![](http://cdn.sabay.com/cdn/media.sabay.com/media/sabay-news/Sport-News/International-Sports/Freelancer-Sport/football(127)/665efe3da7e11_1717501500_medium.jpg)
- 2024-06-04 12:59:51
- បាល់ទាត់
Ronaldo បង្កការភ្ញាក់ផ្អើល ក្រោយទទួលដំណឹងថា Mbappe ទៅ Real
- 2024-06-04 12:59:51
- ចំនួនមតិ 0 | ចំនួនចែករំលែក 0
Ronaldo បង្កការភ្ញាក់ផ្អើល ក្រោយទទួលដំណឹងថា Mbappe ទៅ Real
ចន្លោះមិនឃើញ
វីរបុរសក្លឹប Real Madrid ខ្សែប្រយុទ្ធ Cristiano Ronaldo បានចូលទៅសម្ដែងចំណាប់អារម្មណ៍ខ្លួន ក្នុងការបង្ហោះមួយក្នុងបណ្ដាញសង្គម Instagramដែលបញ្ជាក់ជាផ្លូវការថា Kylian Mbappe បានចូលរួមជាមួយ Real Madrid។
កាលពីវេលាព្រលឹមថ្ងៃនេះ Real Madrid បានប្រកាសជាផ្លូវការថា អតីតខ្សែប្រយុទ្ធ PSG កីឡាករ Kylian Mbappe បានមកចូលរួមជាមួយក្លឹបយក្សអេស្ប៉ាញ ជាមួយកុងត្រាចំនួន ៥ ឆ្នាំ រហូតដល់ឆ្នាំ ២០២៩។ ការផ្ទេរចូលនេះ បិទបញ្ចប់សំណុំរឿងជាង ៣ ឆ្នាំ ទាក់ទងនឹងពាក្យចចាមអារ៉ាម និងកិច្ចជជែកវែកញែកដែលថា Mbappe នឹងផ្ទេរទៅក្លឹបនេះ ទៅក្លឹបនោះ។
ក្នុងពេលជាមួយគ្នានោះដែរ Mbappe ក៏បានប្រើប្រាស់បណ្ដាញសង្គម Instagram របស់ខ្លួន បង្ហោះបញ្ជាក់ជាផ្លូវការ ហើយសាធារណៈថា រូបគេបានមកចូលរួមក្នុងក្លឹបនៃក្ដីស្រមៃរបស់គេហើយ។ ក្នុងការបង្ហោះនោះ កីឡាករវ័យ ២៥ ឆ្នាំ បានបង្ហាញសេចក្ដីរីករាយដែលបានចូលរួមជាមួយក្លឹប ហើយបានអរគុណអ្នកគាំទ្រ Real Madrid ទាំងអស់ចំពោះការគាំទ្រមកដល់រូបគេ។
ប្រមាណ ២ ម៉ោងក្រោយ Mbappe បង្ហោះរួច ស្រាប់តែវីរបុរសក្លឹប Real Madrid ខ្សែប្រយុទ្ធ Cristiano Ronaldo បានបញ្ចេញចំណាប់អារម្មណ៍របស់ខ្លួន ទៅលើការបង្ហោះរបស់ Mbappe ដោយបាននិយាយថា រូបគេពិតជាសប្បាយចិត្តដែលឃើញ Mbappe ចូលរួមបង្កស្នាមញញឹមសម្រាប់ក្លឹប និង អ្នកគាំទ្រ Real Madrid។
ការណ៍នេះ បង្កការភ្ញាក់ផ្អើលក្នុងបណ្ដាញសង្គម Instagram ព្រោះកម្រណាស់ដែល Ronaldo បានចូលមកបញ្ចេញមតិបែបនេះ។ គណនី Instagram របស់ Ronaldo គឺជាគណនីដែលមានអ្នកតាមដាន (Follower) ដល់ទៅ ៦៣១ លាននាក់ ដែលជាចំនួនច្រើនបំផុតលើពិភពលោកក្នុងបណ្ដាញសង្គមមួយនេះ។ ហេតុនេះហើយ ទើបមតិដ៏ខ្លីរបស់ Ronaldo នេះ ទទួលបានការ Like ដល់ជិត ៣ លាននាក់ នៃអ្នកប្រើប្រាស់បណ្ដាញសង្គម Instagram គិតមកទល់ពេលនេះ។
Ronaldo គឺជាវីរបុរសរបស់ក្លឹប Real Madrid បានលេងឲ្យក្លឹបយក្សអេស្ប៉ាញពីឆ្នាំ ២០០៩ ដល់ឆ្នាំ ២០១៨។ ក្នុងអំឡុងពេលជិត ១០ ឆ្នាំនៅជាមួយក្លឹប កីឡាករលេងសរុប ៤៣៨ ប្រកួត និងស៊ុតចូលដល់ទៅ ៤៥០ គ្រាប់ ហើយជួយ Real ឈ្នះពានធំៗជាច្រើនដូចជា Champions League, Super Cup, Copa del Rey និងលីគកំពូលអេស្ប៉ាញ La Liga ជាដើម។ បន្ទាប់ពីចេញពី Real Madrid កីឡាករ Ronaldo បានចេញទៅលេងឲ្យ Juventus រយៈពេល ៤ រដូវកាល ហើយក្រោយមកទៅលេងឲ្យបិសាចក្រហម Manchester United រយៈពេល ១ ឆ្នាំ កន្លះ មុនមកលេងឲ្យក្លឹបអារ៉ាប៊ីសាអ៊ូឌីត Al-Nassr កាលពីដើមឆ្នាំ ២០២៣ មក៕