នេះណែ! គួច សុកុម្ភៈ និយាយពីការជួបកីឡាករ Arsenal នៅសិង្ហបុរី ម្សិលមិញ

2015-07-18 14:09:18
បាល់ទាត់

2015-07-18 14:09:18
ចំនួនមតិ 0 | ចំនួនចែករំលែក 0

ចន្លោះមិនឃើញ

សមាជិកក្រុមណាហ្គាវើល និងជាប្រធានក្រុមជម្រើសជាតិកម្ពុជា គួច សុកុម្ភៈ បានបង្ហាញអារម្មណ៍រំភើបរីករាយដែលបានជួបកីឡាករក្រុម Arsenal ផ្ទាល់កាលពីម្សិលមិញនៅប្រទេសសិង្ហបុរីក្នុងនាមជាទូតសុឆន្ទៈ (Brand Ambassador) របស់ផលិតផល Puma ប្រចាំនៅប្រទេសកម្ពុជា។

គួច សុកុម្ភៈ និងកីឡាករកាំភ្លើងធំ Monreal

គួច សុកុម្ភៈ រួមជាមួយលោក កុក កាន់រតនា ប្រធានក្រុមហ៊ុន Meta Sport ដែលនាំចូលផលិតផល Puma ប្រចាំនៅប្រទេសកម្ពុជា និងលោក តុង សុប្រាជ្ញ ជាអ្នកគាំទ្រ បានចូលជួបផ្ទាល់ជាមួយកីឡាករ Arsenal ពីរនាក់គឺលេខ១៨ Monreal និងលេខ២៤ Bellerin នៅហាង Puma នៅផ្សារទំនើបមួយក្នុងប្រទេសសិង្ហបុរី កាលពីរសៀល ម្សិលមិញ។

គួច សុកុម្ភៈ បាននិយាយថា ៖«ពេលបានជួបពួកគាត់ផ្ទាល់ ខ្ញុំមានអារម្មណ៍សប្បាយរីករាយ រំភើបខ្លាំងមែនទែន។ យើងបានចាប់ដៃគ្នា និយាយសួរសុខទុក្ខគ្នាទៅវិញទៅមក តែយើងអត់បាននិយាយអីច្រើនទេ ព្រោះមនុស្សចោមរោមច្រើនពេកនៅផ្សារទំនើបនោះ ពេលវេលាក៏តិច ហើយសន្តិសុខតឹងតែងខ្លាំង អង្គរក្សតាមការពារកីឡាកររហូត»។

ទូតសុឆន្ទៈរបស់ Puma ប្រចាំនៅកម្ពុជារូបនេះសង្ឃឹមថា លោកនឹងមានឱកាសបានជួបកីឡាកររបស់ក្រុម Arsenal និងកីឡាករកំពូលលើលោកផ្សេងទៀត។

គួច សុកុម្ភៈ និងលោក កុក កាន់រតនា ព្រមទាំងលោក តុង សុប្រាជ្ញ

គួច សុកុម្ភៈ ត្រូវបានក្រុមហ៊ុន Meta Sport និងក្លិបណាហ្គាវើលបញ្ជូនឲ្យទៅជួបផ្ទាល់ក្រុមកីឡាករកាំភ្លើងធំក្នុងនាមជាតំណាងផ្សព្វផ្សាយរបស់ Puma ប្រចាំនៅប្រទេសកម្ពុជាដែលបានចុះកុងត្រារយៈពេលពីរឆ្នាំ។ ការបញ្ជូនទៅជួបនេះក៏ជាផ្នែកមួយនៃការជំរុញទឹកចិត្តឲ្យកីឡាករកាន់តែមានកម្លាំងចិត្ត និងខំប្រឹងក្នុងអាជីពបាល់៕

អត្ថបទ៖ ជាន ចាន់រ៉ា រូបថត៖ Puma