ឱកាសមកដល់ហើយ! នឹងអាចក្លាយជាកីឡាករតំណាងក្លឹបនេះបើឈ្នះពាន King Snooker Cup 2022

2022-07-28 02:18:55
កីឡាផ្សេងៗ

2022-07-28 02:18:55
ចំនួនមតិ 0 | ចំនួនចែករំលែក 0

ចន្លោះមិនឃើញ

សហព័ន្ធកីឡាស្នូកឃ័រ និងប៊ីយ៉ាកម្ពុជា បានរៀបចំការប្រកួតព្រឹត្តិការណ៍ដ៏ធំមួយ គឺកម្មវិធីប្រកួត King Snooker Cup 2022 ដែលបានបើកឲ្យចុះឈ្មោះចាប់ពីថ្ងៃផ្សាយដំណឹងនេះតទៅ ហើយអ្នកដែលឈ្នះព្រឹត្តិការណ៍នេះទទួលបានឱកាសដ៏ពិសេស នឹងបានក្លាយជាកីឡាករតំណាងឲ្យក្លឹប King Snooker Club ព្រមទាំងអាចមានឱកាសចូលរួមប្រកួតប្រជែងតំណែងកីឡាករជម្រើសជាតិថែមទៀតផង។

ពានរង្វាន់ខាងលើ នឹងបិទឈប់ទទួលពាក្យថ្ងៃទី៥ ខែសីហា ឆ្នាំ២០២២ ហើយកម្មវិធីប្រកួតនឹងចាប់ផ្ដើមដំណើរការថ្ងៃទី៨ ខែសីហា តទៅ ដោយការប្រកួតនឹងធ្វើការបែងចែកពូល ហើយក្រុមខ្លាំងនៅតាមពូលនីមួយៗ នឹងឡើងទៅកាន់វគ្គបន្ទាប់ៗ។ រហូតមកដល់ពេលនេះលោក ម៉ារ៉ា សុជាតិ ហៅ មួន ម៉ារ៉ា អគ្គលេខាធិការសហព័ន្ធកីឡាស្នូកឃ័រមិនទាន់បានកំណត់ចំនួនកីឡាករចូលរួមប្រកួតទេ ប៉ុន្តែលោកបើកចំហឲ្យមានការចូលរួមព្រមទាំងលើកទឹកចិត្តដល់ប្អូនៗចូលរួមឲ្យបានច្រើន ដើម្បីជាដំណើរឆ្ពោះទៅកាន់ភាពពង្រឹងនៃវិស័យកីឡាមួយនេះឲ្យកាន់តែខ្លាំងក្នុងតំបន់ ពិសេសក៏ដើម្បីពង្រឹងក្នុងទិសដៅស៊ីហ្គេមឆ្នាំ២០២៣ដែលកម្ពុជាធ្វើជាម្ចាស់ផ្ទះផងដែរ។

អគ្គលេខាធិការដដែលបន្ថែមថា ប្អូនៗចូលរួមកុំបារម្ភក្នុងការប្រកួតអ្វីទាំងអស់ សូម្បីកីឡាករជម្រើសជាតិនាពេលបច្ចុប្បន្នលោកមិនអនុញ្ញាតឲ្យចូលរួមប្រកួតទេ ដើម្បីកុំឲ្យកីឡាករដែលមានសមត្ថភាពមិនទាន់ខ្លាំងមានភាពបារម្ភក្នុងការចូលរួម។ ព្រឹត្តិការណ៍នេះមានភាពចំណេញច្រើនដល់ប្អូនៗដែលចូលរួម ប្រសិនបើឈ្នះពានរង្វាន់លេខ១ លេខ២ ឬលេខ៣ ទទួលបានប្រាក់ឧបត្ថម្ភហើយ ទទួលបានរង្វាន់ផ្សេងៗយ៉ាងច្រើន ព្រមទាំងពិសេសបានក្លាយជាកីឡាករតំណាងឲ្យក្លឹប King Snooker Club និងកាន់តែពិសេស នៅពេលសហព័ន្ធមានការប្រកួតជម្រុះជ្រើសរើសកីឡាករជម្រើសជាតិទៀតនោះ នឹងមានមុខទៅប្រកួតដែរ។

ជាមួយគ្នានោះលោក ហ៊ុល សារ៉ាវុធ អ្នកតំណាងឲ្យក្លឹប King Snooker ក៏បានលើកឡើងដែរថា លោកពិតជាមានភាពរីករាយក្នុងការបើកឲ្យមានការប្រកួតបែបនេះក្នុងក្លឹបរបស់លោក ហើយលោកនឹងប្រឹងប្រែងរៀបចំឲ្យបានល្អបំផុត តាមដែលអាចធ្វើទៅបាន។ ឆ្លៀតក្នុងឱកាសនេះលោកក៏បានបើកចំហឲ្យក្មេងៗដែលចង់ហាត់រៀនក្នុងវិស័យកីឡានេះអាចទៅចុះឈ្មោះនៅក្លឹបរបស់លោកបាន ដោយក្លឹបរបស់លោកមានគ្រូបង្ហាត់ល្អៗ ពិសេសមានតម្លៃថោកសមរម្យថែមទៀតផង។