ក្ដៅៗ! David Moyes ក្លាយជាគ្រូថ្មីនៃក្រុមមួយនៅ La Liga

2014-11-11 15:19:02
បាល់ទាត់

2014-11-11 15:19:02
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតអ្នកចាត់ការក្រុមបិសាចក្រហម Manchester United លោក David Moyes ដែលធ្លាប់ត្រូវបានគេបាញ់មិនសំចៃដៃពេញអ៊ិនធើណិតកន្លងមកនោះ ពេលនេះអាចរកទ្រនំថ្មីឃើញហើយ គឺ Real Sociedad។

ក្លិបនៅក្របខណ្ឌកំពូល La Liga របស់អេស្ប៉ាញមួយនេះ បានប្រកាសជាផ្លូវការ តែងតាំង Moyes ជាអ្នកចាត់ការថ្មី ជំនួសលោក Jagoba Arrasate ដែលត្រូវបានបណ្ដេញចេញ ក្រោយដឹកនាំមិនបានល្អសោះនាដើមរដូវកាលនេះ ពោលគឺកំពុងស្ថិតនៅលេខរៀងទី១៥ La Liga។

នេះជាការងារដំបូងហើយសម្រាប់ Moyes គិតចាប់តាំងពីត្រូវបណ្ដេញចេញពីតំណែងអ្នកចាត់ការ Man Utd ក្រោយដឹកនាំបានត្រឹម១០ខែ។ អ្នកចាត់ការសញ្ជាតិស្កុតឡែន វ័យ៥១ឆ្នាំរូបនេះ នឹងត្រូវដឹកនាំ Sociedad រហូតដល់ខែមិថុនា ឆ្នាំ២០១៦ ខណៈប្រកួតដែលលោកដឹកនាំដំបូង គឺពេលប៉ះ Deportivo នៅថ្ងៃទី២២ វិច្ឆិកាខាងមុខ។

នៅក្នុងគេហទំព័រផ្លូវការរបស់ខ្លួន ក្លិប Real Sociedad បានសរសេរថា៖ "ក្លិបបានយល់ព្រមលើកិច្ចព្រមព្រៀងជាមួយ David Moyes ជាផ្លូវការហើយ។ ព័ត៌មានលម្អិតនឹងត្រូវបង្ហាញនៅក្នុងពិធីបង្ហាញមុខអ្នកចាត់ការថ្មីរូបនេះ នៅព្រឹកថ្ងៃអង្គារនេះ (ត្រូវនឹងរសៀលនៅកម្ពុជា)”។

Real Sociedad បង្ហោះរូបនេះនៅលើ Twitter របស់ខ្លួន

Moyes ធ្លាប់ដឹកនាំក្រុម Preston North End (១៩៩៨-២០០២), Everton (២០០២-២០១៣) មុនចូលជំនួសតំណែង Sir Alex Ferguson នៅ Old Trafford នាដើមរដូវកាល ២០១៣-២០១៤ ប៉ុន្តែត្រូវបណ្ដេញចេញ ក្រោយបិសាចក្រហមបានត្រឹមលេខ៧នារដូវកាលនោះ។

ចាំមើល៍ Moyes អាចស្ដារមុខមាត់របស់ខ្លួនវិញបានដែរឬទេ?

ចុចអាន៖ កូនប្រុស Beckham ទៅលេងឱ្យ Arsenal 

ដោយ៖ សុខ សុវត្ថិ

ប្រភព៖ bbc