លោក ខូវ ឆាយ៖ ពាន Pre-Season រដូវកាលក្រោយៗ អាចមានក្លឹបបរទេសចូលរួម

2020-01-16 07:37:23
បាល់ទាត់

2020-01-16 07:37:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតពានរង្វាន់ TV5 Pre Season Championship ដែលមាន ៤ក្រុមចូលរួមនឹងចាប់ផ្ដើមនៅល្ងាចថ្ងៃទី១៦ ខែមករានេះហើយ ពោលគឺជាការប្រកួតមិត្តភាពក្នុងស្រុកដើម្បីត្រៀមសម្រាប់រដូវកាលថ្មីឆ្នាំ២០២០។

លោក ខូវ ឆាយ អគ្គលេខាធិការក្លឹបក្រសួងការពារជាតិថា៖ «នេះជាលើកទី១ហើយ ដែលយើងរៀបចំពានរង្វាន់នេះឡើង ដោយមានភាពឆាប់រហ័សអ៊ីចឹង មិនមានការត្រៀមខ្លួនសម្រាប់កម្មវិធីនេះទេ។ យើងគ្រាន់តែចង់ឲ្យកម្មវិធីលើកនេះ ក្លាយជាជំនួបមួយដែលយើងអាចដកស្រង់បច្ចេកទេសគ្នាទៅវិញទៅមកសម្រាប់ឆ្នាំទី១នេះ។ ការរៀបចំយើងអត់មានជាប្រាក់រង្វាន់អីទេ យើងមានតែពានមួយសម្រាប់លើកទឹកចិត្តក្រុមដែលធ្វើបានល្អ ប៉ុន្តែនៅថ្ងៃអនាគតយើងមានផែនការរៀបចំឲ្យវាធំជាងនេះ អាចរហូតដល់យើងអញ្ជើញក្លឹបពីបរទេសមកចូលរួម»។

លោកបន្តទៀតថាដោយសារតែក្លឹបធំៗដូចជា បឹងកេត វិសាខា និងស្វាយរៀង សុទ្ធតែរវល់ប្រកួតមិត្តភាពក្រៅប្រទេស អ៊ីចឹងយើងមិនអាចអញ្ជើញគាត់ឲ្យចូលរួមបានទេ ដូច្នេះទើបយើងអញ្ជើញក្លឹបដែលទំនេរហើយពួកគាត់អាចចូលរួមបាន។

ការប្រកួតនេះមានរយៈពេលតែ៣ថ្ងៃប៉ុណ្ណោះ ពោលគឺចាប់ផ្ដើមពីល្ងាចនេះតែម្ដង ថ្ងៃទី១៦-១៨ ខែមករា ឆ្នាំ២០២០ នៅកីឡដ្ឋានស្តាតចាស់។ ៤ក្រុមដែលចូលរួមនោះមានដូចជា ក្លឹបបាល់ទាត់ក្រសួងការពារជាតិ (ម្ទាស់ផ្ទះ) ក្លឹបបាល់ទាត់សូលទីឡូអង្គរ ក្លឹបបាល់ទាត់ណាហ្គាវើល និងក្លឹបបាល់ទាត់អាស៊ីអឺរ៉ុប។ ការប្រកួតនេះ នឹងមានផ្សាយបន្តផ្ទាល់តាមស្ថានីយទូរទស្សន៍ប៉ុស្តិ៍លេខ៥ផងដែរ៕

អត្ថបទ៖ Yorn Sovieth