ដឹងទេ Arsenal បានត្រៀមរៀបចំពិធីលើកពាន Premier League

2024-05-21 14:15:02
បាល់ទាត់

2024-05-21 14:15:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះដឹងថាអាច ឬមិនអាចឈ្នះពានលីគកំពូលអង់គ្លេសរដូវកាលនេះ ក្លឹប Arsenal បានរៀបចំពិធីហាត់សម ក្នុងករណីបើក្លឹបឈ្នះពាន។ នេះបើយោងតាមវីដេអូមួយចំនួន បង្ហោះដោយសារព័ត៌មានធំៗដូចជា The Mirror ជាដើម។

យោងតាមប្រភពដដែល ក្រុមការងាររបស់ក្លឹប Arsenal បានរៀបចំចាត់ចែងផ្លាក និងផ្ទាំងបដា ដើម្បីអបអរ ក្នុងករណីបើសិនជាក្លឹបកាំភ្លើងលើកពាន Premier League។

ក្នុងរដូវកាលនេះ ការប្រកួតប្រជែងមានសភាពស្វិតស្វាញក្នុងលីគកំពូលអង់គ្លេស ដោយក្លឹបចំនួនពីររួមមាន Manchester City និង Arsenal ប្រជែងគ្នាដណ្ដើមពានរហូតដល់ការកាត់សេចក្ដីនៅប្រកួតចុងក្រោយបង្អស់។ មុនលេងប្រកួតចុងក្រោយMancheter City មាន ៨៨ ពិន្ទុ និងត្រូវលេងប្រកួតចុងក្រោយជាមួយ West Ham។ ចំណែកឯ Arsenal មាន ៨៦ ពិន្ទុ និងត្រូវប៉ះជាមួយ Everton។

នេះមានន័យថា បើ Man City ឈ្នះ West Ham នោះក្លឹបយក្សមេឃខៀវនឹងលើកពាន។ តែបើ Man City ចាញ់ ឬស្មើ ហើយ Arsenal ឈ្នះ Everton នោះ ក្លឹបកាំភ្លើងធំនឹងលើកពាន។ ហេតុដូចនេះហើយ ទើបក្លឹបកាំភ្លើងធំ ក៏បានរៀបចំពិធីដើម្បីត្រៀមអបអរក្នុងករណីបើក្លឹបទទួលបានជោគជ័យក្នុងលើកពាន ក្រោយអាក់ខានអស់រយៈពេល ២០ ឆ្នាំ។ លើកចុងក្រោយដែល Arsenal ឈ្នះពាន Premier League គឺនៅឆ្នាំ ២០០៣/២០០៤។ នៅពេលនោះ ពានដែល Arsenal ឈ្នះគឺជាពានមាស ព្រោះក្លឹបលេងមិនដែលចាញ់សោះក្នុងលីគពេញមួយរដូវកាលតែម្ដង។

ទោះជាយ៉ាងណា កាលពីចុងសប្ដាហ៍កន្លងទៅ ក្លឹប Manchester City បានក្លាយជាម្ចាស់ជើងឯកពាន Premier League ឆ្នាំ ២០២៣/២០២៤ ដោយមាន ៩១ ពិន្ទុ ក្រោយយកឈ្នះក្លឹប West Ham ក្នុងលទ្ធផល ៣-១។ ការណ៍នេះធ្វើឲ្យ Manchester City ក្លាយជាក្លឹបតែមួយគត់ក្នុងប្រវត្តិសាស្ត្រលីគកំពូលអង់គ្លេសដែលបានឈ្នះពាននេះ ៤ រដូវកាលជាប់គ្នា។ Arsenal បញ្ចប់រដូវកាលដោយឈរចំណាត់ថ្នាក់លេខ ២។

ជាងពីររដូវកាលចុងក្រោយ Arsenal បានបង្ហាញទម្រង់លេងល្អ ហើយបានក្លាយជាក្លឹបដែលប្រជែងយ៉ាងស្វិតស្វាញក្នុងការដណ្ដើមពាន Premier League។ ក្នុងរយៈពេលខ្លះ ក្លឹបបានឈរកំពូលតារាងជាច្រើនសប្ដាហ៍។ តែដោយបញ្ហាទម្រង់លេងក្នុងការប្រកួតមួយចំនួន គួបផ្សំនឹងភាពស្វិតស្វាញ និងភាពប្រកួតប្រជែងខ្ពស់របស់ Manchester City ផង ក្លឹបកាំភ្លើងធំបានត្រឹមលេខ ២ ទាំងរដូវកាល ២០២៣/២០២៤ និង ២០២២/២០២៣។ តើ Arsenal នឹងបានឈ្នះពាន Premier League ទេនៅរដូវកាលក្រោយ?

សូមទស្សនាទិដ្ឋភាព Arsenal ត្រៀមហាត់សមពិធីអបអរលើកពាន Premier League៕