- 2015-11-12 14:00:36
- បាល់ទាត់
កម្ពុជាអាចសងសឹកអាហ្វហ្គានីស្ថានបានទេយប់នេះ?
- 2015-11-12 14:00:36
- ចំនួនមតិ 0 | ចំនួនចែករំលែក 0
កម្ពុជាអាចសងសឹកអាហ្វហ្គានីស្ថានបានទេយប់នេះ?
ចន្លោះមិនឃើញ
ក្រុមបាល់ទាត់ជម្រើសជាតិកម្ពុជានឹងត្រូវប្រកួតជើងទី២ ជាមួយក្រុមអាហ្វហ្គានីស្ថានក្នុងជំនួបជម្រុះបាល់ទាត់ពិភពលោកឆ្នាំ២០១៨ នៅតំបន់អាស៊ី ពូលE ជុំទី២ នៅវេលាម៉ោង ៦:៣០យប់នេះ លើទីលានកីឡដ្ឋាន Takhti Stadium ប្រទេសអ៊ីរ៉ង់។
កាលពីជើងទី១ ថ្ងៃទី២៤ ខែមិថុនាកន្លងទៅ ក្រុមជម្រើសជាតិកម្ពុជាបានរងបរាជ័យលើទឹកដីខ្លួនឯង បន្ទាប់ពីកីឡាករ Mustafa Zazai ដែលលេងក្នុងលីកលំដាប់ទី៤របស់អាល្លឺម៉ង់ស៊ុតបញ្ចូលទីនៅរយៈពេល ៤នាទីចុងក្រោយ បញ្ចប់ក្ដីសង្ឃឹមរកបានមួយពិន្ទុដំបូងរបស់កម្ពុជា។
កម្ពុជាមិនទាន់ស្គាល់ពាក្យឈ្នះឬស្មើនៅឡើយទេក្នុងការប្រកួតជម្រុះបាល់ទាត់ពិភពលោកឆ្នាំ២០១៨ ជុំទី២ ពោលគឺ ៥ប្រកួតកន្លងមកចាញ់ទាំង៥ និងត្រូវគេស៊ុតបញ្ចូលទីរហូតដល់ទៅ ១៦គ្រាប់។ ចំណែកក្រុមអាហ្វហ្គានីស្ថានធ្លាប់ម្ដងគត់ក្នុងចំណោម ៥ប្រកួតជម្រុះបាល់ទាត់ពិភពលោកឆ្នាំ២០១៨ ជុំទី២ គឺឈ្នះកម្ពុជានេះឯង ប៉ុន្តែត្រូវគេបំប៉ោងសំណាញ់ទី ១៨គ្រាប់។
ក្រុមកីឡាករកម្ពុជាហាក់គ្មានបញ្ហារបួសអ្វីឡើយ ហើយមានតែអ្នកចាំទី អ៊ុំ សេរីរ័ត្ន ម្នាក់ប៉ុណ្ណោះដែលជួបបញ្ហាធ្ងន់ធ្ងរកាលប្រកួតមិត្តភាពកម្ដៅសាច់ដុំជាមួយក្រុម African All Star។ អ្វីដែលជាបញ្ហាចម្បងនាពេលនេះ គឺការប្រកួតនៅទឹកដីអ៊ីរ៉ង់ដែលមានចម្ងាយប្រមាណជិត ៦ពាន់គីឡូម៉ែត្រពីកម្ពុជា ឯអាកាសធាតុក៏ត្រជាក់ខុសពីធម្មតា។
ទោះបែបនេះក្ដី លោក Lee Tae Hoon គ្រូបង្វឹកក្រុមជម្រើសជាតិកម្ពុជាបានបញ្ជាក់ថា មានសង្ឃឹមទទួលបានពិន្ទុលើកដំបូងក្នុងពូលE បន្ទាប់ពីឃើញកីឡាករទាំងអស់ប្រឹងប្រែងលេងដោយទំនុកចិត្ត។ លោកបានបញ្ជាក់ថា នឹងប្រាប់កូនក្រុមឲ្យសម្រុកទៅមុខ ព្រមទាំងប្រើទម្រង់ប្រយុទ្ធលឿនៗពេលមានឱកាស ដើម្បីរកគ្រាប់បាល់ដំបូងត្រលប់មកកម្ពុជាវិញ។ ការប្រកួតនេះពុំមានទូរទស្សន៍ក្នុងស្រុករបស់ម្ពុជាណាមួយផ្សាយបន្តផ្ទាល់ឡើយ៕
គិតថាក្រុមកម្ពុជាអាចឈ្នះអាហ្វហ្គានីស្ថានទេយប់នេះ?
ចុចអាន៖ គ្រូ Lee ប្រាប់បញ្ហាបីយ៉ាងមុនក្រុមជម្រើសជាតិចាកចេញទៅអ៊ីរ៉ង់
ចុចអាន៖ កម្ពុជានឹងប្រកួតជាមួយអាហ្វហ្គានីស្ថាននៅអ៊ីរ៉ង់ ឯតម្លៃសំបុត្រក៏ចេញហើយដែរ
ចុចអាន៖ កម្ពុជាសង្ឃឹមរកបានពិន្ទុដំបូងពេលប៉ះអាហ្វហ្គានីស្ថាននៅថ្ងៃស្អែក
អត្ថបទ៖ គង់ វិសាល
