![](http://cdn.sabay.com/cdn/media.sabay.com/media/sabay-news/Sport-News/International-Sports/Freelancer-Sport/football(133)/669e6339626fa_1721656080_medium.jpg)
- 2024-07-22 13:51:31
- បាល់ទាត់
De Bruyne អាចនឹងចេញពី Man City
- 2024-07-22 13:51:31
- ចំនួនមតិ 0 | ចំនួនចែករំលែក 0
De Bruyne អាចនឹងចេញពី Man City
ចន្លោះមិនឃើញ
ក្លឹបអារ៉ាប៊ីសាអ៊ូឌីត Al Ittihad កំពុងចរចាយកខ្សែបម្រើ Kevin De Bruyne ពីក្លឹប Manchester City។ នេះបើតាមសារព័ត៌មាន The Mirrior។
ភាគីទាំងពីរកំពុងចរចាគ្នា។ បើតាមការចុះផ្សាយរបស់ Daily Mail កីឡាករ De Bruyne បានព្រមព្រៀងទៅចូលរួមជាមួយក្លឹបអារ៉ាប៊ីសាអ៊ូឌីតរួចទៅហើយ នៅឡើយតែការចរចាគ្នារវាងក្លឹប និងក្លឹប Manchester City។ ទោះជាយ៉ាងណា យោងតាមរបាយការណ៍ចុងក្រោយរបស់ Fabrizio Romano ទាំងភាគី De Bruyne និងក្លឹប Al Ittihad គឺមិនទាន់មានអ្វីព្រមព្រៀងគ្នានៅឡើយទេគិតមកទល់ពេលនេះ។
មិនទាន់មានប្រភពច្បាស់ការណាមួយអាចបញ្ជាក់បានថា Al Ittihad ហ៊ានឲ្យប្រាក់ឈ្នួលប៉ុន្មានទេសម្រាប់កីឡាករ De Bruyne ហើយហ៊ានឲ្យ Manchester City ប៉ុន្មានក្នុងការផ្ទេរយកកីឡាករបែលហ្សិកវ័យ ៣៣ ឆ្នាំរូបនេះ។ កុងត្រារបស់ De Bruyne នៅ Man City មានសុពលភាពរយៈពេល ១ ឆ្នាំទៀត។
ពាក្យចចាមអារ៉ាមនេះ កើតឡើងក្រោយ De Bruyne បានប្រាប់ទៅអ្នកសារព័ត៌មានកាលពីខែមុនថា រូបគេដល់វ័យមួយដែលត្រូវគិតគូរពីរឿងចំណូលជាធំ ព្រោះជិតដល់អាយុចូលនិវត្តន៍ពីវិស័យបាល់ទាត់អាជីពហើយ។ ដូច្នេះ រូបគេបើកចំហរគ្រប់ជម្រើសទាំងអស់ ទាក់ទងនឹងអនាគតរបស់រូបគេ ក្នុងនោះរួមមានទាំងការផ្ទេរចេញពីក្លឹប Manchester City ផងដែរ។
ក្លឹប Al Ittihad គឺជាក្លឹបសម្បូរធនធានណាស់ ហើយហ៊ានឲ្យប្រាក់ឈ្នួលយ៉ាងច្រើនសម្រាប់កីឡាករល្បីៗ។ ការណ៍នេះធ្វើឲ្យក្លឹបមានលទ្ធផលទាក់ទាញកីឡាករដូចជា Karim Benzema ខ្សែបម្រើ N'Golo Kante និង Fabinho ជាដើម។
De Bruyne គឺជាកីឡាករដ៏ឆ្នើមរបស់ក្លឹប Manchester City ទាំងពីចូលរួមជាមួយក្លឹបកាលពីឆ្នាំ ២០១៥ មក។ ខ្សែបម្រើបែលហ្សិកលេងសរុបឲ្យក្លឹប ៣៨២ លើក និងស៊ុតចូល ១០២ គ្រាប់ ហើយជួយក្លឹបឲ្យឈ្នះពានសរុបចំនួន ១៥ ក្នុងនោះពានធំៗគឺឈ្នះ Premier League ៦ ដង និង Champions League ម្ដង៕