំបន់អាស៊ាន គឺមានតែប្រទេសថៃមួយទេដែលប្រកួតបានឡើងទៅកម្រិតទី១(A) ហើយទទួលបានមេដាយសំរឹទ្ធ។ ក្រៅពីនេះ ហ្វីលីពីន ឥណ្ឌូណេស៊ី និងប្រទេសខ្លាំងៗមួយចំនួនទៀតគឺធ្លាក់ជាមួយកម្ពុជាដែរ ខណៈការប្រកួតកម្រិតទី២ សុទ្ធតែចាញ់កម្ពុជាទាំងអស់។ ក្នុងចំណោមប្រទេសអាស៊ាននេះមិនងាយក្រុមណាស៊ីកម្ពុជានោះទេ ដូច្នេះការប្រកួតនេះដូចជាការសាកកម្លាំងមុនស៊ីហ្គេម ២០១៩ នេះអញ្ចឹង។
រំលឹកដែរថា កីឡាសូហ្វតេនីសកម្ពុជា បានឈ្នះមេដាយមាស កម្រិតទី២(B) ១គ្រឿងលើវិញ្ញាសាជាក្រុមផ្នែកបុរស ក្នុងកម្មវិធី The 16th World Soft Tennis Championships ដែលទើបបញ្ចប់កាលពីថ្ងៃទី១ ខែវិច្ឆិកា ២០១៩ នៅប្រទេសចិន។ អត្តពលិកសូហ្វតេនីសរបស់កម្ពុជា១២នាក់បានវិលត្រលប់វិញហើយកាលពីរសៀលម្សិលមិញនេះ៕
