U16 ថៃ ឈ្នះ U16 ប៊្រុយណេ តែ១-០ ខណៈ U16 ឡាវ ស្មើ ទីម័រខាងកើត ១-១

2016-07-16 03:53:01
បាល់ទាត់

2016-07-16 03:53:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់ជម្រើសជាតិថៃអាយុក្រោម១៦ឆ្នាំបានយកឈ្នះក្រុមក្រុមបាល់ទាត់ជម្រើសជាតិប៊្រុយណេអាយុក្រោម១៦ឆ្នាំដោយលទ្ធផលតែ ១-០ ប៉ុណ្ណោះ ខណៈក្រុមយុវជនឡាវ បានត្រឹមស្មើ១-១ នឹងក្រុមយុវជនទីម័រខាងកើតសម្រាប់ការប្រកួតពានរង្វាន់ AFF U16 Championship 2016 នៅក្នុងពូល B ដែលលទ្ធផលនេះកាន់តែមានអំណោយផលល្អដល់យុវជនកម្ពុជា។

ការប្រកួតនៅតង់ទីមួយ ក្រុម U16 ថៃអាចរកគ្រាប់បាល់បានតែ១គ្រាប់ប៉ុណ្ណោះដោយប្រធានក្រុម Arnon Prasongporn នៅនាទីទី២០។ ចំពោះក្រុម U16 ប៊្រុយណេ មិនមានឱកាសទម្លាយសំណាញ់ទីរបស់ថៃឡើយ ដោយបានត្រឹមតែការពារច្រើនជាងប្រយុទ្ធ ខណៈក្រុមយុវជនថៃបានព្យាយាមវាយសម្រុកខ្លាំង។ ចំពោះការប្រកួតតង់ទីពីរ ក្រុមទាំងពីរមិនអាចរកគ្រាប់បាល់ទម្លាយសំណាញ់ទីគ្នាបានឡើយ។១

ការប្រកួតនៅម៉ោង៦:៣០នាទីល្ងាច ក្រុមយុវជនជម្រើសជាតិឡាវបានត្រឹមស្មើក្រុមយុវជនជម្រើសជាតិទីម័រខាងកើតដោយលទ្ធផល ១-១។ មួយគ្រាប់របស់ទីម័របានកើតមានឡើងដោយសារជាការធ្វើឲ្យចូលទីខ្លួនឯងរបស់កីឡាករឡាវ Keodouangdet នៅនាទីទី២៤ នៅតង់ទីមួយ ប៉ុន្តែកីឡាកររបស់ឡាវ Boungkong បានស៊ុតចូលទីរបស់ទីម័រដើម្បីតាមស្មើនៅនាទីទី៨៥ដែលលទ្ធផលនេះរក្សារហូតដល់ចប់ការប្រកួត។

លទ្ធផលទាំងពីរគូថ្ងៃនេះបានធ្វើឲ្យកម្ពុជានៅតែឈរលើកំពូលតារាងពូល B ដោយមាន៦ពិន្ទុស្មើនឹងក្រុមយុវជនថៃ។ អ្វីដែលកាន់តែអំណោយផលសម្រាប់យុវជនកម្ពុជាឡើងទៅវគ្គពាក់កណ្តាលផ្តាច់ព្រ័ត្រនោះគឺ ក្រុមទីម័រខាងកើតបានត្រឹមស្មើឡាវដែលសម្ពាធលើយុវជនកម្ពុជាកាន់តែធូរស្រាល ខណៈទីម័រនៅសល់តែមួយប្រកួតទៀតប៉ុណ្ណោះ ហើយកម្ពុជានៅសល់២ប្រកួត ហើយក្រុមឡាវទើបមាន១ពិន្ទុប៉ុណ្ណោះ។ ចំពោះក្រុមយុវជនប៊្រុយណេអស់ឱកាសឡើងវគ្គបន្តហើយ បន្ទាប់ពីចាញ់៣ប្រកួតជាប់គ្នា៕