លោក​ Erik Ten Hag អ្នកចាត់ការ​ក្លឹប​ Manchester United ត្រូវ​បាន​មជ្ឈដ្ឋាន​បាល់ទាត់​និយាយ​វែកញែក​ពី​អនាគត​របស់​លោក​ជា​មួយ​នឹង​ក្លឹប​បិសាចក្រហម​នៅ​រដូវកាល​ក្រោយ​នេះ​។

បើ​យោង​តាម​ការ​ចុះ​ផ្សាយ​របស់​ Daily Mail លោក​ Ten Hag អាច​នឹង​ស្នើ​សុំ​លាលែង​ពី​តំណែង​អ្នកចាត់ការ​ ជា​ជាង​ខាង​ក្លឹប​ប្រើ​ពាក្យ​បណ្ដេញ​ចេញ​ពី​តំណែង​។

នៅ​ខណៈ​នេះ​ Man Utd កំពុង​ឈរ​នៅ​លេខ​រៀង​ទី​៦ ក្នុង​តារាង​ Premier League ដែល​នឹង​មិន​អាច​មាន​ឱកាស​ក្នុង​ការ​ចូល​រួម​លេង​ UEFA Champions League ក្នុង​រដូវកាល​ក្រោយ​នេះ​ទេ​។ ក្នុង​រដូវកាល​នេះ​ក្លឹប​នេះ​ចូល​រួម​បាន​ ៣១ប្រកួត​ ឈ្នះ​១៥ប្រកួត​ ចាញ់​១២ប្រកួត​ និង​ស្មើ​៤ប្រកួត​ ដែល​ស្ថិតិ​នេះ​មិន​ល្អ​នោះ​ទេ​ក្រោម​ការ​ដឹកនាំ​របស់​ Ten Hag ។

បើ​តាម​ប្រភព​ខាង​លើ​ម្ចាស់​ក្លឹប​មាន​គម្រោង​ចង់​ផ្លាស់​ប្ដូរ​ផែនការ​ថ្មី​ដែល​តម្រូវ​កែទម្រង់​ក្លឹប​ត្រង់​ចំណុច​មួយ​ចំនួន​ ដូច្នេះ​ការ​កែទម្រង់​នេះ​អាច​ប៉ះពាល់​ដល់​តំណែង​ Ten Hag។

ចំពោះ​អារម្មណ៍​កីឡាករ​ក្រោម​ការ​ដឹកនាំ​របស់​ Ten Hag នៅ​ក្នុង​ពេល​នេះ​គឺ​មិន​មាន​ភាព​ស្រុះស្រួល​គ្នា​នោះ​ទេ​ដោយ​អ្នក​ខ្លះ​ពេញ​ចិត្ត​នឹង​ Ten Hag រី​ឯ​អ្នកខ្លះ​វិញ​មិន​សប្បាយ​ក្នុង​ទម្រង់​ដឹកនាំ​របស់​លោក​ទេ​។

ចំពោះ​ការ​វែកញែក​ពី​អនាគត​របស់​អ្នកចាត់ការ​រូប​នេះ​ លោក​ផ្ទាល់​ខ្លួន​ធ្លាប់​ត្រូវ​បាន​ប្រាប់​សារព័ត៌មាន​នានា​ជា​ច្រើន​ឲ្យ​បញ្ឈប់​ពី​ការ​វែកញែក​ជា​អកុសល​នេះ​ព្រោះ​តែ​លោក​ជឿជាក់​ និង​ខិត​ខំ​ដឹកនាំ​ Man Utd ឲ្យ​កាន់​តែ​ទៅ​មុខ​ទៀត​។ លោក​ Ten Hag នៅ​មាន​កុងត្រា​ជា​មួយ​ Man Utd រហូត​ដល់​ឆ្នាំ​២០២៥​៕