![](http://cdn.sabay.com/cdn/media.sabay.com/media/sabay-news/Sport-News/International-Sports/Freelancer-Sport/football(127)/665dc658ba66c_1717421640_medium.jpg)
- 2024-06-03 13:37:29
- បាល់ទាត់
មកដឹងទីតាំងលេងវគ្គផ្ដាច់ព្រ័ត្រ Champions League រដូវកាលក្រោយ
- 2024-06-03 13:37:29
- ចំនួនមតិ 0 | ចំនួនចែករំលែក 0
មកដឹងទីតាំងលេងវគ្គផ្ដាច់ព្រ័ត្រ Champions League រដូវកាលក្រោយ
ចន្លោះមិនឃើញ
កម្មវិធី UEFA Champions League គឺជាកម្មវិធីកំពូលរបស់វិស័យបាល់ទាត់ក្លឹបនៅអឺរ៉ុប។ កម្មវិធីមានប្រជាប្រិយយ៉ាងខ្លាំងហើយមានអ្នកទស្សនាដោយផ្ទាល់ និងតាមការផ្សាយបន្តផ្ទាល់រាប់ពាន់លាននាក់ទូទាំងសកលលោក។ ហេតុនេះ ការរៀបចំកម្មវិធីនេះទាមទារពេលវេលា ការធ្វើផែនការ ការគិតគូរ និងការចាត់ចែងជាមុនយ៉ាងច្រើនខែ។ ដូច្នេះហើយ ទោះ Champions League រដូវកាលនេះទើបតែបិទបញ្ចប់ក្ដីនៅកីឡដ្ឋាន Wembley អង់គ្លេស ក៏យើងអាចដឹងថាកីឡដ្ឋានបន្ទាប់ដែលនឹងត្រូវបានរៀបចំកម្មវិធី Champions League វគ្គផ្ដាច់ព្រ័ត្រនៅទីណាផងដែរ។ កីឡដ្ឋាននោះគឺ Allianz Arena។
យោងតាមការចុះផ្សាយរបស់ទំព័រផ្លូវការរបស់ UEFA តាំងពីខែកក្កដា ឆ្នាំមុន បានបញ្ជាក់យ៉ាងច្បាស់ថា ទីតាំងដែលនឹងត្រូវលេងកម្មវិធី UCL វគ្គ Final គឺធ្វើឡើងនៅកីឡដ្ឋាន Allianz Arena ដែលមានឈ្មោះជាផ្លូវការថា Fußball Arena München ស្ថិតនៅទីក្រុង Munich ប្រទេសអាល្លឺម៉ង់។ កីឡដ្ឋានគឺកីឡដ្ឋានផ្លូវការរបស់ក្លឹប Bayern Munich។
លើកចុងក្រោយ កីឡដ្ឋាននេះរៀបចំកម្មវិធីវគ្គផ្ដាច់ព្រ័ត្រ UCL គឺនៅឆ្នាំ ២០១២។ នៅពេលនោះ ក្លឹប Chelsea បានប៉ះជាមួយក្លឹប Bayern Munich ក្នុងវគ្គ Final កម្មវិធី Champions League។ តោខៀវបានយកឈ្នះយក្សអាល្លឺម៉ង់ Bayern ក្នុងវគ្គទាត់បាល់ពិន័យ ក្នុងលទ្ធផល ៤ ទល់នឹង ៣។
ក្រៅពីធ្វើជាទីតាំងវគ្គផ្ដាច់ព្រ័ត្រសម្រាប់ UCL រដូវកាលក្រោយ Allianz Arena ក៏ជាកីឡដ្ឋានមួយបម្រើដល់កម្មវិធី EURO ២០២៤ ដែលជាកម្មវិធីបាល់ទាត់កំពូលប្រចាំប្រទេសនៅទ្វីបអឺរ៉ុប។ EURO ឆ្នាំនេះ មានអាល្លឺម៉ង់ធ្វើជាម្ចាស់ផ្ទះ។
Allianz Arena ត្រូវបានសាងសង់នៅឆ្នាំ ២០០១ ហើយសាងសង់រួចរាល់ និងបើកឲ្យប្រើប្រាស់ជាផ្លូវការនៅខែតុលា ឆ្នាំ ២០០៥។ ក្លឹប Bayern Munich គឺជាម្ចាស់កីឡដ្ឋាននេះ។ កីឡដ្ឋានរបស់ក្លឹបយក្សអាល្លឺម៉ង់មួយនេះ អាចទទួលភ្ញៀវដល់ទៅ ៦៧,០០០ នាក់៕