មិនមែនលំៗទេ កីឡាករ ITF មុនចេញទៅប៊ុលហ្គារី មានអ្នកឧបត្ថម្ភកាត់សក់ Free

2019-08-16 10:20:06
កីឡាផ្សេងៗ

2019-08-16 10:20:06
ចំនួនមតិ 0 | ចំនួនចែករំលែក 0

ចន្លោះមិនឃើញ

សហព័ន្ធតេក្វាន់ដូ ITF មិនត្រឹមតែវិន័យល្អនោះទេ ប៉ុន្តែការឯកសណ្ឋាន ក៏ដូចជាការតុបតែងខ្លួន សក់ក្បាលគឺពិនិត្យមើលគ្រប់ជ្រុងជ្រោយតែម្ដងមុនចេញទៅប្រកួត។ ព្រឹកមិញនេះកីឡាករចំនួន១៥នាក់ បានទៅកាត់សក់ដោយមិនគិតលុយពីហាងខ្មែរអង្គរ មុនហោះទៅប៊ុលហ្គារីថ្ងៃទី២២ សីហា ២០១៩។

ទិដ្ឋភាពកាត់សក់ព្រឹកមិញ

លោក ទួន សុជាតិ ម្ចាស់ហាងកាត់សក់ ខ្មែរអង្គរ បានឲ្យដឹងថា ទី១លោកក៏ស្រឡាញ់ខាងវិស័យកីឡានេះដែរ ទី២ ដោយដឹងថាកីឡាករតេក្វាន់ដូ ITF ត្រូវចេញប្រកួតជ្រើសរើសជើងឯកពិភពលោកនៅឯប្រទេសក្រៅផងនោះ ក៏ឧបត្ថម្ភជាការកាត់សក់ជូនដោយមិនគិតថ្លៃតែម្ដង។ ការធ្វើបែបនេះជាការរួមចំណែកលើកស្ទួយវិស័យកីឡាឲ្យកាន់តែរីកចម្រើន ហើយនេះក៏ជាការលើកទឹកចិត្តដល់អត្តពលិកទាំងអស់ឲ្យខំប្រឹងប្រែងប្រកួតយកជ័យជម្នះ យកមេដាយជូនប្រទេសជាតិវិញ។

ចំណែកលោកគ្រូ ប៉ាល ជីវ័ន ក៏ថ្លែងអំណរគុណដល់ម្ចាស់ហាងខាងលើផងដែរ ដែលបានជួយកាត់សក់ដោយមិនបានគិតថ្លៃ នេះជាការរួមចំណែកលើកទឹកចិត្តដល់កីឡាករដែលត្រូវចេញទៅប្រកួតនៅប៉ុន្មានថ្ងៃខាងមុខនេះ។ ឱកាសនោះដែរ លោកគ្រូជូនពរម្ចាស់ហាងឲ្យដំណើរការដោយរលូន និងសំបូរអតិថិជន។

ទិដ្ឋភាពកាត់សក់ព្រឹកមិញ

ឯកឧត្ដម កែវ រ៉េមី បានឡើងកន្លងមកថា ចំពោះសហព័ន្ធតេក្វាន់ដូ ITF មិនត្រឹមតែច្បាប់ទម្លាប់តឹងរ៉ឹង និងវិន័យល្អនោះទេ ការតុបតែងខ្លួនគឺត្រូវឲ្យសមសួនជាអ្នកកីឡាដើម្បីជាគំរូល្អផងដែរ។ ប្រធានសហព័ន្ធរូបនេះក៏បានប្រាប់ទៅកីឡាករទាំងដែលនឹងចេញទៅ ប៊ុលហ្គារី ថាត្រូវកាត់សក់ឲ្យបានស្អាតល្អដើម្បីឲ្យគេដឹងថា ITF មកពីកម្ពុជា មិនត្រឹមតែចេះក្បាច់គុននោះទេថែមទាំងស្អាតសង្ហាទៀតផង។

ទិដ្ឋភាពកាត់សក់ព្រឹកមិញ

រំលឹកដែរថា សហព័ន្ធតេក្វាន់ដូ ITF កម្ពុជា នឹងត្រូវហោះទៅប្រទេសប៊ុលហ្គារី ថ្ងៃទី២២ ខែសីហា ២០១៩ ដើម្បីចូលរួមប្រកួតជ្រើសរើសជើងឯកពិភពលោកលើកទី២១។ ក្នុងនោះដែរក៏មានការជួយឧបត្ថម្ភពីក្រសួងអប់រំ យុវជន និងកីឡា CAMSOK ក្រុមហ៊ុនឯកជន និងហាងកាត់សក់ខ្មែរអង្គរខាងលើនេះដែរ៕