ក្រុម​យក្ស​អេស្ប៉ាញ​ Real Madrid បាន​យក​ឈ្នះ​ក្រុម​ Getafe ក្នុង​ផ្ទះ​របស់​ខ្លួន​ដោយ​លទ្ធផល​ ៤-១ ប៉ុន្តែ​ក្រុម​ខ្លាំង​ Barcelona បាន​ត្រឹម​ស្មើ​ Valencia ដោយ​លទ្ធផល ១-១ ក្នុង​ការ​ប្រកួត​សប្តាហ៍​ទី​១៤​នៃ​លីក​បាល់ទាត់​អេស្ប៉ាញ​ Liga BBVA។

  ៤​គ្រាប់​របស់​ Real Madrid កាល​ពី​យប់​មិញ​ធ្វើ​បាន​សម្រេច​នៅ​តង់​ទី​មួយ​ទាំង​អស់​​ដោយ​ខ្សែ​ប្រយុទ្ធ​ Karim Benzema ២​គ្រាប់​​នាទី​ទី​៤ និង​១៦​ គ្រាប់​ទី​៣​ដោយ​​ Gareth Bale នៅ​នាទី​ទី​៣៥ ហើយ​គ្រាប់​ទី​៤​ដោយ​តារា​ឆ្នើម​ Cristiano Ronaldo នៅ​នាទី​ទី​៣៥​ ខណៈ​១​គ្រាប់​របស់​ Getafe រក​បាន​នៅ​តង់​ទី​១​ដោយ​ Alexis នៅ​នាទី​ទី​៧០។

​ ងាក​ទៅ​ក្រុម​ខ្លាំង​ Barcelona វិញ​ក្នុង​សប្តាហ៍​នេះ​រក​បាន​តែ​១​ពិន្ទុ​ប៉ុណ្ណោះ​ បន្ទាប់​ពី​ស្មើ​នឹង​ក្រុម​ Valencia ដោយ​គ្រាប់​បាល់​១-១។ មួយ​គ្រាប់​របស់​ក្រុម​អ្នក​បុណ្យ​ធ្វើ​បាន​សម្រេច​ដោយ​ខ្សែ​ប្រយុទ្ធ​ Luis Suarez នៅ​នាទី​ទី​៥៩ នៃ​តង់​ទី​ពីរ​ ខណៈ​មួយ​គ្រាប់​របស់​ Valencia រក​បាន​ដោយ​ Santi Mina នៅ​នាទី​ទី​៨៦។

  លទ្ធផល​​៣​ពិន្ទុ​របស់​ Real Madrid បាន​ធ្វើ​ឲ្យ​កាត់​បន្ថយ​ពិន្ទុ​នាំ​មុខ​របស់​ Barcelona​ ត្រឹម​តែ​៤​ពិន្ទុ​ប៉ុណ្ណោះ​ និង​នាំ​មុខ​ក្រុម​លេខ​ពីរ​ Atletico Madrid តែ​២​ពិន្ទុ​ប៉ុណ្ណោះ​គិត​ត្រឹម​សប្តាហ៍​ទី​១៤​នេះ៕

ប្រែ​សម្រួល៖ ជាន ចាន់រ៉ា​​ ​ប្រភព៖ Dailymail​