សន្សំសំចៃ! Aguero ថានៅ Barcelona មិនទាន់ដល់ម៉ោងហាត់ អត់បើកភ្លើងឱ្យទេ

2021-09-07 03:12:38
បាល់ទាត់

2021-09-07 03:12:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Sergio Aguero បានប្រៀបធៀបការហ្វឹកហាត់កាលនៅក្រុម Manchester City និងក្រុម FC Barcelona ថាមានភាពខុសគ្នាច្រើន តាមការមើលឃើញរបស់គេ។

ខ្សែប្រយុទ្ធវ័យ៣៣ឆ្នាំដែលទើបចុះកុងត្រា២ឆ្នាំជាមួយក្រុម Barcelona បាននិយាយថា៖ “នៅ Manchester City កីឡាករទាំងអស់ត្រូវមកមុន១ម៉ោងកន្លះដើម្បីត្រៀមហាត់។ នៅ Barcelona វិញដូចជាកន្លះម៉ោងទេ។ ខ្ញុំគិតថាខ្ញុំប្រហែលជាទៅមុន១ម៉ោងដើម្បីរកមើលថាខ្ញុំអាចធ្វើអ្វីបាននៅកន្លែងហាត់ប្រាណ។ ប៉ុន្តែមិនអាចទេ សូម្បីភ្លើងក៏ត្រូវបិទអស់ដែរ។ វាពិតជាខុសគ្នាមែន”។

ដោយការធ្វើបែបនេះរបស់ក្រុមអ្នកមានបុណ្យ ក៏ដោយសារតែក្លឹបកំពុងជួបវិបត្តិសេដ្ឋកិច្ច ដែលតាមគម្រោងផែនការគ្រប់យ៉ាងត្រូវសន្សំសំចៃខ្ពស់។ ជាក់ស្ដែងទឹកភ្លើងនៅកន្លែងហាត់ជាដើម ក៏ត្រូវបានកំណត់ប្រើប្រាស់ផងដែរ។ ប្រព័ន្ធភ្លើងមិនអាចបើកចោលទេ ពោលគឺទាល់តែដល់ម៉ោងហាត់ទើបបើកប្រើប្រាស់។ ខណៈដែលបច្ចុប្បន្ននេះ ក្រោយពីមានវិធានការជាច្រើនទាំងការកាត់ប្រាក់ឈ្នូលកីឡាករច្រើនៗនោះ ក្រុម Barcelona បានបន្ថយចំណាយច្រើនហើយ។

បើតាមការបញ្ជាក់របស់លោក Laporta បំណុលរបស់ក្រុម Barcelona បច្ចុប្បន្នមានប្រមាណជា ១,១៥ពាន់លានផោន ឬស្មើនឹង ១,៥៩ពាន់លានដុល្លារ។ ក្លឹបកំពុងតែស្វះស្វែងរកគ្រប់វិធីដើម្បីដោះស្រាយបញ្ហានេះ៕

ប្រភព៖ Dailymail អត្ថបទ៖ ប្រុស យុទ្ធ