Southgate ៖ខ្ញុំជាអ្នករើសពួកគេឱ្យទាត់ ខ្ញុំជាអ្នកទទួលខុសត្រូវបរាជ័យនេះ

2021-07-12 01:31:49
បាល់ទាត់

2021-07-12 01:31:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់ជម្រើសជាតិអង់គ្លេស បានបរាជ័យក្រោមថ្វីជើងរបស់ក្រុមអ៊ីតាលីទៅហើយ ដោយបាល់ប៉េណាល់ទី ៣-២ ក្រោយពីលេងស្មើគ្នា ១-១ រយៈពេល១២០នាទី។

សម្រាប់ការប្រកួតវគ្គផ្ដាច់ព្រ័ត្រកាលពីយប់មិញនេះ ក្រុមអង់គ្លេសបានធ្វើឱ្យអ្នកគាំទ្រសប្បាយចិត្តមែនទែន ក្រោយពីបើកការនាំមុខលើអ៊ីតាលីបានមុន នៅត្រឹមនាទីទី២ដើមតង់ទី១ ដោយ Luke Shaw ។ យ៉ាងណាមិញ នាំមុខ១គ្រាប់នេះហើយ អង់គ្លេសរងសម្ពាធច្រើន ដោយសារតែអ៊ីតាលីព្យាយាមសម្រុកវិញដើម្បីស្វែងរកគ្រាប់បាល់។ ជាលទ្ធផលឃើញថានៅនាទី៦៧ Bonucci ក៏រកគ្រាប់បាល់តាមស្មើវិញបាន។ ចប់៩០នាទីក្រុមទាំងពីរស្មើគ្នា ១-១ ហើយម៉ោងបន្ថែម១៥នាទីចំនួន២ដងទៀតក៏មិនមានគ្រាប់បាល់កើតឡើងដែរ។

ឈានចូលដល់វគ្គប៉េណាល់ទីវិញ អ៊ីតាលីធ្វើបានល្អជាងអង់គ្លេស។ ក្រុមរបស់លោក Southgate ៣នាក់ចុងក្រោយ ប៉េណាល់ទីមិនចូលទាំង៣នាក់តែម្ដង។ ដោយ Rashford , Sacho និង Saka ដែលជាកីឡាករវ័យក្មេងទាំង៣ ធ្វើមិនបានល្អឡើយ និងធ្វើឱ្យអង់គ្លេសចាញ់ប៉េណាល់ទីកាត់សេចក្ដីក្នុងលទ្ធផល ៣-២។

ក្រោយពីចប់ការប្រកួតទៅ លោក Southgate គ្រូបង្វឹកក្រុមជម្រើសជាតិអង់គ្លេសបាននិយាយថា៖ “នេះជាការទទួលខុសត្រូវរបស់ខ្ញុំ។ ខ្ញុំជាអ្នករើសពួកគេក្នុងការទាត់ប៉េណាល់ទីនេះ។ ខ្ញុំបានប្រាប់ទៅកីឡាករថា យើងចាញ់ និងឈ្នះជាមួយគ្នាជាក្រុម។ Saka បានទាត់ ខ្ញុំជាអ្នករើស វាមិនមែនជារឿងទៅបន្ទោស Marcus ឬ Jadon នោះទេ។ ខ្ញុំជាអ្នកមើលពួកគេហ្វឹកហាត់រាល់ថ្ងៃ”៕

ប្រភព៖ www.afp.com អត្ថបទ៖ ប្រុស យុទ្ធ