ឃួន ឡាបូរ៉ាវី ទម្លាយសុបិនអាក្រក់ចាំមិនភ្លេចមួយ ក្នុងអាជីពបាល់ទាត់

2020-07-30 04:19:27
បាល់ទាត់

2020-07-30 04:19:27
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូបង្វឹកក្រុមយុវជនបឹងកេត អាយុក្រោម១៥ឆ្នាំ ឃួន ឡាបូរ៉ាវី បានទម្លាយឱ្យដឹងពីរឿងអាក្រក់មួយ ដែលលោកចាំមិនភ្លេច គឺវះកាត់សរសៃជង្គង់ នៅអំឡុងឆ្នាំ២០២០។

អតីតខ្សែប្រយុទ្ធបឹងកេត បានសរសេរលើបណ្ដាញសង្គមហ្វេសប៊ុករបស់ខ្លួនថា ៖«ថ្ងៃទី៣១/០៧/២០១២ គឺជាសុបិនដ៏អាក្រក់មួយនៅក្នុងជីវិតបាល់ទាត់របស់ខ្ញុំ គឺត្រូវវះកាត់សរសៃជង្គង់ ប៉ុន្តែដោយសារតែការប្រឹងប្រែងមិនបាក់ទឹកចិត្ត និងការលើកទឹកចិត្តធ្វើអោយខ្ញុំចំណាយពេលមិនដល់មួយឆ្នាំសម្រេចបំណងធំមួយ ដែលមិនអាចបំភ្លេចបានក្នុងអាជីពមួយនេះ គឺរួមចំណែកអោយក្លឹបលើកពាន MCL ២០១៣ លើកដំបូង និងទទួលបានរង្វាន់ Best Player និង Top Scorer ២០១៣»។

បន្ទាប់ពីវះកាត់ កីឡាករត្រូវការសម្រាកព្យាបាលរាប់ខែ ឬរហូតដល់ឆ្នាំ ហើយទម្រង់លេង១០០% ច្បាស់មានការធ្លាក់ចុះ ដែលបង្កជាក្ដីកង្វល់ធំក្នុងអាជីពបាល់ទាត់ ប៉ុន្តែយ៉ាងណាដោយមានការព្យាយាម មិនបាក់ទឹកចិត្ត មានការលើកទឹកចិត្ត ទើបធ្វើឱ្យអតីតខ្សែប្រយុទ្ធជម្រើសជាតិកម្ពុជាអាចលេងវិញបាន ហើយថែមទាំងជួយឱ្យក្លឹបព្រះខ័នរាជស្វាយរៀង លើកពាន MCL ឆ្នាំ២០១៣ និងទទួលបានពានរង្វាន់កិត្តិយសផ្ទាល់ខ្លួនជាច្រើនដែរ។

ក្នុងកិច្ចសម្ភាសន៍ខ្លីជាមួយ Sabay អម្បាញ់មិញនេះ ឃួន ឡាបូរ៉ាវី បានលើកទឹកចិត្តដល់កីឡាករ ដែលកំពុងមានបញ្ហារបួសទាំងអស់ ឱ្យមានការខិតខំប្រឹងប្រែង និងមិនត្រូវបាក់ទឹកចិត្តឡើយ។

គ្រូបង្វឹកមានដើមកំណើតមកពីកំពង់ចាម បានរងរបួសសរសៃពួរជង្គង់ ពេលព្រះខ័នរាជស្វាយរៀង ប្រកួតជាមួយនគរបាលជាតិ ដែលជាក្រុមខ្លាំងឈរកំពូលតារាងអំឡុងឆ្នាំ ២០១២៕