ខ្សែ​ប្រយុទ្ធ​ Angel Di Maria ត្រូវ​បាន​ Manchester United ផ្ដល់​លេខ៧ ពេល​មក​ដល់​ទឹកដី Old Trafford ក្នុង​ឆ្នាំ ​២០១៤ ប៉ុន្តែ​កីឡាករ​អាហ្សង់ទីន​សារភាព​ថា​ រូបគេ​ចង់​បាន​លេខ​ផ្សេង មិន​មែន​លេខ​៧​ឡើយ។

Di Maria បន្ថែម​ថា៖"នៅ Real Madrid លេខ​១១ គេ​យក​បាត់​ហើយ ដូច្នេះ​ខ្ញុំ​យក​លេខ​២២ នៅ Manchester United គេ​ឱ្យ​លេខ​៧​ឆ្នាំ ខ្ញុំ​អត់​មាន​ជម្រើស ខ្ញុំ​ចង់​បាន​លេខ​១១"។

នៅ Manchester United លេខ​៧ ជា​លេខ​សម្រាប់​កីឡាករ​ល្អៗ ហើយ​កីឡាករ​ពាក់​លេខ​នេះ​ពី​មុន​មាន​ដូចជា Eric Cantona និង David Beckham ជាដើម។

កីឡាករ​វ័យ​៣១​ឆ្នាំ Di Maria បាន​ចំណាយ​ពេល​មួយ​រដូវ​កាល​នៅ Old Trafford មុន​ពេល​ផ្លាស់​ទៅ Paris Saint-German ឆ្នាំ ​២០១៥។ នៅ​ទឹកដី​បារាំង​​ រូបគេ​បង្ហាញ​ខ្លួន ២១០​លើក រក​បាន​ ៨០គ្រាប់ និង​ជួយក្លឹបលើក​ពាន Ligue 1 បី​ដង។

បើ​និយាយ​ពី​លេខ​ ១១ ​នៅ​ PSG កីឡា​ករ​រូប​នេះ​ប្រាប់​ថា មិន​ទាន់​មាន​អ្នក​យក ​រូប​គេ​ក៏​យក ហើយ​ណា​មួយ​លេខ​នេះ ជា​លេខ​ដែល​រូប​គេ​ស្រលាញ់ និង​ពាក់​ញឹកញាប់​កាល​ពី​ក្មេង។

Di Maria ថា៖" PSG សំខាន់​ខ្លាំង​ណាស់​សម្រាប់​ខ្ញុំ។ ពួកគេ​ស្វាគមន៍​ខ្ញុំ​យ៉ាង​កក់ក្ដៅ អំឡុង​ពេល​ខ្ញុំ​ពិបាក​នៅ​ក្លឹប Manchester។ ខ្ញុំ​មក​ទី​នេះ​ជាមួយ​មហិច្ឆតា និង​ការ​តាំង​ចិត្ត ដើម្បី​ជ័យ​ជម្នះ។ បន្តិច​ម្ដងៗ​ខ្ញុំ​ឃើញ​ថា ខ្ញុំ​អាច​ធ្វើ​បាន ដូច្នេះ​ហើយ​ខ្ញុំ​អាច​ជួយ​ក្លឹប​សម្រេច​បាន​នូវ​រឿង​ល្អៗ​ជាច្រើន។ ខ្ញុំ​តែង​តែ​ប្រឹង​អស់​ពី​សមត្ថភាព ដើម្បីជួយ​ក្លឹប​ឱ្យ​ជោគជ័យ"៕ ​ ​