ខំប្រឹងក្នុងអាជីពបាល់ទាត់ ទីបំផុត គួច សុកុម្ភៈ និងភរិយាធ្វើពិធីឡើងផ្ទះថ្មីថ្ងៃអាទិត្យនេះ

2015-07-10 18:15:35
បាល់ទាត់

2015-07-10 18:15:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានក្រុមជម្រើសជាតិកម្ពុជា និងជាសមាជិកក្រុមណាហ្គាវើល គួច សុកុម្ភៈ និងភរិយា អឿ រ៉ាវីសម្រេចរៀបចំពិធីឡើងផ្ទះថ្មីនាថ្ងៃអាទិត្យ ទី១២ ខែកក្កដា ខាងមុខនេះ ហើយបន្ទាប់ពីខិតខំប្រឹងប្រែងសន្សំប្រាក់អស់រយៈពេលជាយូរមក។

គួច សុកុម្ភៈ (អាវខៀវ) ប្រធានក្រុមជម្រើសជាតិកម្ពុជា

អ្នកស្រី អឿ រ៉ាវី បានឲ្យដឹងថា ផ្ទះថ្មីរបស់អ្នកស្រីស្ថិតនៅក្នុងបូរីសុខសាន្តចោមចៅ ជិតរង្វង់មូលចោមចៅ ផ្លូវជាតិលេខ៣។ តាមពិតទៅអ្នកស្រី និងគ្រួសារបានទិញផ្ទះនេះជាងមួយឆ្នាំមកហើយ បន្ទាប់ពីបានសន្សំប្រាក់រួមគ្នាជាមួយនឹងប្តីជាកីឡាករបាល់ទាត់តាំងពីបានរៀបការកាលពីឆ្នាំ២០១២ ប៉ុន្តែពួកគាត់មិនទាន់បានរស់នៅផ្ទះថ្មីនេះជាប់លាប់នោះទេ ដោយត្រូវរស់នៅជាមួយឪពុកម្តាយសិន។

អ្នកស្រី និងស្វាមី គួច សុកុម្ភៈបានរៀបរាប់ថា កាលពីដើមឆ្នាំ២០១២ ដែលជាពេលពួកគាត់រៀបការ ពួកគាត់មិនមានចំណូលសមរម្យឡើយ ដោយសារកាលណោះគួច សុកុម្ភៈទទួលបានប្រាក់ខែតិចតូចប៉ុណ្ណោះពីអាជីពបាល់ទាត់។ ប៉ុន្តែពួកគាត់ទាំងពីរបានព្យាយាមជួយសន្សំគ្នាដោយមិនហ៊ានចាយផ្ដេសផ្ដាសឡើយ។

រ៉ាវីនិយាយថា ៖«ពីមុន គាត់(សុកុម្ភៈ)បានប្រាក់ខែតិច ការចាយវាយគឺអត់ហ៊ានផ្ដេសផ្ដាសទេ ទាល់តែចាំបាច់ទើបចាយ។ ពេលគាត់ចូលលេងនៅក្លិបភ្នំពេញក្រោន គាត់បានប្រាក់ខែគួរសម ហើយខំក៏ប្រឹងរកលុយដែរ យើងរឹតតែសន្សំ ព្រោះចង់មានផ្ទះនៅផ្ទាល់ខ្លួន។ ប្រហែលជាពីរឆ្នាំក្រោយរៀបការ ពួកខ្ញុំក៏សម្រេចទិញផ្ទះ តែបង់រំលស់»។

ស្ត្រីដែលជាអ្នកមានរបបរកស៊ីផ្ទាល់ខ្លួនរូបនេះបន្តឲ្យដឹងថា ថ្វីត្បិតទិញផ្ទះជាងមួយឆ្នាំហើយ ប៉ុន្តែពួកគាត់មិនទាន់រស់នៅផ្ទះនោះជាប់លាប់ទេ សូម្បីតែរៀបចំពិធីឡើងផ្ទះ ក៏មិនទាន់បានរៀបចំដែរ ពីព្រោះគួច សុកុម្ភៈជាប់រវល់ខ្លាំងនឹងបាល់ទាត់ទាំងក្លិប និងជម្រើសជាតិ។

«ទើបពេលនេះ ពួកខ្ញុំសម្រេចរៀបចំពិធីឡើងផ្ទះតិចតួច ទោះរវល់ខ្លាំងយ៉ាងណាក៏ដោយ បើមិនធ្វើទេ នៅតែអីចឹង»។ រ៉ាវីបាននិយាយ និងបញ្ជាក់ថា និមន្តព្រះសង្ឃសូត្រមន្ត និងអញ្ជើញសាច់ញាតិ មិត្តភក្តិតិចតួចប៉ុណ្ណោះសម្រាប់ពិធីនេះ។

អ្នកស្រី អឿ រ៉ាវី និងកីឡាករ គួច សុកុម្ភៈ បានរៀបការកាលពីឆ្នាំ២០១២ បន្ទាប់ពីចំណាយពេលស្វែងយល់ចិត្តគ្នាអស់រយៈពេល៣ឆ្នាំ។ សព្វថ្ងៃអ្នកទាំងពីរទទួលបានកូនប្រុសម្នាក់អាយុជាងពីរឆ្នាំសម្រាប់ជាចំណងដៃអាពាហ៍ពិពាហ៍៕