- 2017-12-31 02:21:11
- បាល់ទាត់
កំពូលអ្នកប្រដាល់កម្ពុជា១០រូបល្បីខ្លាំងក្នុងឆ្នាំ២០១៧
- 2017-12-31 02:21:11
- ចំនួនមតិ 0 | ចំនួនចែករំលែក 0
កំពូលអ្នកប្រដាល់កម្ពុជា១០រូបល្បីខ្លាំងក្នុងឆ្នាំ២០១៧
ចន្លោះមិនឃើញ
អ្នកលេងគុនបុរាណខ្មែររាប់រយនាក់ដែលបានអង្រួនសង្វៀនខ្លាំងក្នុងឆ្នាំ២០១៧នេះ ប៉ុន្តែអ្នកប្រដាល់ខ្លះឡើងវ៉ៃទទួលបានការពេញចិត្តយ៉ាងខ្លាំងពីអ្នកពីអ្នកទស្សនា បើទោះជាពួកគាត់ពេលខ្លះបរាជ័យក៏ដោយ។ ទន្ទឹមជាមួយគ្នា អ្នកប្រដាល់មួយចំនួនក៏មិនសូវទទួលការពេញចិត្តខ្លាំងឡើយពីអ្នកទស្សនាដែរ បើទោះជាពួកគេទទួលបានជ័យជម្នះក៏ដោយ។ ខាងក្រោមអាចជាកីឡាករ១០នាក់ដែលទទួលបានការពេញចិត្តពីអ្នកទស្សនារាល់ពេលពួកគេឡើងវ៉ៃ ម្តងៗ។
១- កីឡាករ ឃីម ឌីម៉ា៖ អ្នកស្នេហាប្រដាល់គុនខ្មែរពិតជាស្រលាញ់ពេញចិត្ត ឃីម ឌីម៉ា ខ្លាំងណាស់រាល់ពេលដែលរូបគេវ៉ៃម្តង។ ពេលនៅលើសង្វៀនរូបគេកម្រលាក់ទុកកម្លាំងណាស់ដោយចេញស្នៀតវ៉ៃបានទាំងព្រម។ តាមរយៈការវ៉ៃចេញបានយ៉ាងល្អនេះ រូបគេតែងតែទទួលបានជ័យជម្នះរហូតក្នុងឆ្នាំ២០១៧។ រយៈពេល១២ខែចុងក្រោយនេះ រូបគេឈ្នះមេដាយមាសពីកីឡាស៊ីហ្គេម ឈ្នះខ្សែក្រវាត់១នៅសង្វៀនអាស៊ីអាគ្នេយ៍ និងខ្សែក្រវាត់១ទៀតនៅ CNC។
២- កីឡាករ ម៉ឺន សុភា៖
កណ្តាប់ដៃទម្ងន់យក្សឥតមេត្តា និងទម្ងន់ជើងមហិមាបានធ្វើឲ្យការប្រកួតរបស់កីឡាកររូបនេះទទួលបានការចាប់អារម្មណ៍យ៉ាងខ្លាំងពីអ្នកទស្សនា។ រូបគេជាម្ចាស់មេដាយប្រាក់ពីព្រឹត្តិការណ៍កីឡាស៊ីហ្គេមនៅប្រទេសម៉ាឡេស៊ី។ ៣- កីឡាករ ពេជ្រ ម្ទេសខ្មាំង៖ អ្នកលេងកណ្តាប់ដៃសកល និងគុនខ្មែររូបនេះរូបបានឲ្យមហាជនផ្តោតលើរូបគេយ៉ាងខ្លាំងតាមរយៈការប្រើសមត្ថភាពពិតក្នុងព្រឹត្តិការណ៍កីឡាស៊ីហ្គេមដើម្បីទទួលបានមេដាយសំរឹទ្ធលើផ្នែកប្រដាល់សកល។ ក្នុងព្រឹត្តិការណ៍ Khmer-Thai Fight កន្លងទៅនេះ ម្ទេសខ្មាងធ្វើបានយ៉ាងល្អដោយផ្តួលដៃគូដើមទឹកទី១។ និយាយរួមកីឡាកររូបនេះពេលឡើងសង្វៀនម្តងៗគឺប្រឹងវ៉ៃអស់ពីសមត្ថភាពតែម្តងដែលចំណុចនេះហើយជាចំណីចក្ខុដ៏ពិសេសសម្រាប់អ្នកទស្សនា។ ៤- កីឡាករ ឡៅ ចិត្រា៖
ថ្វីបើវ័យក្មេងខ្ចី ប៉ុន្តែសមត្ថភាពលើសង្វៀនពិតជាល្អឥតខ្ចោះសម្រាប់អ្នកទស្សនា។ កីឡាកររូបនេះក៏ជាទីពេញចិត្តសម្រាប់អ្នកគាំទ្រដែលនិយាមតាមដានទស្សនាសង្វៀនគុនខ្មែរប្រចាំសប្តាហ៍។ រូបគេប្រើស្នៀតសម្លាប់ដៃគូបានល្អទាំងព្រមក្នុងនោះកណ្តាប់ដៃ រន្ទះជើង កែង និងជង្គង់ពិតជាប្រើបានល្អ។ រូបគេជាម្ចាស់មេដាយប្រាក់ពីកីឡាស៊ីហ្គេម។ ៥- កីឡាករ ឡៅ ចន្ទ្រា៖ សម្រាប់រយៈពេល១២ខែចុងក្រោយនេះ ឡៅ ចន្ទ្រាហាក់ធ្លាក់ចុះប្រជាប្រិយភាពតិចតួច បើធៀបនឹងឆ្នាំ២០១៦ និងប្អូនប្រុសរបស់គេគឺ ឡៅ ចិត្រា។ យ៉ាងណា អ្នកទស្សនានៅតែពេញចិត្តទស្សនារាល់ការប្រកួតរបស់គេម្តងៗ។ ថ្វីបើមិនឈ្នះខ្សែក្រវាត់ ឬមេដាយលើឆាកអន្តរជាតិ ប៉ុន្តែរូបគេជាម្ចាស់មេដាយមាសក្នុងការប្រកួតថ្នាក់ជាតិ។ ៦- កីឡាករ រឿង សោភ័ណ្ឌ៖
អ្នកលេងកណ្តាប់ដៃឥតមេត្តា រឿង សោភ័ណ្ឌនៅតែជាទីពេញនិយមសម្រាប់អ្នកទស្សនា និងម្ចាស់កម្មវិធីដែលចង់បានរូបគេឡើងវ៉ៃ។ រយៈពេល២ឆ្នាំចុងក្រោយនេះរូបគេនៅតែរក្សាប្រជាប្រិយភាពបានល្អដដែលតាមរយៈសមត្ថភាពផ្តួលដៃគូដោយកណ្តាប់ដៃ និងទាត់ផ្តាប់ចានគឺជាចំណុចស្នូលរបស់គេ។ រូបគេជាម្ចាស់ខ្សែក្រវាត់ទម្ងន់៦៩គីឡូក្រាមនៅសង្វៀន PNN។ ៧- កីឡាករ ផល សោភ័ណ្ឌ៖
បើនិយាយពីវ៉ៃតាមបច្ចេកទេសពិតៗ គឺស្ទើររកកីឡាករណាផ្សេងទៀតឲ្យលើសិស្សក្លឹបតាឡីដំរីមានរិទ្ធិនេះណាស់។ ការវ៉ៃប្រយោលពីចម្ងាយដោយកណ្តាប់ដៃដែលធ្លាប់លេងសកល ការចេញជើងទាត់បានយ៉ាងលឿន និងដកថយបានយ៉ាងរហ័ស ព្រមទាំងវ៉ៃស្នៀតកែងបានល្អបានធ្វើឲ្យដៃគូកម្ររួចផុតពីសន្លប់ណាស់។ ទាំងនេះហើយដែលគេហៅថា មិនមែនវ៉ៃដោយកម្លាំងបាយ ប៉ុន្តែដោយបច្ចេកទេសដែលជាទីពេញចិត្តបំផុតសម្រាប់អ្នកទស្សនា។
៨- កីឡាករ ធឿន ធារ៉ា៖ ថ្វីបើ រូបគេមិនសូវបង្ហាញខ្លួនច្រើននៅសង្វៀនក្នុងរាជធានីភ្នំពេញ ប៉ុន្តែអ្នកតាមដានវិស័យប្រដាល់ពិតជាបានស្គាល់រូបគេយ៉ាងច្បាស់តាមរយៈបណ្តាញសង្គម និងយូធូបដែលរូបគេល្បីរន្ទឺនៅទឹកដីថៃ។ រូបគេទើបលេចមុខប្រកួតជើងឯកជាតិដោយបានយកឈ្នះជើងខ្លាំង រឿង សោភ័ណ្ឌ និងចុងក្រោយ ផ្តួលកីឡាករថៃនៅសង្វៀនបាយ័ន។ រូបគេមានកាយសម្បទាល្អ កម្លាំងខ្លាំង និងស្នៀតប្រយុទ្ធល្អ ជាពិសេសកែងតែម្តងដែលធ្វើឲ្យរូបគេក្លាយជាកីឡាករស្ថិតក្នុងក្រសែភ្នែកអ្នកទស្សនា។
៩- កីឡាករ ឡុង សុភី៖
បើនិយាយពីកីឡាករដែលវ៉ៃមិនល្អមើល និងធ្វើឲ្យអ្នកទស្សនាធុញ ឡុង សុភីក៏ជាកីឡាករម្នាក់ដែរ ប៉ុន្តែបើនិយាយពីសមិទ្ធផលវិញគឺរូបគេធ្វើបានល្អ។ មួយរយៈពេលចុងក្រោយនេះ រូបគេបានបង្កើនសមត្ថភាពគួរឲ្យកត់សំគាល់ដែលខុសប្លែកពីមុន។ រូបគេបានយកឈ្នះជើងខ្លាំងថៃ Fasurak ដែលធ្លាប់ឈ្នះ ឡៅ ចន្ទ្រា។ ទាំងនេះហើយដែលជាកត្តាទាក់ទាញអ្នកគាំទ្រចាប់អារម្មណ៍រូបគេ។
១០- កីឡាករ មាស ម៉ើ៖
អ្នកលេងក្នុងទ្រុងម្នាក់នេះពិតជាបានធ្វើឲ្យអ្នកស្នេហាប្រដាល់ខ្មែរចាប់អារម្មណ៍រូបគេយ៉ាងខ្លាំងក្នុងឆ្នាំ២០១៧នេះ។ អ្នកប្រដាល់មកពីស្រុកបារាយណ៍ខេត្តកំពង់ធំនេះបានផ្តួលកីឡាករថៃពីរបីលើកជាប់គ្នានៅទឹកដីថៃដែលបានក្លាយជាកំពូលអ្នកលេងក្នុងទ្រុងរបស់កម្ពុជា។
