Dele Alli សុំទោសចំពោះការថតវីដេអូ ចំអកវីរុសកូរ៉ូណារបស់ខ្លួន

2020-02-10 02:49:00
បាល់ទាត់

2020-02-10 02:49:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Dele Alli កីឡាករក្លឹប Tottenham បានធ្វើឱ្យខ្លួននិងក្លឹបទាំងមូល អាប់ឱនកិត្តិយស បន្ទាប់ពីរូបគេ ថតវីដេអូលេងសើចលើបណ្ដាញសង្គម អំពីវីរុសរលាកផ្លូវដង្ហើមប្រភេទថ្មី ណូវែល កូរ៉ូណា ដែលបានសម្លាប់មនុស្សជាង ៨០០នាក់ទូទាំងពិភពលោក។ យ៉ាងណាខ្សែបម្រើកណ្ដាលសញ្ជាតិអង់គ្លេស បានចេញមុខសុំទោសនូវកំហុស មិនសមរម្យរបស់ខ្លួន។

នៅប្រលានយន្តហោះមួយអំឡុងពេលសម្រាក Premier League នារដូវរងា គេឃើញកីឡាករវ័យ២៣ឆ្នាំ ពាក់ម៉ាស់។ មានកាមេរ៉ាមួយ បានភ្ជង់ទៅកាន់បុរសអាស៊ីម្នាក់ នៅកន្លែងចេញដំណើរ បន្ទាប់មកក៏បែរកាមេរ៉ានោះ ទៅកាន់ដបលាងដៃជាមួយ Caption ថា "ជំងឺកូរ៉ូណាត្រូវតែរហ័សជាង ទើបអាចចម្លងខ្ញុំបាន"។

យ៉ាងណាក្រោយវីដេអូ ត្រូវបានគេចែករំលែកយ៉ាងច្រើន លើបណ្ដាញសង្គម Weibo របស់ចិន Dele Alli បានលុបចេញភ្លាមៗ និងថតវីដេអូថ្មីមួយទៀត សុំទោសជាសាធារណៈ។

រូបគេនិយាយថា៖" ខ្ញុំសុំទោសចំពោះវីដេអូ ដែលខ្ញុំបង្ហោះលើ Snapchat កាលពីម្សិលមិញ។ វាមិនមែនជារឿងលេងសើចទេ។ សូមផ្ញើក្ដីស្រលាញ់ គំនិត និងការអធិដ្ឋានរបស់ខ្ញុំ ចំពោះអ្នករាល់គ្នាក្នុងប្រទេសចិន"។

យោងតាម CNN មនុស្សជាង៨០០នាក់បានស្លាប់ ជុំវិញពិភពលោកដោយជំងឺកូរ៉ូណា និងជាង ៣៧ ០០០នាក់ បានឆ្លងវីរុសនេះ។ វាបានកើតឡើងដំបូងក្នុងប្រទេសចិន និងបានរីករាលដាលដល់ប្រទេស ២៨ផ្សេងទៀត ហើយវាក៏បានប៉ះពាល់ដល់វិស័យកីឡាបាល់ទាត់ផងដែរ។

ជាក់ស្ដែង Odion Ighalo កីឡាករថ្មីរបស់ Manchester United ដែលប្រកាសជាផ្លូវការចូលរួមជាមួយ Red Devils ពីក្លឹប Shanghai Shenhua ប្រទេសចិនកាលពីខែមករា ក៏មិនអាចធ្វើដំណើទៅជំរុំហ្វឹកហាត់ជាមួយក្រុមបានទេ ក្រោមហេតុផលខ្លាចរូបគេប៉ះពាល់ជាមួយវីរុសមួយនេះ៕

ប្រភព៖ Goal ប្រែសម្រួល៖ អ៊ុំ សុភក្តិ