ឡេង ណូរ៉ា បង្ហាញល្អនៅជម្រើសជាតិតែមានប្រវត្តិកម្សត់រស់នៅមណ្ឌល និងអង្គការ

2021-07-05 07:52:56
បាល់ទាត់

2021-07-05 07:52:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើស្លាបជម្រើសជាតិកម្ពុជា និងក្លឹបព្រៃវែង ឡេង ណូរ៉ា បង្ហាញទម្រង់យ៉ាងល្អគួរឲ្យកត់សម្គាល់ទាំងក្នុងក្លឹប និងជម្រើសជាតិ ប៉ុន្តែប្រិយមិត្តដឹងទេយុវជនវ័យ១៧ឆ្នាំរូបនេះជាក្មេងមានប្រវត្តិកម្សត់រស់នៅមណ្ឌលកុមារកំព្រានិងតាមអង្គការនៅក្រុងភ្នំពេញកាលវ័យ៧ឆ្នាំដល់១៤ឆ្នាំ។

ឡេង ណូរ៉ា កាលនៅជ្រើសជាតិ

យុវជនពាក់លេខ១៧នៅជម្រើសជាតិរូបនេះមានបងប្អូន៤នាក់គេជាកូនទី៣ក្នុងគ្រួសារមានម្ដាយឈ្មោះ នី ណា បច្ចុប្បន្នទៅរស់នៅជាមួយបងស្រីរបស់គេហើយ។ យុវជនរូបនេះមានឪពុកជាជនជាតិ ហ្គាណា បានស្លាប់នៅកម្ពុជាកាលឆ្នាំ២០១០។

កូនកាត់ ហ្គាណា ខាងលើត្រូវបានម្ដាយយកទៅឲ្យរស់នៅជាមួយអង្គការមួយដែលគេមិនចាំឈ្មោះកាលឆ្នាំ២០១០ ដែលពេលនោះ ណូរ៉ា មានវ័យ៧ឆ្នាំ។ ការយកកុមារវ័យ៧ឆ្នាំទៅរស់នៅជាមួយអង្គការនេះគឺក្រោយពេលដែលប្ដីរបស់ខ្លួនបានស្លាប់ និងមិនមានជីវភាពគ្រប់គ្រាន់ក្នុងចិញ្ចឹមកូន។ ចាំបានថាកុមារាវ័យ៧ឆ្នាំ ណូរ៉ា រស់នៅជាមួយអង្គការបានពីរឆ្នាំក៏ត្រូវផ្លាស់មករស់នៅក្នុងមណ្ឌលកុមារកំព្រាភ្នំពេញថ្មីក្នុងឆ្នាំ២០១២។

មករស់នៅមណ្ឌលកុមារកំព្រានោះហើយ ជាពេលដែលគេចាប់ផ្ដើមចង់លេងបាល់ទាត់ និងបានទៅលួចមើលក្លឹបណាហ្គា ហ្វឹកហាត់នៅជិតមណ្ឌលរបស់ខ្លួនស្ទើររាល់ថ្ងៃ។ ពេលនោះគេក៏ចាប់ផ្ដើមចង់ចេះលេង និងទទួលបានឱកាសទៅហាត់បាល់ទាត់ជាមួយក្លឹបឱម៉ាល់ ប៉ុន្តែហ្វឹកហាត់មិនទាន់ជាប់លាប់ទេ។

រហូតដល់ថ្ងៃមួយចុងឆ្នាំ២០០៨ ពេលនោះ ណូរ៉ា ក៏ទទួលបានឱកាសចូលហាត់ជាមួយក្លឹបឱម៉ាល់ពេញលេញ។ ហ្វឹកហាត់ជាមួយឱម៉ាល់ដល់ចុងឆ្នាំ២០១៨ក៏បានចូលធ្វើតេស្តសមត្ថភាពជាយុវជនរបស់វិសាខា។ ក្រោយធ្វើតេស្តជាប់ភ្លាមគេបានប្រាប់ខ្លួនឯងថា ជីវិតរបស់គេមានភាពប្រសើរឡើងហើយ ពេលនោះគេទទួលបានឱកាសលេងឲ្យយុវជនវិសាខា U16 ក្នុងវ័យ១៤ឆ្នាំ។ ចូលរួមជាមួយវិសាខាបានពីរឆ្នាំពោលគឺ២០២០ គេក៏បានឡើងមកលេងឲ្យយុវជនក្រោមអាយុ១៨ឆ្នាំវិសាខាក្នុងវ័យ១៦ឆ្នាំ។

មានទីតាំងហ្វឹកហាត់ និងកន្លែងស្នាក់នៅហូបចុកគ្រប់គ្រាន់ធ្វើឲ្យយុវជនវ័យក្មេងដែលធ្លាប់មានប្រវត្តិកម្សត់មួយរូបដាក់ចិត្តដាក់កាយប្រឹងប្រែងគ្មានដែនកំណត់។ រហូតដល់ឆ្នាំ២០២១នេះគេក៏បានផ្លាស់មកលេងឲ្យព្រៃវែង ហើយក៏បានជាប់ជម្រើសជាតិទៅលេងនៅបារ៉ែនកាលពីេលលថ្មីៗនេះ ព្រមទាំងបង្ហាញឲ្យប្រិយមិត្តកម្ពុជារាប់ម៉ឺននាក់សរសើថាបង្ហាញទម្រង់លេងច្បាស់ និងមានភាពក្លាហានហ៊ានលេងថែមទៀតផង៕