![](http://cdn.sabay.com/cdn/media.sabay.com/media/sabay-news/Sport-News/International-Sports/Freelancer-Sport/football(132)/668d4dde4a6b6_1720536540_medium.png)
- 2024-07-09 14:59:06
- បាល់ទាត់
តម្លៃសំបុត្រទស្សនាការប្រកួតរបស់ក្លឹបធំៗនៅអង់គ្លេសគឺពិតជាថ្លៃមែន
- 2024-07-09 14:59:06
- ចំនួនមតិ 0 | ចំនួនចែករំលែក 0
តម្លៃសំបុត្រទស្សនាការប្រកួតរបស់ក្លឹបធំៗនៅអង់គ្លេសគឺពិតជាថ្លៃមែន
ចន្លោះមិនឃើញ
លីគកំពូលអង់គ្លេស (English Premier League) គឺជាលីគបាល់ទាត់ដែលល្បីល្បាញលំដាប់ពិភពលោក ហើយមានអ្នកទស្សនារាប់រយលាននាក់ នេះបើរាប់ទាំងអ្នកទៅមើលផ្ទាល់ និងអ្នកទៅមើលតាមការផ្សាយបន្តផ្ទាល់។
ប្រជាប្រិយភាពយ៉ាងសម្បើមនេះ កើតចេញពីកត្តាច្រើន ក្នុងនោះរួមមានភាពប្រកួតប្រជែងក្នុងលីគដោយមានក្លឹបធំៗច្រើន ភាពជប់ចិត្តដិតអារម្មណ៍ក្នុងការប្រកួត ហេដ្ឋារចនាសម្ព័ន្ធរបស់លីគល្អ និងភាពទំលំទូលាយនៃការផ្សព្វផ្សាយការប្រកួតក្នុងលីគជាដើម។ ភាពល្បីល្បាញនេះ ធ្វើឲ្យក្លឹបនៅក្នុងលីគ ជាពិសេសក្លឹបធំៗ រកចំណូលបានច្រើន ព្រោះមានអតិថិជនចាប់អារម្មណ៍ចង់ទស្សនាមានចំនួនច្រើន ដែលជាមូលហេតុមួយជម្រុញឲ្យសំបុត្រចូលទស្សនាផ្ទាល់មានតម្លៃថ្លៃ។
យោងតាមការស្រាវជ្រាវរបស់សារព័ត៌មាន The Athletic បានឲ្យដឹងថា ចំពោះក្លឹបធំៗនៅអង់គ្លេសដូចជា ក្លឹប Arsenal ក្លឹប Chelsea ក្លឹប Manchester City ក្លឹប Manchester United ក្លឹប Liverpool និងក្លឹប Tottenham Hotspur សំបុត្រចូលទស្សនាផ្ទាល់ ត្រូវបានបែងចែកទៅតាមទីតាំង និងកៅអីទស្សនាជិត ឬឆ្ងាយ។ ក្លឹបធំៗក្នុងលីគកំពូលអង់គ្លេស លក់សំបុត្រសម្រាប់ប្រកួតក្នុងដីរយៈពេលមួយរដូវកាលតែម្ដង (ជាង ២០ ប្រកួត)។ ក្នុងចំណោមក្លឹបធំៗទាំង ៦ នៅអង់គ្លេស តម្លៃសំបុត្រធូរថ្លៃជាមធ្យម ៨០០ ដុល្លារសហរដ្ឋអាមេរិក និងតម្លៃសំបុត្រប្រភេទថ្លៃជាមធ្យម ១,៨០០ ដុល្លារសហរដ្ឋអាមេរិក នៅរដូវកាល ២០២៣/២០២៤។
ខាងក្រោមជាតម្លៃសំបុត្រចូលទស្សនាផ្ទាល់ពេញមួយរដូវកាលរបស់ក្លឹបធំៗទាំង ៦ នៅអង់គ្លេសកាលពីរដូវកាលមុន៖
ក្លឹប Arsenal៖ តម្លៃសំបុត្រធូរថ្លៃបំផុតគឺប្រមាណ ១,២០០ ដុល្លារសហរដ្ឋអាមេរិក និងតម្លៃសំបុត្រថ្លៃបំផុតគឺប្រមាណ ២,៣០០ ដុល្លារសហរដ្ឋអាមេរិក។
ក្លឹប Chelsea៖ តម្លៃសំបុត្រធូរថ្លៃបំផុតគឺប្រមាណ ៨០០ ដុល្លារសហរដ្ឋអាមេរិក និងតម្លៃសំបុត្រថ្លៃបំផុតគឺប្រមាណ ១,២០០ ដុល្លារសហរដ្ឋអាមេរិក។
ក្លឹប Manchester City៖ តម្លៃសំបុត្រធូរថ្លៃបំផុតគឺប្រមាណ ៥០០ ដុល្លារសហរដ្ឋអាមេរិក និងតម្លៃសំបុត្រថ្លៃបំផុតគឺប្រមាណ ១,២០០ ដុល្លារសហរដ្ឋអាមេរិក។
ក្លឹប Manchester United៖ តម្លៃសំបុត្រធូរថ្លៃបំផុតគឺប្រមាណ ៧០០ ដុល្លារសហរដ្ឋអាមេរិក និងតម្លៃសំបុត្រថ្លៃបំផុតគឺប្រមាណ ១,២០០ ដុល្លារសហរដ្ឋអាមេរិក។
ក្លឹប Liverpool៖ តម្លៃសំបុត្រធូរថ្លៃបំផុតគឺប្រមាណ ៨៥០ ដុល្លារសហរដ្ឋអាមេរិក និងតម្លៃសំបុត្រថ្លៃបំផុតគឺប្រមាណ ១,០០០ ដុល្លារសហរដ្ឋអាមេរិក។
ក្លឹប Tottenham Hotspur៖ តម្លៃសំបុត្រធូរថ្លៃបំផុតគឺប្រមាណ ១,០០០ ដុល្លារសហរដ្ឋអាមេរិក និងតម្លៃសំបុត្រថ្លៃបំផុតគឺប្រមាណ ២,៥០០ ដុល្លារសហរដ្ឋអាមេរិក៕