Ronaldinho ថាត្រៀមជាស្រេច មកជួបអ្នកគាំទ្រកម្ពុជានៅ Tiger Street Football Festival 2020

2019-07-31 08:35:38
បាល់ទាត់

2019-07-31 08:35:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់ជើងឯកTiger Street Football Festival 2019 បានទៅជួបផ្ទាល់ជាមួយកំពូលកីឡាករបាល់ទាត់លំដាប់ថ្នាក់ពិភពលោក “RONALDINHO” នៅគេហដ្ឋានលោកជាលក្ខណៈឯកជន។ ដំណើរទស្សនកិច្ច នេះគឺនៅទីក្រុង Rio de Janeiro ប្រទេសប្រេស៊ីលចំនួនបីថ្ងៃគឺ ថ្ងៃទី ១៨ដល់១៩ខែកក្កដាឆ្នាំ២០១៩។

ក្រុមកីឡាករកម្ពុជា និងក្រុមការងារស្រាបៀរថៃហ្គ័រ បានទទួលបានការស្វាគមន៍យ៉ាងកក់ក្តៅ មកកាន់គេហដ្ឋានផ្ទាល់របស់កំពូលកីឡាករបាល់ទាត់សញ្ជាតិប្រេស៊ីល លោក RONALDINHO មានការថតរូបអនុស្សាវរីយ៍ជាមួយក្រុមកីឡាករកម្ពុជា។ ជាពិសេសលោក RONALDINHO បានចុះហត្ថលេខាផ្ទាល់លើអាវកីឡាករជាច្រើនទុកជាកាដូពិសេសជូនសមាជិកទាំងអស់នៃក្រុមកីឡាករកម្ពុជា និងបានរៀបចំកម្មវិធីជប់លៀង អាំងសាច់បែបអាហារប្រចាំប្រទេសប្រេស៊ីល និងអាហារប៊ុហ្វេច្រើនមុខដ៏ឆ្ងាញ់ពិសា និងមានបម្រើភេសជ្ជៈជាច្រើន អមជាមួយការចាក់តន្រ្តីកំដរអារម្មណ៍ក្នុងបរិយាកាសសប្បាយរីករាយ និងស្និទ្ធស្នាលជាទីបំផុត។

Ronaldinho បានមានប្រសាសន៍ថា លោកពិតជារំភើបរីករាយដែលបានរៀបចំពិធីជប់លៀងនៅក្នុងបវិវេណគេហដ្ឋានផ្ទាល់របស់លោកដើម្បីស្វាគមន៍ក្រុមម្ចាស់ជើងឯកនៃកម្មវិធី Tiger Street Football Festival 2019 មកពីប្រទេសកម្ពុជា ជាពិសេសផ្តល់ការណែនាំបច្ចេកទេសលេង និងចែករំលែកបទពិសោធន៍ល្អៗរបស់លោកជូនក្រុមម្ចាស់ជើងឯក។ លោកត្រៀមខ្លួនរួចជាស្រេច ក្នុងការមកទស្សនាប្រទេសកម្ពុជា និងមកជួបផ្ទាល់អ្នកគាំទ្រកម្ពុជា ក្នុងព្រឹត្តិការណ៍ប្រកួតបាល់ទាត់ Tiger Street Football Festival ក្នុងខែមករា ឆ្នាំ ២០២០ ខាងមុខនេះ។

ជាពិសេសទៅទៀតក្នុងដំណើរទស្សនកិច្ចនេះ ក្រុមកីឡាករកម្ពុជា បានចូលទស្សនាផ្ទាល់នូវការប្រកួតវគ្គ១ភាគ៤ផ្ដាច់ព្រ័ត្រនៅពហុកីឡដ្ឋានដ៏ធំឈ្មោះ Maracanã រវាងក្រុម Flamengo និង Athletico Paranaense ដើម្បីប្រកួតដណ្តើមពានរង្វាន់ប្រេស៊ីល (Copa do Brasil) ដោយមានការចូលរួមពីអ្នកគាំទ្រកីឡាបាល់ទាត់រាប់ម៉ឺននាក់។ សំឡេងនូវការទូងស្គរ និងស្រែកហ៊ោអបអរពេញពហុកីឡាដ្ឋានយ៉ាងរំភើបសប្បាយរីករាយក្រៃលែង។ នេះគឺជាបទពិសោធន៍លើកដំបូងក្នុងការទស្សនាដោយផ្ទាល់នូវកម្មវិធីប្រកួតបាល់ទាត់នៅក្នុងពហុកីឡាដ្ឋានអន្តរជាតិនៅក្នុងទ្វីបអាមេរិកឡាទីនសម្រាប់ក្រុមម្ចាស់ជើងឯក និងក្រុមការងារស្រាបៀរថៃហ្គ័រដែលមានអារម្មណ៍រំភើប និងសប្បាយរីករាយបំផុតដែលមិនអាចបំភ្លេចបាន។

លើសពីនេះទៀត បានរីករាយទស្សនានៅកន្លែងទេសចរណ៍ដ៏ពេញនិយមនៅទីក្រុង Rio ដូចជា ទស្សនាទេសភាពភ្នំ Corcovado និង Sugarloaf ដើរលំហែកម្សាន្តបន្ធូរអារម្មណ៍នៅតាមឆ្នេរសមុទ្រ Copacabana ដ៏វែង និងស្រស់ស្អាត អមជាមួយអគារខ្ពស់ៗដែលមានរចនាបទទំនើបគួរឲ្យទាក់ទាញនៅកណ្តាលទីក្រុង Rio។

ក្នុងឱកាសពិសេសនេះផងដែរ លោក ភូ គឹម សែ ដែលជាប្រធានក្រុមម្ចាស់ជើងឯក Tiger Street Football Festival 2019 បានប្រសាសន៍ថា លោក និងសមាជិកទាំងអស់របស់លោក មានអារម្មណ៍រំភើបរីករាយ និងរំជើបរំជួលចិត្តខ្លាំងណាស់ ដែលបានជួបផ្ទាល់ជាមួយកំពូលតារាបាល់ទាត់ក្នុងដួងចិត្តរបស់លោកគឺលោក RONALDINHO នៅក្នុងគេហដ្ឋានផ្ទាល់របស់គាត់នៅក្នុងទីក្រុង Rio ប្រទេសប្រេស៊ីល ហើយលោកសង្ឃឹមថា Tiger Street Football Festival នឹងមានការរៀបចំកម្មវិធីជួបផ្ទាល់បែបនេះកាន់តែអស្ចារ្យជាមួយនឹងកំពូលវីរបុរសបាល់ទាត់លំដាប់ពិភពលោកនៅឆ្នាំក្រោយៗទៀត។

ឆ្នាំនេះជាភាពជោគជ័យដ៏ធំធេង និងកាន់តែប្លែកខុសពីឆ្នាំមុនៗ សម្រាប់កម្មវិធី Tiger Street Football Festival 2019 ដោយបានផ្តល់បទពិសោធន៍ដ៏កម្រមាន មិនដែលធ្លាប់មានពីមុនមក និងមានតែម្តងគត់ក្នុងមួយជីវិតសម្រាប់ក្រុមកីឡាករកម្ពុជាជួបផ្ទាល់ក្នុងគេហដ្ឋានផ្ទាល់របស់កំពូលកីឡាករបាល់ទាត់លំដាប់ថ្នាក់ពិភពលោក RONALDINHO នៅទីក្រុង Rio ប្រទេសប្រេស៊ីល៕

អត្ថបទ៖ ប្រុស យុទ្ធ