- 2016-06-14 23:09:57
- បាល់ទាត់
បុរសម្នាក់ ចំណាយប្រាក់ផ្ទាល់ខ្លួនដើម្បីបង្កើតក្រុមបាល់ទាត់
- 2016-06-14 23:09:57
- ចំនួនមតិ 0 | ចំនួនចែករំលែក 0
បុរសម្នាក់ ចំណាយប្រាក់ផ្ទាល់ខ្លួនដើម្បីបង្កើតក្រុមបាល់ទាត់
ចន្លោះមិនឃើញ
លោក អ៊ុង ជាគង បានចំណាយប្រាក់ផ្ទាល់ខ្លួនដើម្បីរៀបចំការប្រកួតបាល់ទាត់រវាងវិទ្យាល័យពីរ គឺវិទ្យាល័យពោធិ៍អំពិល និងវិទ្យាល័យព្រៃទប់ នៅស្រុកទ្រាំង ខេត្តតាកែវ ដើម្បីស្វែងរកកីឡាករដែលមានទេពកោសល្យសម្រាប់បង្កើតក្រុមកីឡាបាល់ទាត់មួយដែលចូលរួមប្រកួតក្នុងពានរង្វាន់ផ្សេងៗនៅឆ្នាំក្រោយ។
លោក អ៊ុង ជាគង ជាអាជីវករម្នាក់បានប្រាប់ Sabay ថា ដោយសារទឹកចិត្តស្រលាញ់កីឡាខ្លាំងបានធ្វើឱ្យលោកចំណាយប្រាក់ផ្ទាល់ខ្លួនអស់ជាច្រើនដើម្បីទិញសំលៀកបំពាក់ ស្បែកជើង និងសម្ភារៈកីឡាផ្សេងទៀតដល់សិស្សនៅវិទ្យាល័យទាំងពីរខាងលើ ដោយរំពឹងថា នឹងបង្កើតបានក្រុមកីឡាបាល់ទាត់មួយ។
លោក ជាគង បានរៀបរាប់បន្តថា “ខ្ញុំបាននាំក្មេងៗដើរប្រកួតតាមភូមិដែលមានតារាងបាល់ទាត់តាមវាលស្រែក្នុងគោលបំណងជ្រើសរើសកីឡាករណាដែលលេងល្អដើម្បីបញ្ចូលក្នុងក្រុម យកពួកគេមកហ្វឹកហាត់”។ ពេលនេះលោករើសបានកីឡាករ ១៥នាក់ហើយនឹងបន្តរើសទៀតឲ្យគ្រប់២០នាក់។
ពាក់ព័ន្ធនឹងការបង្កើតក្លឹបបាល់ទាត់នេះដែរ លោក គង បញ្ជាក់ថា៖ “ខ្ញុំមិនរំពឹងថា ទទួលបានផលប្រយោជន៍អ្វីពីបាល់ទាត់ទេ គ្រាន់តែចង់ឲ្យក្មេងៗក្នុងមូលដ្ឋាននេះសប្បាយរីករាយលេងកីឡាដើម្បីឲ្យពួកគេចៀសឆ្ងាយពីគ្រឿងញៀន និងអំពើហិង្សាក្នុងសង្គម”។
ទោះជាយ៉ាងណា អាជីវកវ័យក្មេងរូបនេះត្អូញត្អែរពីការលំបាកអំពីទីលានហ្វឹកហាត់ដោយកន្លងមកលោកបាននាំកីឡាករទៅហ្វឹកហាត់នៅមាត់បឹង កុងស៊ីក្បាលពោធិ៏ ហើយពេលនេះលោកកំពុងសម្លឹងរកទីតាំងមួយទៀត។ លោកជាអតីតកីឡាករបាល់ទាត់ម្នាក់ក្នុងស្រុកទ្រាំង នៅទសវត្សឆ្នាំ ១៩៨០ តែលោកបានបោះបង់វិស័យបាល់ទាត់ច្រើនឆ្នាំមកហើយ៕
អត្ថបទ៖ ជិន វេន
