Klopp ព្រមានដល់ខ្សែប្រយុទ្ធទាំងពីរ Benteke & Sturridge

2015-12-28 17:55:17
បាល់ទាត់

2015-12-28 17:55:17
ចំនួនមតិ 0 | ចំនួនចែករំលែក 0

ចន្លោះមិនឃើញ

Jurgen Klopp អ្នកចាត់ការក្រុម Liverpool បានព្រមានដល់កូនក្រុមរបស់លោក ខ្សែប្រយុទ្ធទាំងពីរនាក់ Christian Benteke និង Daniel Sturridge ចំពោះទម្រង់លេងនិងបញ្ហារបួសកន្លងមក។

ខ្សែប្រយុទ្ធជម្រើសជាតិបែលហ្សិក Benteke បានដូរជំនួស Divock Origi និងស៊ុតចូលទីក្រុមកំពូលតារាង Leicester City ជួយឲ្យ Liverpool ឈ្នះ ១-០ កាលពីយប់ថ្ងៃសៅរ៍ ប៉ុន្តែអ្នកចាត់ការសញ្ជាតិអាល្លឺម៉ង់យល់ថា កីឡាកររូបនេះ ត្រូវតែខិតខំលេងឲ្យប្រសើរជាងនេះ ដើម្បីអាចជាប់ជម្រើស១១នាក់ដំបូងវិញ។

Klopp បាននិយាយថា៖"យើងត្រូវការគ្រាប់បាល់ពីគាត់ (Benteke) ហើយគាត់ពិតជាអ្នករកគ្រាប់បាល់ដ៏ល្អមែន។ ប៉ុន្តែខ្ញុំមិនមែនគិតតែពីការរកគ្រាប់ចូលទីរបស់គាត់ទេ ពោលគឺក្រុមរបស់យើងត្រូវការខ្សែប្រយុទ្ធ ដែលចូលរួមលេងសហការជាមួយមិត្តរួមក្រុម និងខិតខំយ៉ាងហោចណាស់បាន៨៩នាទី”។

រីឯខ្សែប្រយុទ្ធអង់គ្លេស Sturridge ដែលរបួសញឹកញាប់បំផុតនោះ បានចូលហ្វឹកហាត់វិញហើយ និងបានផ្ញើសារដល់អ្នកគាំទ្រថា ខ្លួនគេជិតនឹងចូលលេងបានឆាប់ៗវិញ។ ប៉ុន្តែ Klopp បានលើកឡើងថា កីឡាកររូបនេះ នឹងនៅហ្វឹកហាត់ក្រៅក្រុម រហូតទាល់តែលោកសម្រេចចិត្តថា គួរដាក់ឲ្យលេង ឬអត់សិន។

“ខ្ញុំគិតថា នេះជាអ្វីៗដែល Sturridge ធ្លាប់និយាយតាំងពី៤សប្ដាហ៍មុនមកម្ល៉េះ ហើយពេលយើងដាក់ឲ្យគាត់លេង គាត់នឹងរបួសទៀត។ គាត់តែងតែនិយាយដូចនេះ...ពេលអ្នកសួរគាត់ថា គាត់មានអារម្មណ៍ប្រសើរឡើងនៅ? គាត់នឹងឆ្លើយថាល្អ ប៉ុន្តែគាត់ត្រូវតែហ្វឹកហាត់ទៀត ហើយយើងនឹងត្រូវរង់ចាំមើលស្ថានភាពបន្ត”។ អតីតអ្នកចាត់ការក្រុម Borussia Dortmund បញ្ជាក់បន្ថែម៕

-ចុចអាន៖ រឿង៧យ៉ាង ដែល Klopp គួរផ្លាស់ប្ដូរនៅ Liverpool ដើម្បីបាន Top 4

ប្រែសម្រួល៖ វិន ជីវ័ន្ត ប្រភព៖ mirror