- 2017-01-12 23:01:00
- បាល់ទាត់
កត្តាសាមញ្ញ៥យ៉ាងនេះធ្វើឲ្យអ្នកមើលបាល់ទាត់មិនជិនណាយ?
- 2017-01-12 23:01:00
- ចំនួនមតិ 0 | ចំនួនចែករំលែក 0
កត្តាសាមញ្ញ៥យ៉ាងនេះធ្វើឲ្យអ្នកមើលបាល់ទាត់មិនជិនណាយ?
ចន្លោះមិនឃើញ
ការមើលបាល់ទាត់ជាផ្នែកមួយដ៏សំខាន់ដើម្បីជួយធ្វើឲ្យអ្នកមានអារម្មណ៍សប្បាយស្រស់ស្រាយ ប៉ុន្តែក៏មានមនុស្សមួយចំនួនមិនចូលចិត្តមើលបាល់ទាត់ដែរ។ អ្នកខ្លះទៅមើលបាល់ដើម្បីគាំទ្រដល់ជម្រើសជាតិរបស់ខ្លួន។ អ្នកខ្លះទៅមើលដើម្បីគាំទ្រដល់ក្រុមដែលខ្លួនស្រលាញ់ពេញចិត្ត។ អ្នកខ្លះទៅមើលដោយសារមាន Idol របស់ខ្លួនប្រចាំក្រុម។
លើសពីនេះទៀត អ្នកខ្លះទៅមើលដោយសារតែមិត្តភក្តិអូសទាញ ឬទៅអង្គុយកម្សាន្តជាមួយដៃគូដោយមិនខ្វល់ពីបាល់ទាត់នៅលើទីលានឡើយ។ ទន្ទឹមជាមួយគ្នានេះ អ្នកខ្លះមើលបាល់រហូតដល់ងងុយដេក ឬ ពេលខ្លះមើលបានតែរយៈពេលខ្លីក៏ចេញទៅក្រៅបាត់។ Sabay សូមទាញគន្លឹះ៥យ៉ាងខាងក្រោមនេះដែលអ្នកទស្សនាមើលបាល់មិនជិនណាយ។
ស្គាល់ក្រុមបាល់ទាត់មួយច្បាស់៖ ពេលអ្នកស្គាល់ក្រុមបាល់ទាត់មួយច្បាស់លាស់ អ្នកប្រាកដជាគាំទ្រ និងលើកទឹកចិត្តដល់ក្រុមនោះតាមការទៅទស្សនាផ្ទាល់ ឬធ្វើសកម្មភាពផ្សេងៗ។ អ្នកនឹងតាមដានទស្សនាស្ទើរមិនដាច់មួយនាទីណាឡើយពេលពួកគេប្រកួត និងចង់ឲ្យក្រុមនោះទទួលបានជ័យជម្នះរហូត។
ស្គាល់កីឡាករក្នុងក្រុម៖ រឹតតែធ្វើឲ្យអ្នកគាំទ្រ និងចង់ទស្សនាខ្លាំងទៀតនោះគឺនៅពេលអ្នកស្គាល់សមាជិកខ្លះៗក្នុងក្រុមបាល់ទាត់នោះដូចជា អ្នកចាំទី ខ្សែប្រយុទ្ធ ខ្សែការពារជាដើម។ ពេលកីឡាករណាម្នាក់បង្ហាញទម្រង់លេងល្អ ឬសកម្មភាពគួរឲ្យគោរព កាន់តែធ្វើឲ្យអ្នកសរសើរ និងពេញចិត្តទស្សនាខ្លាំងឡើង។
មាន Idol នៅក្នុងក្រុម៖ ជារឿយៗ ប្រសិនបើអ្នកគាំទ្រដល់ក្រុមណាមួយមិនថា ក្រុមឯកជន ឬជម្រើសជាតិឡើយ អ្នកតែងតែមាន Idol ក្នុងចិត្តជាមិនខាន់។ ឧទាហរណ៍៖ ប្រសិនបើអ្នកជា Fan របស់ក្លឹបបឹងកេតអង្គរ អ្នកប្រាកដជាមានកីឡាករណាម្នាក់ជានិម្មិតជាមិនខាន។
ស្គាល់គ្រូបង្វឹកប្រចាំក្រុម៖ មិនត្រឹមតែកីឡាករប៉ុណ្ណោះទេដែលទាក់ទាញចំណាប់អារម្មណ៍របស់អ្នកឲ្យទស្សនា សូម្បីតែគ្រូបង្វឹកប្រចាំក្រុមក៏ជាផ្នែកធ្វើឲ្យអ្នកចូលចិត្តមើលបាល់ទាត់ដែរ។ ជាក់ស្តែង ប្រសិនបើអ្នកជា Fan របស់ក្រុមតោខៀវ Chelsea របស់អង់គ្លេស អ្នកប្រាកដជាស្គាល់គ្រូបង្វឹករបស់ក្រុមនោះដែរ និងដឹងពីទម្លាប់សកម្មភាពនៅលើទីលានរបស់គាត់ថែមទៀត។
ដឹងពីរបៀបលេងលើទីលាន៖ មែនទែនទៅ អ្នកគាំទ្រមួយចំនួន ជាពិសេសអ្នកដែលទៅមើលបាល់ទាត់តាមរយៈមិត្តភក្តិអូសទាញ ឬអ្នកមិនចាប់អារម្មណ៍នឹងបាល់ទាត់គឺមិនសូវដឹងពីរបៀបលេងបាល់លើទីលានឡើយ។ អ្នកខ្លះសូម្បីតែកីឡាករប៉ុន្មាននាក់លេងនៅលើទីលានក៏មិនដឹងផង ដូច្នេះអ្នកនោះច្បាស់ជាធុញទ្រាំ ឬមិនមើលឡើយ។ ប៉ុន្តែប្រសិនបើអ្នកស្គាល់ពីរបៀបលេងនៅលើទីលានដូចជា អ្វីទៅជាបាល់ក្រៅជំហរល្បែង (Off Side)ជាដើម អ្នកប្រាកដជាចូលចិត្តមើលបាល់ខ្លះមិនខាន បើទោះជាអ្នកគ្មានតារាឆ្នើមប្រចាំដួងចិត្តក៏ដោយ។
ចំណុចសាមញ្ញខាងលើនេះគឺគ្រាន់ជាទស្សនៈរបស់អ្នកសរសេរតែប៉ុណ្ណោះ ហើយក៏មិនប្រាកដថា ត្រូវទាំងស្រុងនោះដែរ។ Sabay ជឿជាក់ថា អ្នកទស្សនាប្រាកដជាចំណុចផ្សេងច្រើនទៀតដែលធ្វើឲ្យអ្នកពេញចិត្តមើលបាល់ទាត់។ បើមានចំណុចក្រៅពីកត្តាខាងលើ សូមបង្ហាញឲ្យមិត្តភ័ក្តិបានដឹងផង៕
