- 2016-09-19 21:15:09
- បាល់ទាត់
ឈ្វេងយល់ពីវិស័យកីឡានៅស្រុកពោធិ៍រៀងខេត្តព្រៃវែង
- 2016-09-19 21:15:09
- ចំនួនមតិ 0 | ចំនួនចែករំលែក 0
ឈ្វេងយល់ពីវិស័យកីឡានៅស្រុកពោធិ៍រៀងខេត្តព្រៃវែង
ចន្លោះមិនឃើញ
ស្រុកពោធិ៍រៀងទើបតែត្រូវបានប្តូរឈ្មោះពីឈ្មោះស្រុកកំពង់លាវតាមអនុក្រឹត្យលេខ ១៧២អនក្របក នៅថ្ងៃទី ២៥ កក្កដា ២០១១ មានភូមិ៣៩ ឃុំ៧ ពាក់ព័ន្ធនឹងវិស័យអប់រំ។ ស្រុកមានសាលារៀន៣១កន្លែង វិទ្យាល័យ១ អនុវិទ្យាល័យ៦ បឋមសិក្សា២៤។ ឆ្នាំសិក្សា២០១៦-២០១៧ខាងមុខ ស្រុកនឹងមានសិស្សថ្នាក់ទី១២ ជំនាន់ទី១។
លោក ហឿង សំហេន ប្រធានការិយាល័យអប់រំ យុវជន និងកីឡាស្រុកពោធិ៍រៀងបានរៀបរាប់ថា ទីលានកីឡាគឺគ្រប់សាលាមធ្យមសិក្សាទាំង៧ មានទីធ្លាអាចបង្កើតជាតារាងកីឡាបាន ប៉ុន្តែមិនទាន់មានលទ្ធភាពសាងសង់ឡើយ។ ឆ្នាំសិក្សា២០១៤-២០១៥ អាជ្ញាធរ សហគមន៍ និងគណៈកម្មការទ្រទ្រង់សាលារួមថវិកាគ្នាបានជាង២០លានរៀល ដើម្បីចាក់ដីកែលម្អបរិស្ថានត្រៀមសាងសង់សមិទ្ធផលនានាក្នុងនោះកំពុងរៀបចំទៅជាតារាងបាល់ទាត់មានបណ្តោយ១០០ម៉ែត្រ និងទទឹង៥០ម៉ែត្រ។ បច្ចុប្បន្នកំពុងសាងសង់អគារសិក្សាមួយខ្នងពីរជាន់មាន១០បន្ទប់ ជាអំណោយលោក ស ខេង រដ្ឋមន្ត្រីក្រសួងមហាផ្ទៃ។ តាមការសិក្សាពីប្លង់មេនៃសាលារៀន អនាគតអាចនឹងស្ថាបនាអគារសិក្សា២ខ្នង តារាងបាល់បោះ អគារទីចាត់ការ។
ចំណែកលោក ហេង ឈាងលី នាយកវិទ្យាល័យពោធិ៍រៀងបានឲ្យដឹងថា សាលាមានផ្ទៃដីចំនួន១៥ ២២៣ម៉ែត្រក្រឡា មានអគារមួយខ្នង មានតារាងបាល់បោះមួយកន្លែងសាងសង់នៅឆ្នាំ២០០៨ តារាងបាល់ទះមួយកន្លែង និងតារាងបាល់ទាត់ខ្នាតតូច។ ទៅអនាគតសាលានឹងមានគម្រោងសាងសង់ទីលានលោតកម្ពស់ លោតចម្ងាយ ចោលដុំដែក កន្លែងឡើងខ្សែពួរ តារាងបាល់ទះ។ ចំណែកប្រភេទកីឡាថ្មីពីរ គឺប៉េតង់ និងវាកូនឃ្លីលើតុ លោកនឹងបង្កើតឲ្យមានជារូបរាងសិន ដោយមិនគិតថាខ្លាំង ឬខ្សោយនោះទេ សំខាន់បង្កើតតាមការដាក់បញ្ចូលរបស់ក្រសួងអប់រំ យុវជន និងកីឡាទៅក្នុងប្រភេទកីឡាសិស្ស។
លោកសង្កត់ធ្ងន់ថា សាលារៀនមិនទាន់មានគ្រូឯកទេសអប់រំកាយ និងកីឡានៅឡើយទេ។ ឯកសណ្ឋានកីឡា និងសម្ភារៈហ្វឹកហាត់ក៏នៅខ្វះខាត ហើយបញ្ហាចោទជាចម្បងនោះគឺ ថវិកាដែលត្រូវចំណាយមានមិនគ្រប់គ្រាន់។ បញ្ហាខ្វះគ្រូកីឡា សាលាបានដាក់សំណើតាមរយៈមន្ទីរអប់រំ យុវជន និងកីឡាខេត្តព្រៃវែងទៅក្រសួងអប់រំហើយ ហើយនាយករងទទួលបន្ទុកកីឡា គឺលោក នាង អ៊ុន ជាគ្រូឯកទេសគណិតវិទ្យា និងរូបវិទ្យា។
លោក ឈាងលីរៀបរាប់ទៀតថា វិស័យកីឡានៅសាលារៀននេះនៅមានកម្រិត ដោយខ្វះខាតគ្រូកីឡាលោកស្ម័គ្រចិត្តបង្ហាត់តាមសមត្ថភាព និងរកអ្នកចេះលេងកីឡាពីខាងក្រៅមកជួយបង្ហាត់បន្ថែម។ ឆ្នាំសិក្សា២០១៥-២០១៦ ក្រុមបាល់ទាត់នារីប្រចាំវិទ្យាល័យទទួលបានចំណាត់ថ្នាក់លេខ៣ កម្មវិធីកីឡាសិស្សមធ្យមសិក្សាទូទាំងខេត្តព្រៃវែង។ ចំពោះក្រុមកីឡាបាល់ទះកុមារីបានចំណាត់ថ្នាក់លេខ១ទូទាំងខេត្ត។ កាលពីឆ្នាំសិក្សា២០១២-២០១៣កន្លងមក មានសិស្សនារីម្នាក់ប្រកួតវិញ្ញាសាលោតកម្ពស់ ដណ្តើមបានចំណាត់ថ្នាក់លេខ១កីឡាសិស្សទូទាំងខេត្ត លេខ១កីឡាសិស្សទូទាំងប្រទេស លេខ២កីឡាភូមិភាគ និងលេខ៣កីឡាមហាជន។
លោកប្រធានការិយាល័យអប់រំស្រុកចាប់អារម្មណ៍ថា ក្នុងពេលបច្ចុប្បន្ននេះទាំងមនុស្សវ័យចំណាស់ និងវ័យក្មេងបានងាកមកហាត់ប្រាណ និងលេងកីឡាគួរឲ្យភ្ញាក់ផ្អើលក្នុងរយៈពេលពីរឆ្នាំចុងក្រោយនេះ។ លោកថា ពលរដ្ឋខ្មែរចេះស្រលាញ់សុខភាព ចង់បានកម្លាំងមាំមួន និងដើម្បីចៀសឆ្ងាយពីគ្រឿងញៀន។
ឯលោកនាយកសាលាវិញ ក៏បានសំណូមពរទៅក្រសួងអប់រំ សូមជួយផ្តល់គ្រូអប់រំកាយ និងកីឡាពីររូបដល់សាលារៀនរបស់លោក និងសូមអំពាវនាវដល់ក្រុមហ៊ុន សប្បុរសជន និងសហគមន៍ មេត្តាជួយចាក់ដីបំពេញទីធ្លាសាលា ដែលតាមគម្រោង គឺត្រូវចាក់ដីចំនួន១០០០ឡាន ដីមួយឡានតម្លៃ២៥០០០រៀល ស្មើនឹង២៥០០០០០០រៀល។ គម្រោងសាងសង់របងសាលាមានប្រវែង៣៥៦ម៉ែត្រ បន្ទប់អនាម័យមួយកន្លែងមាន៤បង្គន់សម្រាប់សិស្សនារី និងសូមជួយឧបត្ថម្ភជាឯកសណ្ឋាន និងសម្ភារៈហ្វឹកហត់ដល់សាលារៀនលោកតាមលទ្ធភាព៕
អត្ថបទ៖ សោម សារិទ្ធ
