ផ្លូវការ Conte បញ្ចប់កុងត្រាជាមួយ Inter ហើយ សង្ស័យទៅកាន់ Real ឬ Spurs

2021-05-27 03:06:59
បាល់ទាត់

2021-05-27 03:06:59
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Antonio Conte បានសម្រេចចិត្តបញ្ចប់តួនាទីជាអ្នកចាត់ការនៅ Inter Milan ហើយ ៣សប្ដាហ៍បន្ទាប់ពីជួយក្រុមនេះឈ្នះពាន Serie A ជាលើកដំបូងក្នុងរយៈពេល១១ឆ្នាំ។

អ្នកចាត់ការសញ្ជាតិអ៊ីតាលីវ័យ៥១ឆ្នាំបានចំណាយពេល២ឆ្នាំដឹកនាំ Inter ហើយនៅសល់កុងត្រាមួយឆ្នាំទៀតជាមួយក្លឹប។ ប៉ុន្តែការសម្រេចចិត្តបញ្ចប់កុងត្រាមុនកំណត់ត្រូវបានព្រៀមព្រៀងជាផ្លូវការរវាង Conte និង Inter។

Conte ថ្មីៗនេះត្រូវលេចឮអាចនឹងទៅដឹកនាំ Real Madrid ក្រោយ Zinedine Zidane ទំនងនឹងចេញពីក្លឹបនៅរដូវក្ដៅនេះ ហើយ Spurs តំណែងអ្នកចាត់ការក៏ទំនេរផងដែរ។ ត្បិតតែឈ្នះពានមែន Inter បច្ចុប្បន្នកំពុងជួបបញ្ហាហិរញ្ញវត្ថុ ដែលរំពឹងនឹងអាចកាត់ប្រាក់ខែបុគ្គលិក និងលក់កីឡាករខ្លះនៅរដូវក្ដៅនេះ។

អតីតអ្នកចាត់ការរបស់ Juventus លោក Massimiliano Allegri និងគ្រូរបស់ Lazio បច្ចុប្បន្នលោក Simone Inzaghi ត្រូវបានសារព័ត៌មានអ៊ីតាលីយល់ឃើញថា អាចនឹងមកស្នងតំណែងរបស់លោក Conte នៅក្លឹប Inter Milan៕

ប្រភព៖ BBC ប្រែសម្រួល៖ ហេង សុធារិទ្ធិ