ខ្សែ​ប្រយុទ្ធ​អង់គ្លេស Wayne Rooney ក្នុង​ថ្ងៃ​នេះ បាន​ទាយ​ថា Manchester City, Manchester United, Liverpool និង Chelsea នឹង​បញ្ចប់​រដូវ​កាល​ខ្លួន​ក្នុង​តំណែង Top4 ក្នុង​លីគ​កំពូល​អង់គ្លេស​នា​រដូវ​កាល​នេះ។ បើ​តាម​ការ​ទស្សន៍ទាយ Rooney ការណ៍​នេះបាន​ន័យ​ថា ក្លឹប Tottenham Hotspur និង Arsenal នឹង​នៅ​ក្រៅ​តំណែង​កំពូល​ទាំង ៤​នេះ។

កីឡាករ​អង់គ្លេស​បាន​ថ្លែង​ទៅ Sky Sports ថា៖ "ខ្ញុំ​គិត​ថា Chelsea ជា​ក្រុម​ល្អ។ បើ​ទោះ​ជា​ក្លឹប​ហាក់​មាន​បញ្ហា​ក៏​ដោយ​ក្នុង​ពេល​នេះ តែ​បើ​តាម​គំនិត​ខ្ញុំ លោក Antonio Conte នឹង​ដោះ​ស្រាយ​រឿង​នេះ​បាន​ ក្នុង​ពេល​ដ៏​ឆាប់​ខាង​មុខ ហើយ​នឹង​ជួយ​ក្លឹប​ឲ្យ​បញ្ចប់​ក្នុង​តំណែង Top 4"។

ខ្សែ​ប្រយុទ្ធ Rooney បាន​បន្ត៖ "ក្លឹប Manchester ទាំង​ពីរ​ប្រាកដ​ណាស់​នឹង​ស្ថិត​ក្នុង​ចំណោម​តំណែង​កំពូល​ទាំង ៤ នៅ​ពេល​ចប់​រដូវ​កាល​នេះ។ ក្លឹប Spurs ត្រូវ​តាម​យ៉ាង​ប្រកៀក​ប្រកិត​ជាមួយ Liverpool។ ដូច្នេះ បើ​តាម​ការ​ទស្សន៍ទាយ​របស់​ខ្ញុំ Chelsea, Manchester City, Liverpool និង Manchester United នឹង​បញ្ចប់​រដូវ​កាល​ខ្លួន​ក្នុង​តំណែង Top 4 នា​រដូវ​កាល​នេះ"។

នៅ​តែ ១២​ប្រកួត​ប៉ុណ្ណោះ លីគ​កំពូល​អង់គ្លេស​នឹង​បញ្ចប់​ហើយ​ក្នុង​រដូវ​កាល ២០១៧/១៨​នេះ។ បច្ចុប្បន្ន​ក្លឹប Manchester City កំពុង​កាង​កំពូល​តារាង​ជាមួយ​នឹង​ពិន្ទុ​ចំនួន ៦៩ តាម​ពី​ក្រោយ​ដោយ​ក្លឹប​បិសាច​ក្រហម​ដែល​មាន​ ៥៦​ពិន្ទុ។ Liverpool កំពុង​ឈរ​លេខ ៣ មាន ៥១ ពិន្ទុ ខណៈ Chelsea មាន​តិច​ជាង ១​ពិន្ទុ ឈរ​លេខ ៤។ ដោយ​ឡែក Spurs (៤៩ពិន្ទុ) កំពុង​ឈរ​ចំណាត់​ថ្នាក់​ទី ៥ ឯ​ Arsenal វិញ​មាន ៤៥​ពិន្ទុ ឈរ​លេខ ៦៕