ផ្ដល់បទសម្ភាសន៍មកកាន់ Sabay កាលពីពេលថ្មីៗនេះ អ្នកចាំទីឆ្នើមរបស់ក្លឹបព្រះខ័នរាជស្វាយរៀង អាំ សុវណ្ណរ៉ាត់ បានកោតសរសើរពីសមត្ថភាពភាពខ្សែបម្រើស្លាបវ័យក្មេងភ្នំពេញក្រោន លឹម ពិសុទ្ធ និងចាត់ទុកយុវជនរូបនេះជាគ្រាប់ពេជ្រដ៏សំខាន់​ម្នាក់របស់កម្ពុជា។

ការលើកឡើងរបស់អ្នកចាំទីមកពីខេត្តពោធិ៍សាត់ ធ្វើឡើងបន្ទាប់ពីក្រុមជើងឯកលីគកំពូលកម្ពុជា ២ សម័យកាលព្រះខ័នរាជស្វាយរៀងប្រកួត​ស្មើ ៣-៣ ជាមួយម្ចាស់ជើងឯកលីគ ៦ សម័យកាលភ្នំពេញក្រោន នៅកីឡដ្ឋាន Smart RSN កាលពីថ្ងៃទី១៥ ខែកក្ដដា ឆ្នាំ២០២១កន្លងទៅ។

អ្នកចាំទីដៃទី១រូបនេះ បានបញ្ជាក់បែប​នេះ ៖«សម្រាប់កីឡាករ លឹម ពិសុទ្ធ នេះយើងអាចនិយាយបានថា ជាគ្រាប់ពេជ្រមួយរបស់កម្ពុជាដែរ គាត់នៅក្មេងហើយសមត្ថភាពគាត់គឺល្អមែនទែន ល្អគួរឱ្យ​កត់សម្គាល់។ អ៊ីចឹងខ្ញុំសង្ឃឹមថាគាត់នឹងអាចជួយជាតិបានកាន់តែល្អប្រសើរ»។

កីឡាករដដែល​បាន​បន្ថែមទៀត​ថា ការបង្ហាញខ្លួនរបស់លឹម ពិសុទ្ធ កាលពីថ្ងៃទី១៥ ខែកក្ដដា ឆ្នាំ២០២១ គឺល្អសឹងតែនឹកស្មានមិនដល់ ជាពិសេសជម្រើសជាតិកម្ពុជាវ័យក្មេងរូបនេះ បានបង្កើតឱកាសគ្រោះថ្នាក់ជាច្រើន ហើយថែមទាំងរកបាន ២គ្រាប់ទៀតផង៕