Rodgers ជឿថា Benteke នឹងក្លាយជា Hero របស់ Liverpool ក្រោយស៊ុតចូលគ្រាប់អស្ចារ្យ

2015-08-03 20:32:46
បាល់ទាត់

2015-08-03 20:32:46
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Brendan Rodgers អ្នកចាត់ការក្រុម Liverpool ជឿថាខ្សែប្រយុទ្ធចំណូលថ្មី Christian Benteke ដែលពាក់លេខ៩ នឹងក្លាយជា Hero ថ្មីរបស់ក្រុមហង្សក្រហម បន្ទាប់ពីកីឡាកររូបនេះ ស៊ុតបញ្ចូលទីយ៉ាងអស្ចារ្យ ជួយឲ្យក្រុមឈ្នះ Swindon ២-១ ក្នុងការប្រកួតមិត្តភាព កាលពីយប់មិញ។

Benteke ដែលផ្ទេរពី Aston Villa ក្នុងតម្លៃ៣២,៥លានផោន (ជាង៥០លានដុល្លារ) កាលពីខែមុន បានស៊ុតកាប់បញ្ចូលទីយ៉ាងអស្ចារ្យ ក្នុងការបង្ហាញខ្លួនលើកដំបូងរបស់ខ្លួនឲ្យក្រុម Liverpool យប់មិញនេះ ដែលធ្វើឲ្យអ្នកចាត់ការសញ្ជាតិអៀរឡង់ រឹតតែជឿជាក់លើសមត្ថភាពកីឡាកររូបនេះ កាន់តែខ្លាំងទៀត ថែមទាំងសរសើរថាខ្សែប្រយុទ្ធរូបនេះ នឹងក្លាយជាវីរបុរសរបស់ក្លិបទៀតផង។

អ្នកចាត់ការវ័យ៤២ឆ្នាំ បាននិយាយថា៖ "គាត់ពិតជាស៊ុតបញ្ចូលទីបានអស្ចារ្យមែន ហើយទើបតែហ្វឹកហាត់ជាមួយក្រុមបាន១សប្ដាហ៍ប៉ុណ្ណោះ...គាត់ពិតជាល្អ។ មិនថាវាជាការប្រកួតមិត្តភាព លីក ឬ Cup អ្នកប្រហែលពុំសូវបានឃើញគ្រាប់បាល់អស្ចារ្យដូចនេះប៉ុន្មានឡើយ។ សម្រាប់ខ្ញុំ គាត់ពិតជាធ្វើបានល្អឥតខ្ចោះមែន។ ខ្ញុំគិតថា គាត់មានសមត្ថភាពពិសេស ដែលអាចជួយក្រុមប្រសើរជាងមុន និងក្លាយជាខ្សែប្រយុទ្ធមុតស្រួច"។

ចំណែកឯខ្សែបម្រើប្រេស៊ីល Roberto Firmino ដែលផ្ទេរពី Hoffenheim នូវតម្លៃថ្លៃបំផុតទី៣ ក្នុងប្រវត្តិសាស្ត្រក្លិប ២៩លានផោន (ជាង៤៥,៦លានដុល្លារ) នោះ ក៏បានបង្ហាញខ្លួនឲ្យ Liverpool ដែរ កាលពីយប់មិញ និងបានចាប់ដៃគូរសហការគ្នាជាមួយ Benteke បានល្អផងដែរ៕

សូមទស្សនាវីដេអូ Benteke ស៊ុតចូលយប់មិញ៖