ទៀត គីមហេង មិនចោលជម្រើសជាតិ ទោះគ្រួសារមានបញ្ហាជាមួយសហព័ន្ធបាល់ទាត់

2016-08-16 21:45:51
បាល់ទាត់

2016-08-16 21:45:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ទៀត គីមហេង កីឡាករក្រុមជម្រើសជាតិក្រោមអាយុ១៦ឆ្នាំកម្ពុជា បាននិយាយថាខ្លួនមិនបោះបង់កីឡាបាល់ទាត់ចោលទេ បើទោះបីជាគ្រួសារមានការយល់ច្រឡំបន្តិចបន្តួចជាមួយសហព័ន្ធបាល់ទាត់កម្ពុជាក៏ដោយ។

លោក ទៀត ចំរើន ឪពុករបស់ ទៀត គីមហេង មានការយល់ច្រឡំជាមួយលោក សៅ សុខា ប្រធានសហព័ន្ធបាល់ទាត់កម្ពុជាអំឡុងពេលពិធីជប់លៀងញ៉ាំអាហារជុំគ្នាកាលពីថ្ងៃសុក្រសប្ដាហ៍មុន។ ខណៈដែលព្រឹកមិញនេះ ភាគីទាំងសងខាងបានសម្រុះសម្រួលយល់ពីគ្នាវិញអស់ហើយ។

ចំពោះរឿងនេះដែរ ខ្សែបម្រើ U16 កម្ពុជាខាងលើបានបញ្ជាក់បើទោះបីជាមានការយល់ច្រឡំនេះមែន ប៉ុន្តែខ្លួនមិនចោលការលេងបាល់ទាត់ឱ្យក្រុមជម្រើសជាតិកម្ពុជានោះទេ។ គោលបំណងធំរបស់ ទៀត គីមហេង គឺចង់លេងឱ្យជម្រើសជាតិ និងក្លាយជាកីឡាករបាល់ទាត់ល្បីឈ្មោះមួយរូប។

ដូចគ្នានេះដែរ លោក ទៀត ចំរើន បាននិយាយដែរថាលោកមិនបង្ខំកូនប្រុសរបស់ខ្លួនឡើយ រូបគេជាអ្នកចង់ចូលរួមជាមួយជម្រើសជាតិ និងជ្រើសរើសការលេងបាល់ទាត់នេះ។ ចំណែកឯរឿង កូនប្រុសចង់ឈប់លេងបាល់ ឬមិនឈប់នោះ គឺអាស្រ័យទៅលើរូបគេផ្ទាល់ លោកមិនបង្ខំនោះទេ។

ទៀត គីមហេង ជាខ្សែបម្រើល្អមួយរូបដែលបានជួយក្រុមកម្ពុជាបង្កើតប្រវត្តិសាស្ត្រឆ្លងផុតវគ្គចែកពូលពានរង្វាន់ AFF U16 Championship បាន ខណៈដែលបច្ចុប្បន្ននេះ រូបគេក៏ជាប់ឈ្មោះជម្រុះបេក្ខភាពចូលលេងឱ្យ U19 កម្ពុជាផងដែរ បើទោះបីជាបច្ចុប្បន្នមានអាយុ១៦ឆ្នាំក៏ដោយ៕

អត្ថបទ៖ មុន្នី រម្យ