- 2015-12-04 21:48:02
- បាល់ទាត់
ទ័ពគ្រោងតកុងត្រា Tatsuta និងនាំជម្រើសជាតិកូរ៉េខាងត្បូងU23 ចំនួន៣នាក់សម្រាប់លីកថ្មី
- 2015-12-04 21:48:02
- ចំនួនមតិ 0 | ចំនួនចែករំលែក 0
ទ័ពគ្រោងតកុងត្រា Tatsuta និងនាំជម្រើសជាតិកូរ៉េខាងត្បូងU23 ចំនួន៣នាក់សម្រាប់លីកថ្មី
ចន្លោះមិនឃើញ
ក្រុមបាល់ទាត់ក្រសួងការពារជាតិ(ទ័ព) នឹងបន្តកុងត្រាជាមួយកីឡាករជប៉ុន Tasuta Kazuki ដែលបឹងកេតកំពុងខ្ចីជើង និងកំពុងរៀបចំនាំយកកីឡាករបរទេសជម្រើសជាតិកូរ៉េខាងត្បូងក្រោមអាយុ២៣ ឆ្នាំ(U-២៣) ចំនួន ៣នាក់ថែមទៀតដើម្បីពង្រឹងក្រុមសម្រាប់ត្រៀមខ្លួននៅរដូវកាលថ្មីនៃលីកកំពូលរបស់កម្ពុជាឆ្នាំ២០១៦ នាពេលខាងមុខនេះ។
តាមការឲ្យដឹងពីលោក ទេព ឡុងរចនា គ្រូបង្គោលក្លិបក្រសួងការពារជាតិបានប្រាប់ថា កីឡាករជប៉ុន Tasuta Kazuki ដែលបឹងកេតកំពុងខ្ចីជើង និងបានបង្ហាញទម្រង់លេងយ៉ាងល្អជួយក្រុមរបស់កម្ពុជាឈ្នះ Yangon United របស់មីយ៉ាន់ម៉ា ៣-០កាលពីពេលកន្លងទៅនោះ លោកនឹងបន្តកុងត្រាសម្រាប់លេងនៅឆ្នាំ២០១៦បន្ថែមទៀត។ ក្រោយពេលកីឡាករជប៉ុនត្រឡប់មកពីជួយបឹងកេតប្រកួតពានរង្វាន់ Toyota Mekong Club Championship 2015 ក្នុងលក្ខណខ្ចីជើងវិញ។ ទ័ពនឹងរៀបចំតកុងត្រាភ្លាម បើទោះបឹងកេតចង់បានកីឡាកររូបនេះក៏ក្រុមរបស់លោកមិនព្រមលក់ឡើយ។
គ្រូបង្គោលរូបនេះបន្តថា សម្រាប់រដូវកាល ២០១៦ ក្រុមរបស់លោកកំពុងរៀបចំឯកសារនាំយកកីឡាករកូរ៉េខាងត្បូង ដែលលេងក្នុងក្រុមជម្រើសជាតិក្រោមអាយុ ២៣ឆ្នាំចំនួន៣នាក់បន្ថែមទៀតក្នុងគោលបំណងប្រជែងយកជើងឯកសម្រាប់រដូវកាលថ្មី។ បច្ចុប្បន្នទ័ពកំពុងត្រួតពិនិត្យឯកសារ និងវីដេអូប្រកួតលើទីលានកន្លងមករបស់កីឡាករបរទេសកូរ៉េខាងត្បូងចំនួន៦នាក់ ប៉ុន្តែនឹងចុចយកចុងក្រោយតែ៣នាក់ដែលល្អបំផុតក្នុងចំណោមនោះ។
កីឡាករបរទេសកូរ៉េខាងត្បូងរបស់ទ័ព នឹងមកដល់ទឹកដីកម្ពុជានាចុងខែធ្នូ ឆ្នាំ២០១៥ ដើម្បីហ្វឹកហាត់សមជើងជាមួយកូនក្រុមរបស់លោកនៅស្តាតចាស់ ត្រៀមលីកកំពូលរបស់កម្ពុជា នឹងមកដល់ខែកុម្ភៈ ឆ្នាំ២០១៦ ខាងមុខនេះ។ កីឡាករ Tasuta Kazuki បានមកលេងឲ្យក្លិបក្រសួងការពារជាតិកាលរដូវកាល ២០១៥ និងបានជួយក្រុមរបស់លោក ឡុងរចនា ទទួលបានចំណាត់ថ្នាក់លេខ ៥ នៃលីកកំពូលរបស់កម្ពុជា៕
អត្ថបទ៖ ស្រី សុវណ្ណដារ៉ា
