សាលាដំរីពួនកាន់តែមានពន្លឺក្នុងការបង្កើតទីលានបាល់ទាត់ផ្ទាល់ខ្លួន

2016-10-17 21:46:52
បាល់ទាត់

2016-10-17 21:46:52
ចំនួនមតិ 0 | ចំនួនចែករំលែក 0

ចន្លោះមិនឃើញ

សាលាដំរីពួនស្ថិតនៅស្រុកស្វាយអន្ទរ ខេត្តព្រៃវែង កាន់តែមានពន្លឺឆ្ពោះទៅរកការបង្កើតទីលានបាល់ទាត់ផ្ទាល់ខ្លួនហើយ បន្ទាប់ពីក្រុមការងារមូលនិធិសង្គម និងអាហារូបករណ៍នៃអង្គភាពអគ្គិសនីកម្ពុជាដឹកនាំដោយលោក លឹម ជំនិត និងសហការី៣រូប បានចុះទៅពិនិត្យមើលទីធ្លាមួយកន្លែងស្ថិតនៅក្នុងបរិវេណអនុវិទ្យាល័យដំរីពួនកាលពីថ្ងៃទី១៤ ខែតុលា ឆ្នាំ២០១៦កន្លងទៅនេះដើម្បីពិភាក្សាជាមួយលោកមេឃុំ និងគណៈគ្រប់គ្រងសាលា ដែលបានដាក់សំណើស្នើសុំថវិកា ដើម្បីសាងសង់ទីលានបាល់ទាត់ថ្មីមួយកន្លែង។

លោក ឡាំ សុង នាយកសាលាបានឲ្យដឹងថា សាលាមានផ្ទៃទំហំ ៤៦៧៨៧ម៉ែត្រការ៉េ ស្ថិតនៅភូមិចំការគួយលិច ឃុំដំរីពួន ស្រុកស្វាយអន្ទរ ខេត្តព្រៃវែង កកើតដំបូងនៅឆ្នាំ១៩៨៩។ សិស្សចូលចិត្តលេងកីឡាបាល់ទាត់ច្រើន ហើយសាលានៅពុំទាន់មានទីលានកីឡាបាល់ទាត់ ហើយបច្ចុប្បន្នសិស្សសាលាទៅលេងនៅតាមវាលស្រែជុំវិញសាលាដែលមានស្ថានភាពរដិបរដុបពិបាករត់។

ក្រុមការងារ EDC និងសាលាដំរីពូន

ម្យ៉ាងទៀតសាលាមិនមានកញ្ចប់ថវិកាសាងសង់ទីលានបាល់ទាត់ទេ ដូច្នេះហើយលោកនាយកក៏បានសហការជាមួយសហគមន៍កីឡាស្រុកស្វាយអន្ទរ ដើម្បីអំពាវនាវស្វះស្វែងរកជំនួយថវិកា ឬសម្ភារៈកីឡា សម្រាប់យកទៅសាងសង់ទីលានបាល់ទាត់នោះ ដើម្បីអាចឲ្យសិស្សសាលាបានលេងកីឡាបាល់ទាត់ផង និងរួមចំណែកលើកស្ទួយក្នុងវិស័យកីឡាបាល់ទាត់ប្រទេសកម្ពុជាផង។

លោកបានជូនដំណើរក្រុមការងារទៅពិនិត្យស្ថានភាពដីស្រែដែលស្នើសុំធ្វើទីលានបាល់ទាត់នោះមានទំហំ១.៦ហិតា។ បច្ចុប្បន្នសាលាបានជួលដីនោះទៅឲ្យប្រជាជនធ្វើស្រែ តែក្រោយពីប្រមូលផលស្រូវនៅដើមខែធ្នូ ឆ្នាំ២០១៦ រួចហើយគាត់នឹងយកដីនោះមកធ្វើជាទីលានបាល់ទាត់វិញ។ លោកបញ្ជាក់ថា ទីលានបាល់ទាត់ដែលគ្រោងនឹងសាងសង់ថ្មីនោះមានបណ្តោយ១១០ម៉ែត្រ ទទឹង៨៥ម៉ែត្រ និងគ្រោងចំណាយថវិកា ៤២២០០០០រៀល។

ចំណែកឯលោក នួន សុភី មេឃុំដំរីពួនបានឲ្យដឹងថា ទីធ្លាដែលសាលាគ្រោងសាងសង់ជាទីលានបាល់ទាត់នោះមិនមែនជាដីរបស់សហគមន៍ មិនមែនជាដីរបស់ប្រជាពលរដ្ឋ ឬក៏មានបញ្ហាពាក់ព័ន្ធណាមួយនោះទេ គឺជាកម្មសិទ្ធិរបស់សាលារៀនពិតប្រាកដមែន ប៉ុន្តែសាលារៀនមិនទាន់មានរបងព័ទ្ធជុំវិញនៅឡើយទេ។

ក្រុមការងារ EDC និងសាលាដំរីពូន

លោកមេឃុំបន្តថា លោកនាយកសាលា រូបលោក និងក្រុមប្រឹក្សាឃុំនឹងពិភាក្សាគ្នា ប្រារព្វធ្វើបុណ្យផ្កាមួយ ដើម្បីកសាងរបងសាលារៀននេះ ដែលមានប្រវែងប្រហែល១០០០ម៉ែត្រ និងហេដ្ឋារចនាសម្ព័ន្ធក្នុងបរិវេណសាលាផងដែរ ហើយលៃឲ្យចំថ្ងៃសម្ពោធទីលានបាល់ទាត់តែម្តង។

ក្រោយពីបានរួមដំណើរចុះទៅពិនិត្យមើលទីធ្លា និងស្តាប់ការលើកឡើងរបស់លោកមេឃុំ និងលោកនាយកសាលារួចមក លោក លឹម ជំនិត ប្រធានការិយាល័យមូលនិធិសង្គម និងអាហារូបករណ៍ បានធ្វើកំណត់ហេតុដោយមានការចុះហត្ថលេខារួមគ្នារវាងមូលនិធិនៃអគ្គិសនីកម្ពុជា លោកមេឃុំ លោកនាយកសាលា និងសហគមន៍កីឡាស្រុក។ លោកនឹងយកកំណត់ហេតុនេះដាក់ជូនលោកប្រធានអាជ្ញាធរអគ្គិសនីកម្ពុជាដើម្បីសម្រេច។ លោកនឹងជម្រាបជូនពីលទ្ធផលនៅខែក្រោយ៕