អនាគត Sancho នៅបិសាចក្រហមកំពុងស្រពិចស្រពិល

2024-08-07 12:09:41
បាល់ទាត់

2024-08-07 12:09:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែស្លាប Jadon Sancho អាចនឹងចេញពីក្លឹប Manchester United។ នេះបើទោះជាមានរបាយការណ៍មួយចំនួនបានលើកឡើងថា អ្នកចាត់ការក្លឹប លោក Erik Ten Hag ចង់ឲ្យកីឡាករវ័យ ២៤ ឆ្នាំរូបនេះ បន្តលេងនៅក្លឹបក៏ដោយ។

យោងតាមការផ្សាយរបស់ Fabrizio Romano បានឲ្យដឹងថា ក្លឹបយក្សបារាំង Paris Saint Germain កំពុងតាមដានយ៉ាងយកចិត្តនូវស្ថានភាពរបស់ Sancho នៅក្លឹប Manchester United ហើយមានគម្រោងផ្ទេរចូលកីឡាករ បើសិនជាអាចធ្វើទៅបានក្នុងទីផ្សារដោះដូរពេលនេះ។

ការលើកឡើងនេះ ធ្វើឡើង បើទោះជាមានដំណឹងជាច្រើនកាលពីពេលថ្មីៗនេះបញ្ជាក់ថា គ្រូបិសាចក្រហម លោក Ten Hag ចង់ឲ្យ Sancho នៅជាមួយក្លឹប។

ក្រោយពេលមិនចុះសម្រុងគ្នាពាក្យសម្ដីគ្នារវាង Ten Hag និង Sancho កាលពីដើមរដូវកាលមុន ទំនាក់ទំនងរវាងអ្នកទាំងពីរមានការប្រេះឆាជាខ្លាំង រហូតដល់ Sancho ត្រូវបង្ខំចិត្តចេញពីបិសាចក្រហម រួចទៅលេងក្នុងនាមជាកីឡាករខ្ចីជើងឲ្យក្លឹបអាល្លឺម៉ង់ Borussia Dortmund កាលពីពាក់កណ្ដាលរដូវកាល ២០២៣/២០២៤។ នៅអាល្លឺម៉ង់ កីឡាករសញ្ជាតិអង់គ្លេសវ័យក្មេងរូបនេះ បានបង្ហាញទម្រង់លេងយ៉ាងល្អ រហូតជួយក្លឹបឡើងដល់វគ្គផ្ដាច់ព្រ័ត្រ Champions League ទៀតផង។

ក្រោយចប់រដូវកាល Sancho ត្រូវមានកាតព្វកិច្ចត្រលប់មក Manchester United វិញ ព្រោះកីឡាករមានកុងត្រាជាមួយក្លឹបរហូតដល់ឆ្នាំ ២០២៦។ Sancho បានត្រលប់មកហ្វឹកហាត់ជាមួយក្លឹបវិញ។ នាពេលថ្មីៗកន្លងទៅ លោក Ten Hag បានបញ្ជាក់ហើយ បញ្ជាក់ទៀតថា លោក និង Sancho បានជជែកគ្នាអំពីបញ្ហាពាក្យសម្ដីដែលកើតមានកន្លងមក ហើយបានព្រមព្រៀងគ្នាបិទបញ្ចប់ការមិនចុះសម្រុងនេះហើយ។ អ្នកចាត់ការសញ្ជាតិហុល្លង់ បានលើកឡើងទៀតថា លោកចង់ឲ្យ Sancho បន្តរួមរស់ជាមួយបិសាចក្រហមបន្តទៀត ព្រោះ Sancho ជាកីឡាករដ៏ល្អមួយរូបប្រចាំក្លឹប។

យ៉ាងនេះក្ដី បើតាមរបាយការណ៍ចុងក្រោយរបស់ Romano បានគូសរំលេចថា អនាគតរបស់ Sancho គឺអាស្រ័យលើ Sancho និងលោក Ten Hag។ បើអ្នកទាំងពីរនៅតែមិនទាន់ត្រូវគ្នាពិតប្រាកដ ពិតណាស់ Sancho អាចនឹងចេញពីក្លឹប ដើម្បីទៅចូលរួមជាមួយ PSG ក្នុងពេលឆាប់ៗ។