ដំណើរមកកាន់វគ្គផ្ដាច់ព្រ័ត្ររបស់ បារាំងនិងអាហ្សង់ទីន

2022-12-18 07:30:23
បាល់ទាត់

2022-12-18 07:30:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍ World Cup ២០២២ ក្រោយពីឆ្លងកាត់ការប្រកួតជិតមួយខែ ទីបំផុតបានរកឃើញ២ក្រុមឡើងមកកាន់វគ្គផ្ដាច់ព្រ័ត្រហើយនោះគឺជម្រើសជាតិបារាំងនិងអាហ្សង់ទីន។ ពួកគេនឹងត្រូវប្រកួតគ្នាយប់នេះម៉ោង១០:០០នាទី ក្នុងកីឡដ្ឋាន Lusail។

ដំណើរមកកាន់វគ្គផ្ដាច់ព្រ័ត្រ

ការប្រកួតក្នុងពូលបារាំងបានបញ្ចប់ចំណាត់ថ្នាក់លេខមួយលេង៣ប្រកួតឈ្នះ២និងចាញ់១ប្រកួត។ វគ្គ១៦ក្រុមចុងក្រោយ ពួកគេបានយកឈ្នះប៉ូឡូញ ៣-១ មុនពេលបន្តបំបាក់អង់គ្លេស ២-១ ក្នុងវគ្គ៨ក្រុមចុងក្រោយ។ ក្រុមរបស់លោក Didier Deschamps នៅតែបន្តធ្វើបានល្អក្នុងវគ្គ៤ក្រុមចុងក្រោយដោយយកឈ្នះក្រុមឡើងកូដម៉ារ៉ុក ២-០។
ចំពោះអាហ្សង់ទីនយកបានតំណែងលេខមួយដូចគ្នានៅវគ្គសន្សំពិន្ទុក្នុងពូល ឆ្លងកាត់៣ប្រកួតឈ្នះ២និងចាញ់១។ ឈានដល់វគ្គ១៦ក្រុម ពួកគេបានទម្លាក់អូស្ដ្រាលី និងឈ្នះបាល់ប៉េណាល់ទីកាត់សេចក្ដីលើហុល្លង់ក្នុងវគ្គ១៦ក្រុមចុងក្រោយ។ ជារឿងភ្ញាក់ផ្អើលវគ្គ៤ក្រុមចុងក្រោយអាហ្សង់ទីនបានបំបាក់ក្រុមរងជើងឯកឆ្នាំចាស់ក្រូអាត ៣-០ បានកៅអីឡើងផ្ដាច់ព្រ័ត្រ។

កីឡាករក្រុមទាំងពីរ

ក្រៅពីការប្រជែងពានគ្នា ទាំងបារាំងនិងអាហ្សង់ទីនសុទ្ធសឹងតែមានកីឡាករត្រូវប្រជែងស្បែកជើងមាសដូចគ្នា។ ខ្សែប្រយុទ្ធ Lionel Messi ដែលជាប្រធានក្រុមរបស់អាហ្សង់ទីនកំពុងឈរជាកីឡាករមានគ្រាប់បាល់ច្រើនជាងគេ៥គ្រាប់ ស្មើគ្នាជាមួយ Kylian Mbappe ខ្សែប្រយុទ្ធរបស់បារាំង។
នេះគឺជាលើកទី៤ហើយដែលបារាំងឡើងមកកាន់វគ្គផ្ដាច់ព្រ័ត្រ ខណៈអាហ្សង់ទីនជាលើកទី៦។ ពួកគេសុទ្ធតែធ្លាប់ឈ្នះពាន World Cup ២ដងដូចគ្នា។
ជម្រើស១១នាក់របស់ក្រុមទាំងពីរ

• បារាំង៖ 1. Lloris (GK) — 5. Kounde, 4. Varane, 18. Upamecano, 22. T. Hernandez — 8. Tchouameni, 7. Griezmann, 14. Rabiot — 11. Dembele, 9. Giroud, 10. Mbappe.

• អាហ្សង់ទីន៖ 23. E. Martinez (GK) — 26. Molina, 13. Romero, 19. Otamendi, 8. Acuna — 5. Paredes, 7. De Paul, 24. Fernandez, 20. Mac Allister — 10. Messi, 9. Alvarez

មតិអ្នកវិភាគ

អ្នកវិភាគជនជាតិអង់គ្លេស Danny បានមើលឃើញថា លោកបានទស្សនា Kylian Mbappe កម្ទេចអាហ្សង់ទីន ពេលបារាំងឈ្នះ ៤-៣ កាលពី World Cup ៤ឆ្នាំមុន។ ប៉ុន្តែឆ្នាំនេះវាមិនងាយស្រួលឡើយក្នុងការយកឈ្នះក្រុមរបស់ Messi ដោយសារតែពួកគេត្រៀមបានល្អជាងកាលនៅរុស្សី។ វានឹងក្លាយជាការប្រកួតតានតឹង តែអ្នកវិភាគខាងលើគិតថា បារាំងនៅតែអាចលើកពាន World Cup បាន៕

អត្ថបទ៖ ហេង សុធារិទ្ធិ