Garnacho អាចរងពិន័យពីសហព័ន្ធបាល់ទាត់អង់គ្លេស

2023-10-26 12:53:08
បាល់ទាត់

2023-10-26 12:53:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែស្លាប Manchester United កីឡាករ Alejandro Garnacho អាចរងការចោទប្រកាន់ និងឈានទៅដល់អាចត្រូវបានពិន័យពីសហព័ន្ធបាល់ទាត់អង់គ្លេសហៅកាត់ថា FA បន្ទាប់ពីបានបង្ហោះសារ Twitter ដែលមជ្ឈដ្ឋានមួយចំនួនយល់ថាមិនសមរម្យ។ នេះបើតាមការចុះផ្សាយរបស់ Goal ក្នុងថ្ងៃនេះ។

កាលពីថ្ងៃនេះ កីឡាករ Garnacho បានបង្ហោះសារក្នុងបណ្ដាញសង្គម X (ដែលពីមុនមានឈ្មោះថា Twitter) ដោយដាក់រូបសញ្ញាស្វាចំនួន ២។ នៅពីក្រោមរូបសញ្ញាទាំងនេះ គឺរូបថតមួយសន្លឹកដែលក្រុមកីឡាករបិសាចក្រហមរួមមាន Garnacho ផងកំពុងអបអរជាមួយអ្នកចាំទី Andre Onana បន្ទាប់ពីជួយសង្គ្រោះបាល់ពិន័យ ១១ ម៉ែត្របានសម្រេចពីការស៊ុតបញ្ចូលទីរបស់ក្រុម Copenhagen ក្នុងប្រកួត Champions League។ Man Utd ឈ្នះប្រកួតមួយនេះក្នុងលទ្ធផល ១ ទល់នឹង ០។

រូបភាពដោយ៖ Reddit

យោងតាម Goal ការបង្ហោះសារនេះអាចត្រូវបានបកស្រាយច្រើនយ៉ាង។ មួយបែបអាចថា Garnacho អបអរសាទរដោយស្មោះជាមួយមិត្តរួមក្រុម។ តែបើមើលមួយបែបទៀត គឺអាចមានន័យថាជាការរើសអើងពណ៌សម្បុរ ចំពោះកីឡាករ Onana ដែលមានស្បែកខ្មៅ។

ក្នុងថ្ងៃនេះដដែលGarnacho បានលុបចោលសារដែលបង្ហោះខាងលើចោលបាត់ទៅហើយ។

បញ្ហាបង្ហោះសារដែលអាចបកប្រែជាការរើសអើងពូជសាសន៍ពណ៌សម្បុរជាដើម គឺជាបញ្ហារសើបនៅលីគធំៗនៅអឺរ៉ុបជាពិសេសនៅអង់គ្លេស។ កន្លងមក សហព័ន្ធបាល់ទាត់អង់គ្លេសធ្លាប់បានចោទប្រកាន់ហើយពិន័យកីឡាករមួយចំនួន ដូចជា ខ្សែប្រយុទ្ធEdison Cavani កាលពីឆ្នាំ ២០២០ និងខ្សែបម្រើ Bernardo Silva កាលពីឆ្នាំ ២០១៩ សុទ្ធតែរងពិន័យបន្ទាប់ពីបង្ហោះសារដែល FA យល់ថាមានន័យរើសអើង។ Cavani ត្រូវបានរងពិន័យមិនឲ្យលេងបីប្រកួត ខណៈ Silva រងពិន័យឲ្យលេងមួយប្រកួត និងពិន័យជាប្រាក់ ៥ ម៉ឺនផោន។

គិតមកទល់ពេលនេះ មិនទាន់មានប្រតិកម្មណាមួយពី FA នៅឡើយទេ៕

ប្រភព៖ Goal ប្រែសម្រួល៖ ហ៊ីម រស្មី