រកឃើញជើងឯកពានរង្វាន់ KMH Champions League ប្រាក់រង្វាន់១២ ០០០ដុល្លារ

2018-07-23 04:39:47
បាល់ទាត់

2018-07-23 04:39:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមគ្រួសារប៊ីចេង បានក្លាយជាម្ចាស់ជើងឯកថ្មីនៃពាន KMH Champions League ប្រចាំឆ្នាំ២០១៨ ក្រោយពីបានផ្ដួលក្រុម Down Town ក្នុងលទ្ធផល ២-១ ក្នុងការប្រកួតវគ្គផ្តាច់ព្រ័ត្រ។

ក្រុមគ្រួសារប៊ីចេង

ពានរង្វាន់ KMH Champions League រដូវកាល២០១៨នេះ បានបិទបញ្ចប់ហើយកាលពីថ្ងៃសៅរ៍កន្លងទៅ នៅទីលាន KMH Park ស្ថិតនៅខណ្ឌពោធិ៍សែនជ័យ។ វគ្គផ្ដាច់ព្រ័ត្រនេះ គឺជាការជួបគ្នារវាងក្រុមគ្រួសារប៊ីចេង ជាមួយ Down Town។ ជំនួបនេះ ពិតជាស្វិតស្វាញខ្លាំងមែនទែន ដោយពួកគេបញ្ចប់ត្រឹមលទ្ធផលស្មើគ្នា ១-១ ប៉ុណ្ណោះនៅ៩០នាទី។ ឈានដល់នាទីបន្ថែម ក្រុមគ្រួសារប៊ីចេង រកគ្រាប់បាល់ឈ្នះនៅនាទី ទី១០៥ តាមរយៈកីឡាករវណ្ណារ៉ា ដើម្បីឱ្យពួកគេក្លាយជាម្ចាស់ជើងឯកពានរង្វាន់ KHM Champions League នេះតែម្ដង។

សម្រាប់ប្រាក់រង្វាន់វិញ គ្រួសារប៊ីចេង លេខ១ ទទួលបានពាន១ និងប្រាក់រង្វាន់ ១២ ០០០ដុល្លារ លេខ២បានទៅលើក្រុម Down Town ប្រាក់រង្វាន់ ៦ ០០០ដុល្លារ លេខ៣បានទៅលើក្រុមអាណាចក្របៃតង ប្រាក់រង្វាន់៣ ០០០ដុល្លារ និងលេខ៤បានទៅលើក្រុមពិស្ណុកា ប្រាក់រង្វាន់ ១ ៥០០ដុល្លារ។ ក្រៅពីនេះទៀតសោត កីឡាកររកគ្រាប់បាល់បានច្រើនជាងគេ ជា អូលី របស់ក្រុមអាណាចក្របៃតងបានរង្វាន់៤០០ដុល្លារ។ អ្នកចាំទីឆ្នើមបានទៅលើ កីឡាករអ៊ុក ម៉ិច ទទួលបានប្រាក់រង្វាន់ចំនួន៤០០ដុល្លារ។ ក្រុមលេងដោយយុត្តិធម៌ (Fair Play) បានទៅលើអាណាចក្របៃតង ប្រាក់រង្វាន់ ៧៥០ដុល្លារ។

លោក កាំង សេន ស្ថាបនិកពាន KMH Champions League ដែលជាពានរង្វាន់បាល់ទាត់ពាក់កណ្តាលអាជីពធំជាងគេនៅកម្ពុជាបានវាយតម្លៃថា នៅរដូវកាលទី៣នេះ មានការប្រកួតប្រជែងស្វិតស្វាញខ្លាំង បើធៀបនឹងពីរលើកកន្លង។ លោកបន្ថែមថា សមត្ថភាព បច្ចេកទេស និងទម្រង់លេងរបស់កីឡាករនៃក្រុមនីមួយៗ ក៏មានការរីកចម្រើនផងដែរ។ទន្ទឹមនឹងមើលឃើញពីការរីកចម្រើន លោកក៏អះអាងថា នៅរដូវកាលក្រោយនឹងរៀបចំឲ្យកាន់តែប្លែក និងអស្ចារ្យជាងនេះទៀត ពិសេសអាចមានការបន្ថែមប្រាក់រង្វាន់លើកទឹកចិត្តសម្រាប់ក្រុមម្ចាស់ជ័យលាភីទៀងផង៕

អត្ថបទ៖ មុន្នីរម្យ