បង្ហាញសមត្ថភាព៧ប្រកួត ជ័យ ចិត្រា មានកម្លាំងចិត្តខ្លាំងជាងមុន

2020-09-04 02:54:43
បាល់ទាត់

2020-09-04 02:54:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើការពារ និងបម្រើប្រយុទ្ធ ជ័យ ចិត្រា មានកម្លាំងចិត្តខ្លាំងជាងមុន ក្រោយរូបគេមានឱកាសបង្ហាញសមត្ថភាពបាន៧ប្រកួត ឱ្យក្លឹបបាល់ទាត់នគរបាលជាតិ ក្នុងការប្រកួតដណ្ដើមពានរង្វាន់សម្ដេច ហ៊ុន សែន និងលីគកំពូលកម្ពុជារដូវកាលឆ្នាំ២០២០នេះ។

ជ័យ ចិត្រា ពេលប៉ះគិរីវង់សុខសែនជ័យក្នុងលីគកំពូលកម្ពុជាឆ្នាំ២០២០

អតីតសិស្សអាហារូបករណ៍ Futsal នៅប្រទេសថៃ បញ្ជាក់ថា ៖«និយាយទៅអារម្មណ៍ពេលនេះ ក៏វាផ្លាស់ប្ដូរដែរ មានអារម្មណ៍ថាប្រសើរហើយល្អ ហើយមានកម្លាំងចិត្តខ្លាំងជាងមុន។ កន្លងមកគ្រូដឹកនាំមុន យើងធ្វើមិនសូវបានល្អ ទម្រង់លេងយើង យើងនៅមិនទាន់មានអ្វីដែលថាគាត់ចង់បាន»។

ក្នុងពានសម្ដេច ហ៊ុន សែន កីឡាករវ័យ២២ឆ្នាំ បានជាប់ជម្រើស១១នាក់ដំបូង២ប្រកួត ខណៈលីគកំពូលកម្ពុជា MCL ជាប់២ប្រកួត។ យ៉ាងណា ចិត្រា នៅមិនទាន់ប្រមូលអារម្មណ៍បានល្អនៅឡើយ ហើយរូបគេប្ដេជ្ញាធ្វើឱ្យល្អតាមដែលអាចធ្វើបាន ដើម្បីជួយលើកមុខមាត់ក្រុម។

ជ័យ ចិត្រា ប៉ះអង្គថាយហ្គឺរក្នុងលីគកំពូលកម្ពុជាឆ្នាំ២០២០

ដូចកីឡាករផ្សេងៗដែរ អ្នកស្រុកគិរីវង់ខេត្តតាកែវ ហក់ប្រឡូកក្នុងវិស័យបាល់ទាត់ ព្រោះស្រលាញ់ និងមានក្ដីស្រមៃ ចង់ក្លាយជាកីឡាកបាល់ទាត់អាជីព និងជាប់ជម្រើសជាតិតំណាងប្រទេសកម្ពុជា។

គួរបញ្ជាក់ថា ជ័យ ចិត្រា ធ្លាប់លេងឱ្យក្លឹបក្រសួងការពារជាតិអំឡុងឆ្នាំ២០១៧ និងផ្លាស់ទៅក្លឹបនគរបាលជាតិក្នុងឆ្នាំ ២០១៨ រហូតដល់បច្ចុប្បន្ន៕

អត្ថបទ៖ អ៊ុំ សុភក្តិ