ប្រាក់ សុវណ្ណារ៉ា ថាសមត្ថភាព ចន្ធា និង នូរុណ ឈានដល់កម្រិតជម្រើសជាតិឈុតធំហើយ

2021-06-01 06:00:00
បាល់ទាត់

2021-06-01 06:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ប្រាក់ សុវណ្ណារ៉ា បានបង្ហាញទស្សនៈថា ការជ្រើសរើសខ្សែប្រយុទ្ធវ័យក្មេង សៀង ចន្ធា និង ម៉ាត់ នូរុណ ឱ្យទៅចូលក្រុមជម្រើសជាតិឈុតធំគឺជាការសម្រេចចិត្តដ៏ត្រឹមត្រូវ ព្រោះពួកគេមានសមត្ថភាព និងជាកីឡាករដែលតែងរកបានគ្រាប់បាល់នៅលីគកំពូលកម្ពុជា។

លោក ប្រាក់ សុវណ្ណារ៉ា

អតីតគ្រូជម្រើសជាតិកម្ពុជាអំឡុងឆ្នាំ ២០០៨-២០០៩ និង ២០១២-២០១៣ បានពន្យល់បែបនេះថា ៖«ទាក់ទងនឹងគុណភាពប្រយុទ្ធ យើងសព្វថ្ងៃនេះយើងដឹងហើយបើទោះបីជា សៀង ចន្ធា ទោះបីជា ម៉ាត់ នូរុណ យើងថាជាកីឡាករក្មេងជំនាន់ក្រោយ ក៏ប៉ុន្តែពួកគាត់ហ្នឹងសុទ្ធតែជាកីឡាករដែលរកគ្រាប់នៅក្នុងលីគកំពូលរបស់យើង អ៊ីចឹងការរើសយុវជនដែលលេងនៅក្នុងលីគរបស់យើង យើងថាក្មេងមែន ប៉ុន្តែពួកគាត់សមត្ថភាពអីហ្នឹង គឺឈានដល់កម្រិតជម្រើសជាតិហ្នឹងហើយ (ឈុតធំ) អាហ្នឹងយើងនិយាយពីសៀងចន្ធា និងម៉ាត់នូរុណ»។

អតីតគ្រូក្លឹបព្រះខ័នរាជស្វាយរៀង ណាហ្គាវើលដ៏ គិរីវង់សុខសែនជ័យ បឹងកេត និងនគរបាលជាតិ បានបន្ថែមទៀតថាកីឡាករបឹងកេតពីររូបនេះ ក៏អាចនឹងជាប់ជម្រើសដំបូង១១នាក់ទៀតផង ក្នុងជំនួបទល់នឹងម្ចាស់ផ្ទះបារ៉ែននាថ្ងៃទី ៣ ខែមិថុនា ឆ្នាំ២០២១ខាងមុខ។

ទោះបីជាយ៉ាងណា លោកថាបាល់ទាត់លេង១១នាក់ ដូច្នេះត្រូវការណាស់ការយល់ចិត្ត និងការសហការគ្នាបានល្អនៅក្នុងក្រុមទាំងមូល ហើយការជម្រើសរើសក្រុមយុវជនឱ្យចូលរួមក្រុមឈុតធំ គឺជាជ្រើសរើសដ៏សមស្របទៅតាមការប្រកួតដែលនៅសេសសល់ និងអភិវឌ្ឍពួកគេ ដើម្បីត្រៀមព្រឹត្តិការណ៍ធំៗនាពេលខាងមុខ ជាពិសេសស៊ីហ្គេមលើកទី៣២ កម្ពុជាធ្វើជាម្ចាស់ផ្ទះឆ្នាំ២០២៣៕

អត្ថបទ៖ អ៊ុំ សុភក្តិ